Bruno Jenezo: «G'alabadan zavqlanishimiz kerak»

🎙️ Bruno Jenezo o'tgan o'yindan so'ng:

— Tanaffusda nimalarni o'zgartirdingiz?

«Biz yomon o'ynamadik, ammo hal qiluvchi zonada jasorat, oldinga intilish va tezlik yetishmayotgan edi. Hujumlarni tayyorlashda davom etish va shu bilan birga jarima maydonchasiga ko'proq o'yinchilarni yo'naltirish kerak edi. Birinchi gol bizni erkinlashtirdi. Keling, ushbu g'alabadan zavqlanamiz.»

— Jamoangizda sizga nima yoqdi?

«Jamoaviy ruh ilk kundanoq bor edi. Buni har kuni his qilasiz. Yosh o'yinchilar jamoaga juda yaxshi kirishib ketishdi, har bir goldan keyingi umumiy quvonch ham shunday. Bu jamoa haqida ko'p narsani anglatadi. Yana bir narsa — muxlislarimiz. Men qisman aynan shu uchun kelganman. Bizni qo'llab-quvvatlashdi va yordam berishdi. Eng yaxshi startni orzu ham qilib bo'lmasdi. Ammo vaziyatga xolis baho berish kerak — ham yaxshi, ham yomon pallalarda. Bu bor-yo'g'i birinchi tur, shoshma-shoshar xulosalar chiqarmaslik kerak, bizga butun mavsum davomidagi natijalar bo'yicha baho berishadi. Ammo mavsumoldi tayyorgarlikda ko'rgan yaxshi jihatlarimizni Liga 1'dagi kuchli jamoaga qarshi o'yinda tasdiqlay olganimiz yoqimli.»

— Markazda Abdelli-Gomes dueti haqida nimalar deya olasiz?

«Ular butun jamoa kabi juda yaxshi o'yin o'tkazishdi. Anxel birinchi golimizda hal qiluvchi rol o'ynadi. Abdellining shijoati menga juda yoqdi, u bu borada o'rnak bo'ldi.»

— Xoybyerg jamoa uchun almashtirib bo'lmas o'yinchi hisoblanadimi?

«Har qanday murabbiy o'zining eng yaxshi o'yinchilarini saqlab qolishni istaydi. U ham shulardan biri. U tajribaga ega va gol urganida uning texnik mahoratini ko'rdik. Albatta, uning qolishini istardim.»

— Jamoangiz qanday jismoniy holatda?

«Biz hali o'zimiz kutgan darajada emasmiz. Rivojlanib boryapmiz, ammo o'yinchilarning jismoniy tayyorgarlik darajasi turlicha: jahon chempionati ishtirokchilari bor, endigina jarohatdan qaytganlar ham bor. Bizda haftasiga atigi bitta o'yin bor, shuning uchun bularning barchasini yo'lga qo'yib olamiz.»