Erik Garsiya: «Lamin Yamal «Oltin to'p»ga loyiq»

❓Jamoadagi hozirgi vaziyatni qanday izohlaysiz?

🗣 Erik Garsiya: «Biz hamma narsani to'g'ri bajaryapmiz. To'g'ri yo'ldamiz deb o'ylayman. Tanaffusgacha yana bitta o'yinimiz qoldi, u qiyin kechadi — «Sevilya» stadionida, — lekin biz bajarayotgan ishimizdan mamnunmiz».

❓Chempionlar ligasi — bu katta maqsadmi?

🗣 Erik Garsiya: «Bu hamma uchun katta maqsad deb o'ylayman. Oxirgi ikki yil davomida ko'p narsani to'g'ri qildik, lekin turli sabablarga ko'ra turnirdan chiqib ketdik. Bu yil tarkibimiz juda yaxshi, zaxiramiz keng va kuchli. Agar shu darajani saqlab qolsak, albatta, eng yaxshilar qatorida bo'la olamiz».

❓«Oltin to'p» va Lamin Yamal haqida ko'p gapirishmoqda. U bunga loyiq deb hisoblaysizmi?

🗣 Erik Garsiya: «Albatta. Men uning bu sovringa loyiqligiga ishonaman. Biz hammamiz shunday deyapmiz, chunki haqiqatan ham shunday deb o'ylaymiz va u buni har bir o'yinda isbotlayapti. Uning yoshiga va nimalar qilayotganiga qarashning o'zi kifoya. Menga Messi o'yinlarini kuzatish nasib qilgan, endi esa uni kuzatyapman, shuning uchun men uchun u «Oltin to'p»ga loyiq».

❓Nima uchun Lamin «Oltin to'p»ni yutishi kerak? Tasavvur qiling, bu saylov va siz uning saylovoldi kampaniyasini olib boryapsiz.

🗣 Erik Garsiya: «O'ylaymanki, Lamin kimligini darhol tushunish uchun uning bitta o'yinini ko'rish kifoya. Takrorlayman: uning yoshi, erishgan yutuqlari va maydonda o'yin borishini o'zgartira olish qobiliyati — bu shunchaki hayratlanarli. Gap faqat bu mavsum haqida emas. O'tgan mavsumda qilgan barcha ishlarini, jamoaga qanchalik yordam berayotganini va unda o'sish uchun qanchalik katta salohiyat borligini ko'rish yetarli. U allaqachon ega bo'lgan mahorat darajasida yaxshilanish imkoniyatlari haqida gapirishning o'zi hayratlanarli. Albatta, jamoadoshlarimni ham unutmoqchi emasman. Rafinya va Pedri ham, nazarimda, favoritlar qatorida bo'lishi kerak. Kubarsi ham u yerda va men uning bunga loyiqligiga ishonaman. Dani ham u yerda bo'lishi mumkin edi. Men ham, to'g'rimi? (kuladi) Va Rodri, u ham albatta ajoyib futbolchi».

❓Rodri yaqinda «Barselona» Laminni qo'llab-quvvatlash kampaniyasini olib borayotganini aytdi. Xansi Flik bunday kampaniya olib borishda yomon narsa yo'qligini aytdi. Bu kiyim almashtirish xonasida qanday ko'rinadi? Agar sovrinni biringiz yutsangiz, qolganlar xursand bo'ladimi?

🗣 Erik Garsiya: «Rodrida allaqachon bitta bor, shuning uchun endi u o'rtoqlik ko'rsatishi kerak (kuladi). Agar jiddiy gapiradigan bo'lsak: aytganimdek, klubda bu sovringa loyiq ko'plab insonlar bor. Shaxsan men esa Lamin bunga loyiq deb hisoblayman».

❓Voytsex Shensni atrofida ba'zi shubhalar paydo bo'lmoqda, Flik esa unga to'liq ishonayotgandek. Shensni sizga nima beradi va kiyim almashtirish xonasidagi muhitga qanday hissa qo'shadi?

🗣 Erik Garsiya: «U katta futbol tajribasiga ega inson va bizga kelganidan beri juda katta yordam bermoqda. Albatta, Joan zaxirasida bo'lish oson emas, chunki hamma o'ynashni xohlaydi. Men uchun Joan — dunyodagi eng yaxshi darvozabon. Shuning uchun hech qachon oson bo'lmaydi, lekin hammamiz Shensniga ishonamiz. U muntazam maydonga tushgan mavsumda juda yuqori darajadagi o'yin ko'rsatgan. U bilan Chempionlar ligasi yarim finaliga qadar yetib borganmiz, shuning uchun u o'ynaganda biz xotirjammiz».

❓Bolalar sizdan qaysi pozitsiyada o'ynashingizni so'rashsa, nima deb javob berasiz?

🗣 Erik Garsiya: «Himoyachiman deb (kuladi). Men himoyada o'ynayman. Ko'plab pozitsiyalarda o'ynashga moslasha olishim omadim, lekin hozircha ularga himoyachiman deb aytaman».

❓O'zingizni jamoaning muhim o'yinchisi deb his qilasizmi?

🗣 Erik Garsiya: «Men muhim o'yinchiman deb o'ylayman. Mavsumlar juda uzun, o'yinlar juda ko'p va har kimning o'z navbati keladi. Maydonga tushgan har safar murabbiyning qaror qabul qilishini qiyinlashtirish va tarkib tanlashni murakkablashtirish uchun bor kuchimni berishga harakat qilaman».

❓Mavsum boshiga nazar tashlab, o'zingizni Chempionlar ligasidagi favorit deb hisoblaysizmi? Bu hali ham ichingizda yashayaptimi? Maqsad, chaqiriq, orzu?

🗣 Erik Garsiya: «Bu orzu. O'ylaymanki, bu bizning, o'yinchilarning, murabbiylar shtabining, muxlislarning orzusi... Bu barchaning orzusi».