Hansi Flik «Valensiya»ga qarshi o'yin haqida fikr bildirdi

Hansi Flikning «Valensiya»ga qarshi o'yindan keyingi matbuot anjumani:

❓Jamoa deyarli tayyorgarliksiz mavsumni ishonchli boshladi. Bunday muvaffaqiyatli startni kutganmidingiz?

🗣 Hansi Flik: «Kecha aytganimdek, mashg'ulotlar sifati juda muhim. Buni ko'rganimda, qanday o'ynay olishimizga ishonchim komil bo'ladi. Bugun biz fantastik o'yin o'tkazdik, deyarli mukammal, chunki o'yinni nazorat qildik, ustunlik qildik va murabbiy sifatida jamoamdan aynan shu narsani kutaman — o'yin ustidan nazorat, so'ngra bo'sh zonalarni izlash va biz buni uddaladik. Biz xotirjamlikni saqlaymiz, gol urish imkoniyati tug'ilganda esa undan foydalanishga harakat qilamiz».

❓Nega «deyarli mukammal»?

🗣 Hansi Flik: «U mukammal edi (kuladi). Yo'q, hech narsa mukammal bo'lmaydi. Har doim ustida ishlash kerak bo'lgan jihatlar bor. Agar u mukammal bo'lganida, ishlashni to'xtatishimiz mumkin edi. Gap har doim rivojlanib borishda. 5:0 hisobida doimo hujum qilish kerakmi, bilmayman. Ba'zida o'yinni tinchlantirib, shu orqali ko'proq bo'shliqqa ega bo'lish kerak».

❓Bugun o'yindan oldin Lamin bilan suhbat qanday o'tdi? Uning o'ynashi siz uchun aniq edimi?

🗣 Hansi Flik: «Kecha u individual shug'ullandi va hech qanday muammo sezmadi. Bugun ertalab gaplashdik, u hammasi joyidaligini, o'ynay olishini va hatto 90 daqiqa harakat qila olishini aytdi, shuning uchun buni yaxshi belgi deb hisobladim. U har doim pressingda faol ishtirok etishini ko'rish mumkin. Himoyada futbolchilar bir-birini yaxshi tushunishmoqda, masofani qisqartirishmoqda».

❓Butun yoz davomida hujumchi transferi haqida gap-so'zlar bo'ldi, hozir esa jamoa sof hujumchisiz to'rtta o'yinda 17 ta gol urdi. Bu rejalaringizni o'zgartiradimi?

🗣 Hansi Flik: «Bu rejalarimizni o'zgartirmaydi, bizga hujumchi kerak, bu aniq. Biroq hujum chizig'ida, shu jumladan yarim himoyada ham juda yuqori sifat bor, har bir futbolchi gol ura oladi. Pedrining bugun gol urganidan xursandman. Biz o'yinni nazorat qilyapmiz, bo'sh zonalardan foydalanyapmiz va yakkama-yakka vaziyatlarda, shuningdek, hujumlarni yakunlashda yuqori sifat ko'rsatyapmiz».

❓Pedri barcha sovrinlar uchun kurashishni maqsad qilganingizni aytdi. Jamoaning bu ambitsiyasi sizni ruhlantiradimi?

🗣 Hansi Flik: «Futbolchilar, jumladan, Jahon chempionatida g'olib chiqqanlar orasida ham g'alabaga bo'lgan chanqoqlik, ko'proq narsaga erishish istagi borligini ko'ryapman. Bu har kuni qattiq ishlashimiz kerakligini anglatadi. Raqiblar hech narsani shunchaki bermaydi. Barcha maqsadlarga erishish qiyin bo'lishini tushunishimiz kerak, lekin biz harakat qilamiz. Bizda fantastik muxlislar bor, ular doimo bizni qo'llab-quvvatlaydi va bu juda yaxshi. Biz ular uchun, ushbu ajoyib klub uchun o'ynayapmiz. Men uchun bu ajoyib vaziyat. Bizda juda yosh jamoa bor, unga kerakli futbolchilar qo'shildi, ammo bu mavsumning boshlanishi xolos. Agar bu yakuni bo'lganida, unda ko'proq qoniqish hosil qilgan bo'lardim, lekin oldimizda hali uzoq yo'l bor».