Jayden Oosterwolde transferi: Roma tibbiy ko'rik natijalaridan xavotirda

Jayden Oosterwoldening «Fenerbahche»dan «Roma»ga o'tishi so'roq ostida qolmoqda.

Xabarlarga ko'ra, gollandiyalik himoyachi tibbiy ko'rikdan o'tgan, biroq klub tomonidan o'tkazilgan qo'shimcha tekshiruvlar uning mushaklaridagi jarohatdan tiklanish muddati bo'yicha dastlabki taxminlardan farqli holatni ko'rsatgan.

Jurnalist Filippo Biafora Manà Manà Sport nashriga ma'lum qilishicha, reabilitatsiya jarayoni kutilganidan (ikki-uch hafta) ko'proq vaqt talab qilishi mumkin. Aynan shu omil «Roma»ni bitimga yakuniy ruxsat berishdan avval biroz kutishga majbur qildi.

Turkiyadan olingan ma'lumotlarga ko'ra, «Roma» va «Fenerbahche» o'rtasida yechim topish bo'yicha muzokaralar davom etmoqda, ammo kelishuv dastlabki shartlar asosida yakunlanadimi yoki shartnoma tuzilmasini qayta ko'rib chiqish kerakmi, hozircha noma'lum. Shu bois, yaqin soatlar hal qiluvchi ahamiyatga ega bo'ladi. «Roma» yakuniy majburiyatlarni olishdan avval shartlar va tiklanishning aniq vaqti bo'yicha to'liq ravshanlikka erishmoqchi. Shundan so'nggina transfer amalga oshishi yoki oshmasligi hamda qanday shartlar asosida bo'lishi ma'lum bo'ladi.