Utrextda mojaro: Antoni Korreyya va futbolchilar o'rtasidagi kelishmovchiliklar
Utrextda yangi bosh murabbiy Antoni Korreyya va futbolchilar o'rtasida ziddiyat yuzaga keldi. Bir qator o'yinchilar transfer so'ramoqda.
🙂 Utrext 2026/27-yilgi mavsumga tayyorgarlikni yangi bosh murabbiy Antoni Korreyya qo'l ostida boshlaganiga ikki hafta bo'ldi. Biroq, ilk kunlardanoq mutaxassis jamoa bilan til topisha olmagani ma'lum bo'ldi.
Manba xabariga ko'ra, ko'plab futbolchilar, ayniqsa klubda uzoq vaqtdan beri to'p surayotganlar Korreyyaning mashg'ulot usullari va muloqot uslubidan norozi.
Uning 3-4-3 sxemasiga o'tishi qo'shimcha norozilik keltirib chiqardi, chunki ko'plab o'yinchilar bu tizimni o'zlariga mos emas deb hisoblashadi va unda o'z o'rnini ko'rmayapti. Shunga qaramay, murabbiy o'z bilganidan qolmayapti.
Yuzaga kelgan muhit sababli yarim himoyachi Zidan Ikbal Korreyya bilan bo'lgan ilk suhbatdan so'ng klubni tark etishni istamoqda. Darvozabon Vasilios Barkas va yana bir nechta futbolchi sport direktori Yordi Zaydama transfer so'rovini yuborishdi.
Garchi Korreyya omma oldida barcha futbolchilarga imkoniyat berishini aytsa-da, jamoa ichida u o'z favoritlarini aniqlab olgan. Murabbiy Devid Minning mehnatsevarligini yuqori baholamoqda va Artyom Stepanovga tayyorgarlikning ushbu bosqichida u o'z pozitsiyasida ikkinchi tanlov bo'lishini ma'lum qilgan.
Shu bilan birga, Korreyyaning sport direktori Yordi Zaydama bilan munosabatlari ham yomonlashmoqda. Murabbiy Mayk van der Xornning ketganidan juda norozi, uni jamoaning muhim qismi deb hisoblagan va klub himoyachini saqlab qolish uchun yetarlicha harakat qilmadi deb o'ylaydi.
Kiyinish xonasidagi ko'pchilik bilan bo'lgan mojaro va rahbariyat bilan ortib borayotgan keskinlik fonida Antoni Korreyyaning Utrextdagi faoliyati juda qisqa bo'lishi mumkinligi haqida taassurot kuchaymoqda. U yangi mavsum boshlanishidan oldin ham klubni tark etishi istisno qilinmaydi.