Portu Bednarek jarohati tufayli kompensatsiya talab qilmoqchi

⚠️ "Portu" klubi himoyachi Bednarekning jarohati sababli kompensatsiya undirish uchun sudga murojaat qilmoqchi.

O JOGO xabariga ko'ra, "ajdarolar" Portugaliya Superkubogi o'tkazilgan "Eshtadiu Munisipal de Koimbra" maydonining holati yuzasidan Portugaliya futbol federatsiyasiga rasmiy shikoyat kiritishga qaror qildi.

Nashr ma'lumotlariga ko'ra, "Portu" kompensatsiya olishning huquqiy imkoniyatlarini o'rganmoqda. Himoyachi Bednarek aynan maydonning yomon holati tufayli jarohat olib, taxminan ikki haftaga safdan chiqqan. Koimbra munitsipaliteti rahbariyati allaqachon kelgusi oyda maysazorni almashtirish masalasini ko'rib chiqmoqda.

O'yindan bir kun oldin "Portu" vitse-prezidenti Tiagu Madureyra maydonning ayanchli holati tufayli futbolchilar jarohat olish xavfi borligidan ogohlantirib, klubning xavotir va noroziligini bildirgan edi. "Portu" Superkubokni aynan shu stadionda o'tkazish qarori qabul qilinganidan buyon maydon holatidan xavotirda bo'lgan va bu haqda iyul oyi boshida klublar hamda federatsiya o'rtasidagi ilk uchrashuvda rasman xabar bergan.