Stefan Baychetich va uning «Liverpul» muxlislariga atalgan xayrlashuv maktubi:
«Qadrli «Liverpul» muxlislari, men hech qachon xayrlashuv maktubini yozishni reja qilmaganman, chunki men doim bo'lishni istagan joyimda edim. Siz menga 5 yil davomida bergan muhabbatingiz benihoya edi va bu ayniqsa qadrli, chunki hamma narsa yaxshi ketayotganda mehr ko'rsatish oson, lekin bilasizki, men bilan bunday bo'lmadi. Ammo siz doim yonimda edingiz.
Barcha jarohatlar va omadsizliklar davrida mening motivatsiyam qaytish va siz menga bergan mehr hamda qo'llab-quvvatlash uchun o'yinim bilan javob qaytarish edi. Afsuski, men buni uddalay olmadim.
Ba'zida o'zgarishlar zarur bo'ladi va men hamda oilam uchun bu vaqt keldi. Ushbu klub bilan bog'liq xotiralar men bilan abadiy qoladi va farzandlarimga Angliyadagi eng yaxshi klubda o'ynaganimni ayta olishimdan baxtiyorman.
Nimalar bo'lishi mumkinligini hech qachon bilmaymiz, lekin bu yerda o'tkazgan yillarim inson va futbolchi sifatida o'sishimga, ulg'ayishimga yordam berdi. Bu yerga kelgan 16 yoshli yigit va hozirgi men — bular ikki butunlay boshqa inson. Men skauzerlar oilasida yashadim, ular menga bu shahar va odamlar qanchalik o'ziga xos bo'lishi mumkinligini ko'rsatishdi va men g'urur bilan aytamanki, buning bir bo'lagi abadiy ichimda qoladi.
Barchasi uchun chin qalbimdan rahmat, men va oilam abadiy «qizillar» bo'lib qolamiz. Bu klub hamisha qalbimda. Bir marta «qizil» bo'lsang, abadiy «qizil» bo'lib qolasan ❤️».
Izohlar (0)
Izoh qoldirish uchun tizimga kiring.
Hozircha izoh yo'q. Birinchi bo'lib fikr bildiring!