Wesley uchun kurash qizg'in pallada: "Arsenal" ham da'vogarlar safida

Premer-liga klublari Ueslini diqqat bilan kuzatishda davom etmoqda.

"Manchester Yunayted" va "Nyukasl" qiziqishidan so'ng, "Roma" o'yinchisi uchun kurashga "Arsenal" ham qo'shilgani aytilmoqda.

Sport Witness ma'lumotiga ko'ra, "kanonirlar" qanotlarni kuchaytirish maqsadida braziliyalik futbolchini kuzatmoqda. Uesli Jan Pero Gasperini qo'l ostidagi o'sishi orqali ingliz klublari e'tiborini tortdi.

Asosiy o'zgarish uning taxminiy qiymatiga tegishli. Agar bir yil avval braziliyalik futbolchining bozor qiymati 30 million yevro atrofida bo'lgan bo'lsa, Angliyadan kelayotgan xabarlarga ko'ra, hozir bu summa deyarli ikki barobar oshgan: "Roma" bilan muzokaralarni boshlash uchun 60 million yevro atrofida taklif talab qilinadi.

Sport Witness nashri, shuningdek, ushbu klublar "Monako"dan Vandersonga ham qiziqish bildirayotganini xabar qilmoqda. U 40 million yevroga baholanib, ancha qulayroq muqobil variant sifatida qaralmoqda. Shu bilan birga, Ueslining narxi sezilarli darajada oshdi: uni qo'lga kiritishni istagan har qanday klub top-o'yinchi darajasiga mos summa to'lashi kerak bo'ladi.