#Xaldun Al-Muborak — yangiliklari

🗣️⚽️ «Manchester Siti» raisi Xaldun Al-Muborakning bayonoti:

«Premer-liga jarayoni hali yakuniga yetganicha yo'q va klubning aybsizligini isbotlash borasidagi ishonchimiz hamda qat'iyatimiz xuddi boshidagidek kuchli»

Rui Pintu FIFA prezidenti Janni Infantinoni 2014-yilda «Man Siti»ni «yopib qo'yganlikda» ochiqchasiga aybladi.

Bugun bu odam FIFAga rahbarlik qilmoqda. O'sha paytda UEFA bosh kotibi lavozimida ishlagan mash'um Janni Infantino o'z vakolatlarini suiiste'mol qildi, maxfiy hujjatlarni uzatdi va aslida tergov palatasini aldab, «Man Siti» hamda «PSJ» jarima bilan qutulib qolishi hamda chetlatishga olib kelishi mumkin bo'lgan chuqur tekshiruvdan qochishi uchun qo'lidan kelgan barcha ishni qildi.

Pintu Infantinoni «futbolning saraton o'smasi» deb ataydi va FIFA prezidenti kelajakdagi futbolda o'z o'rniga ega bo'lmasligi kerak deb hisoblaydi.

Aslida bu yangilik emas. Pintu 2018-yil noyabr oyida Der Spiegel nashri Football Leaks hujjatlariga asoslanib e'lon qilgan ma'lumotlarni takrorlamoqda. Yangiligi shundaki, endi bu ayblovlar APL qarori fonida yangramoqda.

Gap qaysi ish haqida ketmoqda?

2013/14-yilgi mavsumda UEFA «Siti»ni 2012 va 2013-yillardagi moliyaviy feyr-pley qoidalari bo'yicha tekshirgan. Tergovni Klublar moliyaviy nazorati organi (CFCB) tergov palatasi olib borgan.

Der Spiegel ma'lumotlariga ko'ra, dastlabki hisobotda tergovchilar shayx Mansur Abu-Dabidagi homiylarga «sezilarli ta'sir» o'tkazgani, ular «Siti»ga bozor narxidan uch barobar ko'p pul to'laganini yozishgan. Klubning 2013-yildagi zarari ikki yillik davr uchun 233 million yevroni tashkil etgan – bu ruxsat etilganidan 188 millionga ko'p.

Katta jazolargacha yetib bormadi. 2014-yil may oyida UEFA va «Siti» o'zaro kelishuv imzoladi, unga ko'ra klub 60 million yevro jarima (shundan 40 millioni shartli), Chempionlar ligasi uchun qaydnomani cheklash (25 tadan 21 ta o'yinchigacha) va keyingi ikki mavsum uchun transfer xarajatlariga cheklovlar bilan qutuldi. «Siti»da bu kelishuvni «kompromiss» deb atashdi.

Infantinoning roli nimada edi?

Janni Infantino 2009-yildan 2016-yilgacha UEFA bosh kotibi lavozimida ishlagan. Football Leaks hujjatlariga ko'ra, 2014-yil bahorida u «Siti» bilan muzokaralarda shaxsan ishtirok etgan.

2014-yil aprel. «Siti» bosh direktori Ferran Soriano direktorlar kengashi raisi Xaldun al-Muborakka yozishicha, ular Infantino bilan yuristlarga «ogohlantirishdan ko'ra ko'proq» bo'lgan hamda «samarali va tiyib turuvchi», ammo klub biznesiga «dramatik tarzda zarba bermaydigan» kelishuvni ishlab chiqishni topshirishga kelishib olishgan.

8-may. Soriano Infantino bilan Londondagi uchrashuvni «yakuniy bitimni kelishib olish uchun» «maxfiy» deb ataydi.

12-may. Infantino «Siti» raisi Xaldun al-Muborakka shunday yozadi: «Afsuski, menga tergov palatasi o'zaro kelishuv uchun pozitsiyalar hali ham juda uzoq degan xulosaga kelgani haqida xabar berishdi».

16-may. Kelishuv sehrli tarzda imzolandi. Der Spiegel ma'lumotlariga ko'ra, «Siti»ning amirlik kompaniyalari bilan homiylik shartnomalariga «adolatli qiymat»dan yiliga 26 million yevrogacha oshib ketishiga ruxsat berildi.

Infantino bunga nima deb javob berdi?

U o'z harakatlarining noqonuniyligini rad etdi. Uning so'zlariga ko'ra, o'zaro kelishuvlar «reglamentda to'g'ridan-to'g'ri ko'zda tutilgan» va muzokaralar olib borish UEFA ma'muriyatining majburiyati hisoblanadi. Nashrlarni esa u «chalg'ituvchi va adolatsiz» deb atadi.

Hozir nima yangilik bor?

Tergov natijalarida aytilishicha, UEFA tergov palatasi klubning moliyaviy feyr-pleyga rioya qilgani haqidagi da'vosi bilan rozi bo'lmagan. Biroq jazo qo'llanilmadi – UEFA va klub o'zaro kelishuvga erishdi.

Shu bilan birga, APL komissiyasi o'sha davrda «Siti» yashirin moliyalashtirish sxemasi bo'yicha ishlaganiga amin, bu esa «avvaliga UEFA qoidalariga rioya qilishda yaxshi taraqqiyot ko'rinishini yaratishga», keyin esa «UEFA oldida ularga rioya qilayotganini tasdiqlashga» imkon bergan.

Ma'lum bo'lishicha, UEFA tergovchilari 2014-yilda to'g'ri yo'lga chiqishgan, ammo ishni kompromiss bilan yopishgan. Infantinoning qarordagi roli haqida esa bir og'iz ham so'z yo'q.

Shunday qilib, 2014-yilda jahon futbolida «Siti» sxemasini to'xtatish imkoniyati bo'lgan.

Infantino qoidalarni buzganmi yoki yo'q, yuridik jihatdan aniqlanmagan. Ammo boshqa narsa aniq: 2014-yilda «Siti» xo'jayinlari bilan muzokaralarni bugungi kunda jahon futbolini boshqarayotgan odam olib borgan.