Fabian Hyurseler «Arsenal» haqidagi o'tgan yilgi gaplaridan pushaymon emas

Fabian Hyurseler «Arsenal» haqidagi o'tgan yilgi gaplaridan pushaymon emas — Mikel Arteta bilan qarama-qarshilik davom etmoqda

«Brayton» bosh murabbiyi Fabian Hyurseler «Arsenal»ning taktik yondashuvi va londonliklarning vaqtni cho'zishi haqidagi o'tgan yilgi fikrlarida qat'iy qolmoqda. Hyurselerning noroziligi mart oyida «Arsenal»ning 1:0 hisobidagi g'alabasidan so'ng avj olgandi. O'sha o'yinda Devid Raya jarohat sababli uch marta maydonda yotib qolgan. O'shanda murabbiy maydonda «faqat futbol o'ynashga harakat qilgan bitta jamoa» bo'lganini aytgandi.

Hyurseler o'shanda shunday degandi:

Agar ular Premer-ligani yutsa, hech kim keyin qanday yo'l bilan yutganini so'ramaydi. Hozir ular g'alaba uchun hamma narsaga tayyor ekanliklari sezilmoqda. Oxir-oqibat, hamma narsa qoidalarga borib taqaladi. Agar Premer-liga va hakam bularga ruxsat bersa, qiyin bo'ladi. Ular o'z qoidalarini o'zlari o'rnatishni boshlaydilar. Hozir menda ular qanday o'ynashidan qat'iy nazar, o'z qoidalari bilan harakat qilayotgandek tuyg'u bor. Men hech qachon bunday usulda g'alaba qozonishga urinadigan murabbiy bo'lmayman. Albatta, har bir jamoa vaqtni boshqaradi va o'yinni cho'zadi, lekin chegara bo'lishi kerak. Bu chegarani Premer-liga va hakamlar belgilashi kerak. Hozir esa ular shunchaki xohlagan ishlarini qilishmoqda.

Shanba kuni «Brayton» «Arsenal»ni qabul qiladi va yangi uchrashuv oldidan Hyurselerdan o'sha fikrlari haqida yana so'rashdi.

O'tgan mavsum ortda qoldi. Fikr muhim va agar mendan so'rashsa, har doim o'ylagan narsamni aytaman. Lekin men «Arsenal»ni munosib chempionlik bilan tabrikladim. Hozir yangi mavsum. Ular uni juda ta'sirli boshlashdi. Bizning vazifamiz — ular bilan raqobatlashishga urinib ko'rish.

Hyurseler «kanonirlar»ni shanba kuni «Ameks Stedium»da shovqinli muhit kutayotganidan ogohlantirdi:

Stadion shovqinli bo'ladi. Biz ularni mehmon sifatida kutamiz. «Brayton» yana bir shov-shuvli g'alabaga erishishni maqsad qilgan.