Fabrisio Romano: «Monako» va «Chelsi» o'rtasidagi transfer dramasi tafsilotlari

Fabrisio Romano o'zining YouTube kanalida quyidagilarni ma'lum qildi:

«Monako»ning maqsadi Folarin Balogunni sotish edi. Klub uning «Everton»ga 45 million yevro evaziga o'tishini rejalashtirgan: o'yinchi tibbiy ko'rikdan o'tishga ketgan, shartnomalar tayyorlanayotgan edi. Aynan shu sababli «Monako» «Chelsi»ning Lamin Kamara bo'yicha takliflarini rad etishni ko'zlab turgandi.

Biroq Balogun tibbiy ko'rikdan o'tayotganda muammolar yuzaga keldi. Buni tushungan «Monako» «Chelsi»ga Kamaraning transferi uchun yashil chiroq yoqishga qaror qildi. Klublar o'rtasida barchasi 55 million yevroga kelishib olingandi va Kamara allaqachon tibbiy ko'rikka yo'l olgandi. «Chelsi» hujjatlarni qabul qilib oldi, «Monako» shartnomaning o'z qismini imzoladi, londonliklar esa bitimni yakunlash uchun zarur qog'ozlarni rasmiylashtirayotgan edi.

Ammo Kamara tibbiy ko'rikdan o'tayotgan vaqtda «Monako»ga «Everton»dan qo'ng'iroq bo'ldi va ular Balogun bo'yicha muzokaralarni davom ettirishga tayyor ekanliklarini bildirishdi. Bu vaziyatni butunlay o'zgartirib yubordi. «Monako» «Chelsi»ga qo'ng'iroq qilib: «Kechirasiz, lekin Kamara hech qayerga ketmaydi», dedi. «Chelsi» g'azabda edi: kelishuvga erishilgandi, o'yinchi tibbiy ko'rikdan o'tayotgandi va bitim yakunlanishiga oz qolgandi.

Shu paytgacha klublar o'rtasidagi munosabatlar juda yaxshi edi, shuning uchun «Chelsi» «Monako» muammo yaratmasligiga ishonchi komil edi. Biroq fransuz klubi Kamara bo'yicha bitimni bekor qildi, uning tibbiy ko'rigini to'xtatdi va yana Balogunni «Everton»ga o'tishiga yashil chiroq yoqdi.

Ammo bu yerda ham barchasi rejadan tashqari ketdi. «Monako»dan yashil chiroq bo'lishiga qaramay, Balogun va «Everton» o'rtasida, bevosita tomonlar o'rtasidagi muzokaralarda muammolar yuzaga keldi. Yakunda Balogun ham, Kamara ham hech qayerga o'tmadi. Barcha tomonlar norozi qoldi: «Everton», Kamara, «Chelsi», Balogun va yakunda pul olmagan «Monako».

Va men alohida «Chelsi»ning professionalligini ta'kidlamoqchiman. Kamara bilan bo'lgan barcha bu dramadan so'ng klub «Manchester Siti»ga qo'ng'iroq qilib: «Kechirasiz, biz o'rinbosar topa olmadik, shuning uchun Enso Fernandes «Manchester Siti»ga o'ta olmaydi», deyishi mumkin edi.

Ammo «Chelsi» Enso Fernandes va «Manchester Siti» oldidagi so'zida turishga qaror qildi. Londonliklar kelishuvni bajardilar, munosabatlarni saqlab qoldilar va Ensoning o'tishiga yashil chiroq yoqib, bu vaziyatda jiddiy klub ekanliklarini ko'rsatdilar.

«Chelsi» va Manu Kone o'rtasidagi vaziyatga ham oydinlik kiritaman. Ertalab Italiya OAVlari Kone «Chelsi»ga o'tishiga bir qadam qolganini, deyarli barchasi yakunlanganini xabar qilgandi. Ammo haqiqat butunlay boshqacha edi: «Chelsi» hech qachon Kone bilan shartnoma imzolashga yaqin bo'lmagan.

Londonliklar haqiqatan ham vaziyatni bilish uchun «Roma» bilan bog'lanishgan, ammo «Roma»ning pozitsiyasi juda aniq edi: klub o'yinchini sotishni istamaydi. Kone sotuvga qo'yilmagan va mutlaqo asosiy futbolchi deb hisoblanadi. Shuning uchun hech narsa sodir bo'lmadi.