Gregori Lorensi: «OM»da qayta qurish jarayoni davom etmoqda»

Gregori Lorensi L'Equipe nashriga bergan intervyusida «OM»dagi vaziyat va jamoaning kelajagi haqida gapirdi:

«Men biz sport va moliya nuqtayi nazaridan qayta qurish jarayonida ekanligimizni hamda DNCG va Yevropa Ligasi ishtiroki bilan bog'liq ko'plab cheklovlarimiz borligini bilardim. Maoshlar fondini qisqartirish uchun futbolchilarni sotishimizga to'g'ri keldi. Bu vazifalarni bajarishning imkoni bo'lmadi va biz yangi futbolchilarni jalb qila olmadik. Biz moslashishga majbur bo'ldik va hozirda o'zimiz istagan holatda emasmiz. Endi maydonda vaziyatni o'nglashimiz kerak», — dedi Lorensi.

«PSJ»dan uchralgan mag'lubiyatdan so'ng Bruno Jenezio klub rahbariyati bilan gaplashib olishini aytgandi. Lorensi bu borada shunday dedi:

«Gap dastlabki o'yinlarni tahlil qilish haqida edi. Biz ko'plab vaziyatlar yaratdik, ammo yuqori himoya chizig'i bilan o'ynab, qarshi hujumlarda ko'p gol o'tkazib yubordik. Bu bizni o'ylantirmoqda. Bizga ritm yetishmayapti: ko'p to'g'ri ishlarni qilyapmiz, lekin bir soatdan keyin pasayishni boshlayapmiz. Tarkibni tubdan o'zgartirmaymiz, chunki bunga qurbimiz yetmaydi. Qo'limizdan kelayotgan ishlarni kuchaytirishimiz va shu bilan birga o'zimizni xavf ostiga qo'ymasligimiz kerak».

Jenezio va klub egasi Frenk MakKort o'rtasidagi munosabatlar haqida Lorensi shunday fikr bildirdi:

«O'ylaymanki, biz barchamiz — murabbiy, rahbariyat va men — bir fikrdamiz. Bruno o'z o'ylari bilan o'rtoqlashadi. Men u bilan bu haqda gaplashdim va uning his-tuyg'ularini ifoda etish uning vazifasi deb hisoblayman. Ammo bu haqda matbuotda gapirishimiz qandaydir foyda keltirmaydi. Biz tarkibni qanday bo'lsa, shundayligicha qabul qilib oldik va bu muammoni hal qilish bizga bog'liq. U klub egasi bilan gaplashadimi — bu savolga javob bera olmayman. Uning jahli chiqqanini tushunish mumkin, chunki u jamoada salohiyat borligini his qilmoqda va bu unda umidsizlik uyg'otmoqda. Ammo bu jamoa ichida kelishmovchilik bor degani emas. Biz vaziyatga xotirjam qarayapmiz va bu «OM»dagi murabbiy loyihasiga hech qanday shubha tug'dirmaydi».

Murabbiyning iste'foga chiqishi mumkinligi haqidagi savolga Lorensi keskin javob berdi:

«Yo'q, aslo. Murabbiy biz bilan 2028-yilgacha shartnoma imzolagan, biz Bruno bilan birgalikda rejalar tuzmoqdamiz va bu masala umuman kun tartibida yo'q».

Shuningdek, u Jenezio bilan munosabatlari haqida to'xtaldi:

«Bizda umumiy jihatlar bor. Brunoni xotirjam inson deyishadi. Har doim ham emas. U o'z fikrini ochiq ayta oladi va «Parij»ga qarshi o'yindan (1:2) keyin kiyim almashtirish xonasida vaziyat biroz o'zgargandi. Men xotirjam ko'rinishim mumkin, lekin futbolchiga biror narsa deyish kerak bo'lsa, albatta aytaman».

Kelajakdagi maqsadlar va yanvar oyidagi transferlar haqida:

«Qisqa muddatli istiqbolda eng muhimi — maqsadlar haqida gapirmaslik. Ishonchni qaytarish va g'alaba qozonish kerak, balki chiroyli emas, lekin samaraliroq o'ynash lozim. Murabbiy yoki klubdagi bizlar qaysidir turnirda taslim bo'lishimizni aytganimizni tasavvur qila olmayman. Bizda o'rta va uzoq muddatli qarashlar bo'lishi kerak, shuning uchun ham murabbiyga hech qanday bosim o'tkazmayapmiz. Qayta qurish — bu ikki oylik ish emas. Yanvar oyiga kelsak, bu uzoq davom etadigan jarayon va xotirjamlikni saqlash kerak. DNCG tomonidan cheklovimiz bor, dekabr oyidagi eshituvga tayyorgarlik ko'ryapmiz va uning natijalaridan kelib chiqib qaror qabul qilamiz».