Joze Mourinyu: «Jude Bellingemning harakatlari aqlbovar qilmas»

Joze Mourinyuning o'yindan keyingi matbuot anjumani:

Jude Bellingem haqida:

Jude Bellingemning yarim himoyachi sifatida qilayotgan ishlari mutlaqo aqlbovar qilmas. O'tgan yili «Benfika» bilan «Real»ga qarshi o'ynaganimizda, Bellingem deyarli ikkinchi chap qanot himoyachisi kabi himoyalangani e'tiborimni tortgandi. Biz «Benfika»da bundan unumli foydalanganmiz. Endi esa buni ko'rishni istamayman. Unga bu haqda aytdim va biz kelishib oldik.

O'yin haqida:

Birinchi bo'lim juda kuchli o'tdi — jamoa vaqt cho'zib o'tirmay, darhol o'yin taqdirini hal qilishga kirishdi. Ikkinchi bo'limda o'yinni boshqarish kuchaydi, sur'at esa pasaydi. «Malaga» to'pga egalik qilish uchun ko'proq vaqt va xotirjamlikka ega bo'ldi. Ammo har safar tezlikni oshirganimizda xavf tug'ildi va yana bir-ikki gol urishimiz mumkinligidek tuyuldi. Shuningdek, boshqa maqsadimiz ham bor edi — darvozani daxlsiz saqlash, yaxshi himoyalanish va tartibli o'yin ko'rsatish. Har doim ham yuqori intensivlik bilan hujum qilib bo'lmaydi: ba'zida raqib himoyadan chiqadi va ixcham himoyalanishni bilish kerak. Biz buni yaxshi bajardik.

O'yin oxiridagi konsentratsiya yo'qolishi haqida:

So'nggi 20 daqiqada o'yinga bo'lgan chanqoqligimiz biroz pasaydi. Bu mavsum boshi, shuning uchun o'yin oxirida energiya yetishmasligi mumkin — bu tabiiy hol.

Bellingem, Vinisius va Mbappe triosi haqida:

Men har doim aytganman: top-o'yinchilar doimo birga o'ynashni xohlashadi — tez fikrlaydigan, tez harakatlanadigan va elit darajadagi futbolchilar. Ular doimo bir-biriga mos tushadi. Ko'p gap-so'zlarni eshitdim: «Mou buni xohlamaydi», «Mou uchalasini ham maydonda ko'rishni istamaydi». Men esa har doim jamoamda eng yaxshi o'yinchilarni ko'rishni istashimni aytganman. Ular o'rtasida katta empatiya va o'zaro tushunish bor, men hech qanday yomon narsa sezmadim.

Xoysen haqida:

U menga juda yoqadi. U himoyadan chiqishda faqat yarim himoyachilar uddalay oladigan paslarni beradi, yakkakurashlarda g'olib chiqadi, jamoaga ishonch bag'ishlaydi, u yuqori saviyaga ega. Boshida xatoga yo'l qo'ydi, ammo keyin to'liq ustunlik qildi. Mening ustuvor vazifam — yaxshi himoyalanadigan himoyachilar, agar ular to'p bilan chiroyli o'ynasa, undan ham yaxshi. Ammo u yaxshi himoyalanmoqda va hozir eng muhimi shu.

Eduardu Kamavinga haqida:

Ko'pchilik unchalik yoqtirmaydigan yigit, bugun ajoyib o'yin o'tkazdi — Eduardu Kamavinga. Uning o'yini menga juda yoqdi.

Yan Diomande haqida:

Yan Diomande ko'p mehnat qiladi, u kamtar, o'rganishni xohlaydi, meni va sheriklarini tinglaydi. Biz u bilan bosqichma-bosqich ishlayapmiz va uning vaqti keladi. Siz uning narxi — 100 yoki 120 millionligi haqida qayg'urasiz, qancha bo'lganini eslay olmayman (kuladi). U juda iqtidorli, ammo juda yosh va sodda, u darhol chiqib ligani zabt etadiganlardan emas. Xotirjam bo'ling, calma.

Rotatsiya tufayli o'yinchilarning xafa bo'lishi haqida:

O'yinchilar o'ynamagani uchun xafa bo'ladigan damlar bo'ladi, ammo bu xafagarchilikni ular o'zlari yengib o'tishlari kerak. Bu ko'plab o'ynashga loyiq futbolchilarga ega buyuk tarkibning to'lovi.

Mumkin bo'lgan qiyinchiliklar haqida:

Muammolar keladi, mag'lubiyatlar keladi, jarohatlar keladi, tanqidlaringiz o'rinli bo'ladi, muxlislarning hushtaklari keladi, yomon kunlar keladi. Bularning barchasi bo'lishini bilaman. Aynan o'sha paytda biz kuchli bo'lishimiz, kurashishda davom etishimiz va bu mavsumimizni barbod qilmasligi uchun harakat qilishimiz kerak.

«Malaga» murabbiyining so'zlari haqida:

«Malaga» murabbiyi aytgan gaplar izohimga loyiq emas.