Karim Benzema yozda «Lion»ga qaytishga tayyor bo'lgan

L'Equipe xabariga ko'ra, «Lion» muxlislarining aksariyati klub Karim Benzemaning maoshini ko'tara olmasligiga ishonishadi va ular haq. Biroq, yozda vaziyat butunlay boshqacha tus olishi mumkin edi.

Fransiyalik hujumchi, «Lion» va Madridning «Real» klubi afsonasi o'zini tarbiyalagan va hamon juda bog'langan klubga qaytishga tayyor edi. U «Lion»ga va o'zining tug'ilib o'sgan shahriga bo'lgan muhabbati tufayli hatto tekinga o'ynashga ham rozi bo'lgan.

«Lion» rahbariyati yozda haqiqatan ham uning nomzodini ko'rib chiqqan. Buni «Oltin to'p» sohibining yaqinlari ham tasdiqlashmoqda. 38 yoshli futbolchining o'zi bu imkoniyatni katta ishtiyoq bilan qabul qilgan, biroq o'sha paytda u «Al-Hilol» bilan shartnomasini bekor qilishga ulgurmagan edi.

Hozirda Benzema bir haftadan buyon erkin agent hisoblanadi. Saudiya Arabistonida u qo'lga kiritishi mumkin bo'lgan barcha sovrinlarni yutdi: chempionat, ikki kubok, shuningdek, liganing eng yaxshi o'yinchisi deb topildi. Shundan so'ng, u «Al-Hilol» bilan shartnomasining so'nggi yilini o'zaro kelishuvga ko'ra bekor qildi.

Biroq, Benzemaning boshqa majburiyati bor: u 2030-yilga qadar Saudiya chempionati elchisi hisoblanadi. Futbolchi ushbu kelishuv shartlarini bajarish niyatida va aynan shu narsa uning boshqa mamlakat klubiga o'tishiga to'sqinlik qilmoqda.

Benzema hamon o'zining tug'ilib o'sgan klubi va shahriga juda qattiq bog'langan. U har qanday imkoniyatda Lionga qaytadi. U o'sgan Bron tumanidagi binolardan birining devoriga uning ulkan surati tushirilgan.

O'tgan yilning dekabr oyida L’Équipe Benzemaning «Lion»ga qaytishi mumkinligi haqida so'ragan edi. O'shanda hujumchi bu variantni istisno qilgandek ko'ringandi:

«U yerga qaytishni istayman deyish qiyin, chunki men u yerda shunday go'zal xotiralar qoldirganman... Nima bo'lishini hech qachon bilmaysan. Gap qaytishdan qo'rqishda emas. Shunchaki, ba'zida hamma narsani o'z holicha qoldirgan ma'qul».

Agar mutlaqo kutilmagan burilish yuz bermasa, hammasi shu holicha qoladi. Benzema «Lion»ni 2009-yilda, Fransiyaning to'rt karra chempioni bo'lganidan so'ng tark etib, Madridning «Real» klubiga yo'l olgan edi.

Madridda u besh marta Chempionlar ligasi g'olibi bo'ldi va bolalikdan orzu qilgan «Oltin to'p»ni qo'lga kiritdi.