Lamin Yamal: Oltin to'p o'z qadrini yo'qotmoqda

Lamin Yamal: «Hozir Oltin to'pga munosabat butunlay o'zgargan. Messi va Krishtianu o'ynagan davrda hamma ularni dunyoning eng yaxshi ikki futbolchisi deb bilardi, shu bois sovrin ular o'rtasida taqsimlanardi. Hozirgi muammo shundaki, odamlar Oltin to'pga umuman aloqasi bo'lmagan narsalarni hisobga olishmoqda.

Masalan, qachonki PSJ futbolchisi yutishi kerak deyishsa, chunki klub Chempionlar ligasini yutgan. CHLni yutganingizda, sovrin eng yaxshi jamoa bo'lgan PSJga nasib etadi va bu klub uchun mukofotdir. Agar PSJda dunyoning eng yaxshi futbolchisi o'ynagan bo'lsa, bu boshqa masala: o'shanda mukofot unga nasib etishi kerak deb hisoblayman, tamom. Kimdir 80 ta gol urgani uchun emas, chunki 80 ta gol ursangiz, mavsumning eng yaxshi to'purari mukofotini olasiz. Bular odamlar tushunmaydigan butunlay boshqa narsalar.

Dunyoning eng yaxshi futbolchisi — bu televizor orqali sharhlovchi kabi kuzatadigan, o'yinni his qiladigan va uning o'yinidan zavqlanadigan futbolchi. Uni ko'rasiz va tushunasizki, u boshqalardan butunlay farq qiladigan o'yinchi. Qachonki bu yondashuv to'g'ri yo'lga qaytsa va mukofot eng yaxshi o'yinchiga nasib etsa... eng ko'p gol urgan yoki eng ko'p sovrin yutgan odamga emas, o'shanda sovrin o'zining avvalgi qadrini qaytarib oladi.

Men o'yinlarni boshidan oxirigacha, birinchi daqiqadan to to'qsoninchi daqiqagacha tomosha qiladigan davrda o'sganman. Men qaysidir o'yinchining hisobida nechta gol yoki golli uzatma borligini tekshirish uchun ilovaga kirmasdim. O'shanda hamma futboldan chin dildan zavqlanardi... Balki yigirmata gol urmagan bo'lsa ham, o'yinini ko'rish yoqimli bo'lgan hujumkor yarim himoyachilarni ko'rardik, masalan, menga juda yoqadigan Mesut O'zil kabi. O'ylaymanki, bugungi avlod qo'lida ilova bilan o'yinni tomosha qiladi va: «Lamin ikkita gol urdi yoki ikkita golli uzatma berdi, juda yaxshi o'yin o'tkazdi», deb aytadi. Ba'zida shunday lahzalar bo'ladiki — va menda ko'plab o'yinlarda shunday bo'lgan — men gol urmagan bo'lsam ham, ajoyib o'yin ko'rsatganimni his qilganman va shunga qaramay juda mamnun bo'lib uxlayman, chunki bilaman: futbol bu faqat gol urish emas, balki to'p darvozabondan o'yinga kiritilgan lahzadan boshlab butun o'yin jarayonidir.

Uyga kelaman va ba'zida jahlim chiqadi. Onam mendan gol urmaganim uchun xafa bo'lyapsanmi deb so'raydi, men esa unga hech qachon buning uchun jahlim chiqmasligini aytaman. Gol — bu shunchaki statistika. Men to'pga tegmasam yoki o'yindan zavq ololmasam xafa bo'laman... Bu meni eng ko'p muvozanatdan chiqaradigan narsa».