Morgan Rojers "Chelsi"ga o'tishi va Koul Palmer bilan hamkorligi haqida gapirdi

Morgan Rojersning Sky Sports nashriga bergan intervyusi. Asosiy qismlar:

"Chelsi"ga o'tish qarori haqida:

"Bu oson qaror emasdi. Jahon chempionati davom etayotgan vaqtda va umuman yoz davomida diqqatimni faqat futbolga qaratishni istadim. Yakuniy qarorni esa jamoada kimlar bo'lishi, vaziyat qanday tus olishi aniq bo'lgach va kerakli insonlar bilan gaplashib olganimdan so'ng qabul qildim. Men to'g'ri holatda ekanligimga va bunday qarorga tayyorligimga ishonch hosil qilishim muhim edi. Sekin-asta barchasi o'z o'rniga tushdi. Men Ris, Koul va murabbiy bilan gaplashdim – har bir suhbatim meni "Ha, bu meniki. O'ylaymanki, bu joy menga mos keladi" degan fikrda mustahkamladi."

Koul Palmer bilan bog'liqlik haqida:

"Odamlar "Ular qanday qilib birga o'ynashadi? Ularning barchasini maydonga qanday sig'dirish mumkin?" deb muhokama qilishayotganini ko'rdim. Ammo o'ylaymanki, men va Koulning sifatlari butunlay turlicha. U ko'proq uzatmalar va kombinatsiyalar orqali o'yinni bog'laydi. U xuddi rassom kabi. Men esa ancha to'g'ridan-to'g'ri o'ynaydigan, jismonan baquvvatroq va tez-tez oldinga intiladigan futbolchiman. Biz mutlaqo turlichamiz va aynan shuning uchun bir-birimizni yaxshi to'ldiramiz deb o'ylayman. Joau [Pedro] ham hozir ajoyib formada. O'tgan mavsumda qanday o'ynagani va mavsumoldi tayyorgarlikda qanday ko'rinayotgani barchaga ayon. Yana boshqa futbolchilar ham bor, ular haqida doim ham gapirilmaydi. Bu yerda sifat juda yuqori, yaxshi futbolchilar ko'p. Barchasi bilan ishlashni intiqlik bilan kutyapman. Men uning [Palmerning] o'yinini, u esa menikini 14 yoshimizdan beri bilamiz. Angliya terma jamoalarida birga o'ynaganmiz, shuning uchun o'zaro hamkorlikni va bir-birimizga eng yaxshi sifatlarimizni ko'rsatishda qanday yordam berishni juda yaxshi tushunamiz. Eng yaqin do'stlaringdan biri bilan o'ynaganingda sog'lom raqobat paydo bo'ladi, har kim boshqasidan o'zib ketishni istaydi va shu orqali uni oldinga undaydi. Ammo aniq chegara bor: jamoa va g'alaba doimo birinchi o'rinda. Biz uchun eng muhimi shu. Tashqaridan qaraganda bu qanday ishlashini tushunish qiyin bo'lishi mumkin, lekin biz buni tushunamiz. Biz buni allaqachon boshdan kechirganmiz. Bizni doim solishtirishadi va qarama-qarshi qo'yishadi, avvalgidek. Ammo endi biz bitta jamoada o'ynayapmiz. Asosiysi – g'alaba qozonish va bir-birimizga maksimal darajada yordam berish. O'ylaymanki, aynan shunday bo'ladi."

Dominant uslubga moslashish haqida:

"Moslashishimga to'g'ri keladi. "Aston Villa" uslubi va Unai yondashuvi ko'p jihatdan futbolchilarning kuchli tomonlariga qurilgandi. U ularni ochib berish ustasi. Bizda men, Jon Makginn, Olli [Uotkins] bor edik – biz qarshi hujumlarda, bo'sh zonalarda va vertikalroq o'ynashni yoqtirardik. Kuchimiz shunda edi. Bu yerda esa biroz boshqacha. "Chelsi"da, nazarimda, texnikasi kuchli futbolchilar, birga-bir vaziyatlarda kuchli vingerlar, aqlli "o'nliklar", to'pni qabul qilib, o'yinni boshqarishni istaydigan yarim himoyachilar ko'proq. Markaziy himoyachilarga ham bu tegishli. Men o'rganishim, moslashishim va bunga ko'nikishim kerak. Sabrliroq bo'lish, to'pni qabul qilish imkoniyatini kutish kerak bo'ladi. Ba'zi o'yinlarda bo'sh zonalar ancha kam bo'ladi, shuning uchun kuchli tomonlarimdan foydalanishning boshqa yo'llarini topishga to'g'ri keladi. Bu borada vaziyat Angliya terma jamoasiga o'xshash. U yerda ham biz to'pga ko'p egalik qilamiz va vaziyatga qarab o'yinimni o'zgartirishimga to'g'ri keladi. Futbolchining rivojlanishi aynan shunda – doimiy o'rganish kerak. Men har qanday raqibga qarshi o'ynay oladigan va himoyalanish usulidan qat'i nazar, yechim topa oladigan universal futbolchi bo'lishni istayman."