The Athletic muxbiri Beren Krossning xabariga ko'ra, «Lids» ukrainalik vinger Mixail Mudrikni ijaraga olishga tayyor. «Elland Roud»da muzokaralar davom etmoqda, biroq klub «Chelsi»ning shartlariga ko'r-ko'rona rozi bo'lmoqchi emas.
The Athletic yozishicha, «Chelsi» norasmiy tarzda muzokaralar yakunlanganini bildirmoqda. «Ko'klar» Mudrik uchun o'yin amaliyotini kafolatlashni maqsad qilgan va «Stamford Brij»da uni «Strasbur»ga ijaraga berish ustuvor variant deb hisoblanmoqda.
Mixail Mudrik Fransiyaga borishni qat'iyan istamayapti. Uning xohishi — APLda qolish. Futbolchining vakillari «Elland Roud»ni ideal variant deb bilishmoqda. «Lids» bu mavsumda jon saqlash uchun kurashmasligi kerak, Daniel Farke taklif etayotgan uslub esa 25 yoshli vingerga mos keladi.
The Athletic ma'lumotiga ko'ra, «Lids» Mudrikni bir necha sabablarga ko'ra o'z safiga qo'shib olmoqchi. Birinchidan, bu yuqori salohiyatga ega futbolchini tarkibga jalb qilish imkoniyati. Ikkinchidan, ukrainalik futbolchining profili «Yunayted» talablariga mos keladi. Klub «chap o'nlik» pozitsiyasiga o'yinchi qidirmoqda, uning tezligi va to'p bilan ishlash qobiliyati jamoaga yordam berishi kutilmoqda.
The Athletic xabariga ko'ra, «Lids» tibbiy shtabi Mixailning sport formasini tezda tiklashga ishonch bildirmoqda. Shuningdek, Daniel Farke Mudrikka asosiy tarkibdan joy kafolatlanmasligini, uni o'z mehnati bilan qozonishi kerakligini ma'lum qilgan.
Izohlar (0)
Izoh qoldirish uchun tizimga kiring.
Hozircha izoh yo'q. Birinchi bo'lib fikr bildiring!