Ruben Klyuyvert "Kristal Pelas"ga o'tishi mumkin

L'Equipe xabariga ko'ra, Ruben Klyuyvert shanba oqshomida "Lion"ning "Gavrr"ga qarshi o'yin qaydnomasiga kiritilmadi va buning sababi bor: niderlandiyalik himoyachi yaqin kunlarda "Kristal Pelas"ga o'tishi mumkin.

Bir necha haftalik aloqalardan so'ng, ekvadorlik Joel Ordonyes Londonda tibbiy ko'rikdan o'ta olmagach, muzokaralar juma kuni tezlashdi. Shundan so'ng, ingliz klubi e'tiborini "Lion"ning 25 yoshli himoyachisiga qaratdi. Uning vakillari futbolchini Chempionlar ligasi 3-saralash bosqichi doirasidagi Praga "Sparta"siga qarshi javob o'yinida (3:0) kuzatish uchun Lionga tashrif buyurishgan edi.

Klyuyvert o'tgan yili yozda "Lion" tomonidan Portugaliyaning "Kaza Pia" klubidan 3,78 million yevro evaziga xarid qilingan edi. Niderlandiyalik futbolchining shartnomasi 2030-yilning iyuniga qadar mo'ljallangan. O'zining ta'sirchan jismoniy va atletik sifatlari tufayli u Lionda o'z salohiyatini namoyish etdi va endi klub moliyaviy jihatdan juda foydali bitimni amalga oshirishi mumkin.

Hozircha "Kristal Pelas" rasmiy taklif bilan chiqmagan, biroq ingliz klubi Klyuyvert uchun taxminan 20 million yevro taklif qilishi mumkin. Agar tomonlar dam olish kunlari o'z pozitsiyalarini yaqinlashtirsa, futbolchi tez orada Londonga yo'l olishi mumkin.

Transfer amalga oshgan taqdirda, "Lion" futbolchi qiymatining o'sishidan tushgan mablag'ning 15 foizini Portugaliyaning "Kaza Pia" klubiga to'lab berishi kerak bo'ladi. Agar o'tish 20 million yevroga amalga oshsa, bu to'lov taxminan 2,5 million yevroni tashkil qiladi.

"Kristal Pelas"dan tashqari, so'nggi soatlarda Klyuyvertga yana bir Premer-liga klubi va bitta Yevropa klubi qiziqish bildirmoqda.

Shu tariqa, "Lion" Chempionlar ligasidan chiqib ketganidan so'ng, Klyuyvertning 20 million yevro atrofidagi summasiga sotilishi xarajatlarni qisqartirishga va futbolchilarni sotishga majbur bo'lgan klub uchun navbatdagi muhim daromad manbai bo'lishi mumkin.