Yan Diomande: «Real Madrid» bosimi ostida emasman»

Yan Diomande: «Men bosimni his qilmayapman, garchi «Madrid» menga katta mablag' sarflagan bo'lsa ham»

«Qirollik klubi» vingerining intervyusi

«Real Madrid» men bilan bog'langanda, bunga ishona olmadim. Hatto uxlolmadim. «Real Madrid» — dunyoning eng katta klubi. «Real Madrid»ga o'tganimdan juda faxrlanaman va baxtliman. Agar kimdir 14 oy oldin menga «Madrid»ga o'tasan desa, ishongan bo'larmidim? Albatta.

Garchi transferim «Madrid»ga katta mablag'ga tushgan bo'lsa ham, men bosimni his qilmayapman. Nega qo'rqishim kerak?! Agar klub menga ko'p pul sarflagan bo'lsa, demak, «Madrid» menga ishonadi. Qo'limdan kelganini qilaman. Men hech narsadan qo'rqmayman.

«Madrid» muxlislariga murojaatim? Uyalyapman (kuladi). «Madrid» uchun bor kuchimni beraman, chunki klub meni sotib olish uchun katta mablag' sarfladi.

Mourinyu qo'l ostida o'ynaganingizda, u uchun o'lishga tayyor bo'lasiz. Shuning uchun men Joze uchun haqiqatdan ham o'lishga tayyorman. Bir necha kun oldin Drogba bilan gaplashdim. U menga shunday dedi: «Ehtiyot bo'l. Mourinyu — mening otamdek. U yaxshi inson, lekin senga ko'p ishlashga to'g'ri keladi».

Mourinyu bilan birinchi marta gaplashganimda hayron qoldim, chunki u fransuz tilida gaplashdi. O'ylashimcha, u o'sha paytda Portugaliyada bo'lgani uchun men bilan gaplashish maqsadida tonggi soat beshlarda uyg'ongan. O'shanda Joze uchun muhimligimni tushundim. «Madrid» siz bilan bog'lansa, «yo'q» deya olmaysiz.

Mourinyu juda kuchli xarakterga ega va bu biz [futbolchilar] uchun yaxshi, chunki ba'zida yosh futbolchilar xafa bo'lib, diqqatini yo'qotib qo'yishadi. O'ylashimcha, Joze — rivojlanishda davom etishim uchun munosib murabbiy.

Professional futboldagi debyut o'yinimdan [o'sha o'yin «Madrid»ga qarshi bo'lgan] nimani eslayman? Mbappe bilan futbolka almashganimizni (kuladi). Endi esa u bilan bir jamoada o'ynayapmiz va kiyinish xonasida birga kulamiz. Bu aqldan ozish!

Ronaldu — mening kumirim. Mashg'ulotga ketayotganimda uning suratlariga qarayman va ular hamma narsani aytib turadi: Krishtianuning yurishi, uning aurasi... Kumirim o'ynagan klubda to'p surayotganimdan faxrlanaman.

JCH-2026 oldidan kichik singlimga [15 yoshida vafot etgan] yozgan xatim? U meni hech qachon taslim bo'lmaslikka undagan. Ilgari ko'p narsalar haqida gaplashganmiz. Men hissiyotga beriladigan inson emasman, lekin bu o'z hikoyamni dunyo bilan bo'lishish uchun yaxshi lahza edi.

U meni hech qachon taslim bo'lmaslikka, tinimsiz ishlashda davom etishga va orzularimni ro'yobga chiqarishga undaydi. Agar barchasiga erishsam, u baxtli bo'ladi.