The Athletic (Jeyms Maknikolas) xabariga ko'ra, Maylz Lyuis-Skelli «Arsenal»da qolishga va asosiy tarkibdan joy olishga intilmoqda. U klubdan ketishni rejalashtirmayapti. Shuningdek, Martinelli «Galatasaroy»dan tushgan 45 million yevrolik taklifga qaramay, Turkiya klubiga o'tishdan manfaatdor emas.
The Athletic ma'lumotiga ko'ra, «Arsenal» va «Galatasaroy» bir nechta o'yinchi bo'yicha muloqot olib borgan, biroq Viktor Osimxen transferi bo'yicha hozircha faol muzokaralar yo'q.
«Arsenal» yozgi transfer oynasi yopilgunga qadar himoyachi va hujumchi sotib olishni maqsad qilgan. Ezri Konsa mudofaa chizig'ini kuchaytirish uchun asosiy nomzod bo'lib qolmoqda, biroq klub «Aston Villa»ning 60 million funt sterlinglik talabini pasaytirishga umid qilmoqda. Shuningdek, «Bayer» himoyachisi Jarrell Kuansa ham kuzatuv ostida, ammo leverkuzenliklar uni sotish niyatida emas. «Atletiko» himoyachisi Mark Pubil ham «Arsenal» qiziqish doirasiga tushgan, lekin ispan klubi 23 yoshli futbolchini saqlab qolmoqchi.
Hujum chizig'ida «Arsenal» chap qanotga e'tibor qaratmoqda. Klubning uzoq muddatli maqsadlari qatorida Kenan Yildiz va Xulian Alvares bor. Bundan tashqari, «Blekbern Rovers»ning 18 yoshli hujumchisi Igor Tayjonni qo'lga kiritish bo'yicha urinishlar davom etmoqda, biroq «Blekbern» futbolchini sotishdan bosh tortmoqda.
Tarkibdan ketishi mumkin bo'lgan o'yinchilarga kelsak, Fabiu Vieyra va Ris Nelson mos ravishda «Gamburg» va «Vest Xem» qiziqishlari ostida. Shuningdek, Itan Nvanerining kelajagi ham muhokama qilinmoqda: klub uning iqtidorini tan olsa-da, raqobat yuqoriligi sababli uning ketishi moliyaviy jihatdan foydali bo'lishi mumkin.
Izohlar (0)
Izoh qoldirish uchun tizimga kiring.
Hozircha izoh yo'q. Birinchi bo'lib fikr bildiring!