📰 Marca | Mourinyu o'tgan «El-Klasiko» uchun maxsus taktik reja tayyorladi. U dunyodagi eng kuchli hujumlardan birini to'xtatish uchun shunchaki «avtobus qo'yish» yetarli emas deb hisobladi.
«Madrid» ustozi rejasi jamoani kerak bo'lganda bosimga bardosh bera oladigan, «Barselona»ning yuqori pressingini imkon qadar tezroq yorib o'tadigan va kataloniyaliklar himoyasi ortidagi bo'sh zonalarga shiddatli hujum uyushtira oladigan holatga keltirishdan iborat edi.
Mourinyu shuni tushunardiki: agar jamoa juda chuqur himoyaga yotsa, uzoq vaqt himoyalanishga majbur bo'ladi va «Barselona»ning yuqori pressingidan chiqib ketish juda qiyin bo'ladi. Buning o'rniga portugaliyalik mutaxassis «qaymoqranglilar» futbolchilari to'p bilan muomalada qo'rqmasliklarini, uzatmalar uchun variantlar izlashlarini va hatto raqib bosimi ostida ham o'yinni qisqa paslar bilan qurishdan voz kechmasliklarini istadi.
Aynan shu sababli Mourinyu Bernardo'ni asosiy tarkibda maydonga tushirishga qaror qildi. Uning vazifasi to'p nazoratini ta'minlash va jamoaga pressingning birinchi chizig'ini yorib o'tishda yordam berish edi.
Mourinyu g'oyasining mohiyati «Barselona» futbolchilarini yuqori pressingga tortish, ularning himoyasidagi harakatlarda ikkilanish uyg'otish va hujumda bo'sh turgan o'yinchini topishdan iborat edi.
Bundan tashqari, «Madrid» murabbiyi «El-Klasiko» arafasida psixologik tayyorgarlikni ham asosiy ustuvorliklardan biriga aylantirdi. «Madrid»ning klub bazasida butun hafta davomida o'ta raqobatbardosh muhit hukm surdi. Mashg'ulotlar yuqori intensivlikda o'tdi, har bir to'p uchun xuddi oxirgi imkoniyatdek kurashildi.
Har bir o'yinchining o'z vazifasi bor edi va har kim buning uchun javobgarlikni his qilishi kerak edi. Mourinyu o'z shogirdlariga «Barselona» ustidan g'alaba qozonish uchun ikki narsa zarurligini uqtirmoqchi edi: taktik intizom va musobaqa ruhi — jasoratni yo'qotmagan holda hujumga o'tish va qiyinchiliklarga chidash qobiliyati.
Izohlar (0)
Izoh qoldirish uchun tizimga kiring.
Hozircha izoh yo'q. Birinchi bo'lib fikr bildiring!