The Athletic: Maylz Lyuis-Skelli «Arsenal»dagi moliyaviy muammolar qurboni bo'lishi mumkin edi

🚨 The Athletic xabariga ko'ra, Maylz Lyuis-Skelli vahima ichida amalga oshirilgan transfer qurboni bo'lishi mumkin edi. Nashr ushbu mikro-saga aynan klub tomonidan boshlanganini yana bir bor tasdiqladi.

Transfer oynasining so'nggi bosqichida Andrea Berta va «Arsenal» jiddiy bosim ostida qolishdi — klub futbolchilarni sotishi kerak edi. «Arsenal» yozni ambitsiyali sotuv rejasi bilan boshlagandi, biroq bir nechta yirik bitimlar barbod bo'lgach, klub potensial ketishi mumkin bo'lgan futbolchilar ro'yxatini kengaytirdi. Asosiy e'tibor maksimal foyda keltirishi mumkin bo'lgan o'yinchilarga qaratildi.

Bir nechta manbalarning The Athletic nashriga ma'lum qilishicha, sezilarli darajadagi sotuvlarsiz «Arsenal» UEFAning tarkib xarajatlari koeffitsiyenti (SCR) qoidalarini buzish xavfi ostida qolishi mumkin edi. Bundan tashqari, klub UEFAning moliyaviy zarar miqdorini cheklovchi qoidalariga ham amal qilishi shart.

So'nggi uch mavsumda «Arsenal» yangi futbolchilar uchun 600 million funtdan ortiq mablag' sarfladi, sof xarajatlar esa qariyb 400 million funtni tashkil etadi — hatto klub uchun rekord darajadagi Gabriel Martinelli sotuvi kutilayotgan bo'lsa ham. Klub daromadlari sezilarli darajada oshgan bo'lsa-da, bir vaqtning o'zida transfer xarajatlari, maoshlar fondi va operatsion xarajatlar ham o'sib, 2024/25-yilgi mavsumda 200 million funtdan oshdi. «Arsenal»ning o'zi UEFA moliyaviy qoidalarini buzish xavfi bo'lganini rad etadi. Shu bilan birga, klubning moliyaviy holatini tashqaridan aniq baholash deyarli imkonsiz, chunki buning uchun zarur bo'lgan ko'rsatkichlar yetarlicha batafsil e'lon qilinmaydi. «Arsenal» o'z moliyaviy chegaralariga yaqinlashgani haqidagi gap-so'zlarga qaramay, klub Vinisius Junior yoki Xulian Alvares uchun ulkan mablag' sarflashga tayyor ko'ringandi. Bu shuni anglatishi mumkinki, haqiqatan ham kerakli futbolchi uchun «Arsenal» ruxsat etilgan chegaraga yanada yaqinroq borishga tayyor bo'lgan. Bir narsa aniq: «Arsenal» daromadlarining ulkan o'sishi xarajatlarning ham shunchalik tez o'sishi bilan birga kechdi — ham yuqori darajada raqobatlashish zarurati, ham erishilgan sport yutuqlari tufayli. Aynan shu fonda vositachi Maylz Lyuis-Skellini «Manchester Yunayted» va «Chelsi»ga taklif qildi. Bu ma'lumot jamoa ichida shok holatini, muxlislar orasida esa yanada kuchliroq reaksiyani keltirib chiqardi.

Biroq «Arsenal» klub Lyuis-Skellini boshqa jamoalarga to'g'ridan-to'g'ri taklif qilmaganini ta'kidlamoqda. Shu bilan birga, «Manchester Yunayted» va «Chelsi»dagi manbalar futbolchi haqiqatan ham ularga taklif qilinganini da'vo qilishmoqda.

«Yunayted» 19 yoshli futbolchiga jiddiy qiziqish bildirdi va mos summa evaziga «Arsenal» uni sotishni ko'rib chiqishi mumkin deb hisobladi. Biroq Lyuis-Skellining o'z pozitsiyasi har doim aniq edi: u yoshligidan muxlislik qilgan klubida o'z o'rnini topmoqchi edi. U «Arsenal»dan ketishni niyat qilmagan va «Emireyts»dan transfer bo'yicha hech qanday variantni ko'rib chiqmagan.