Uesli Fofana: "O'tgan mavsumdagi muammolar uchun o'zimiz javobgarmiz"

The Athletic nashriga bergan intervyusida Uesli Fofana 2022-yilgi yozgi transferlar oynasidan qolgan yagona futbolchi ekanligi haqida gapirdi:

Yaxshi statistika. Koluill akademiyadan, lekin ha, Kuku ketganidan keyin men oxirgisi bo'lib qoldim. Bunda hech qanday sir yo'q. Har kim o'z qarorini qabul qildi. Men klubda anchadan beri yuribman, hech qanday muammo yo'q, o'zimni qari his qilmayapman. O'zimni yaxshi his qilyapman. Bu futbol: kimdir keladi, kimdir ketadi.

O'ziga bildirilayotgan tanqidlar haqida:

Futbolda shunaqa holatlar bo'lib turadi. Klub men uchun juda katta pul to'lagan, men o'z pozitsiyamda eng yaxshisi bo'lish va jamoaga yordam berish ambitsiyalari bilan kelganman. Shuning uchun ishlar yomon ketganda, tanqidni qabul qilishga tayyorman. Ko'pincha zaxirada qolib kulib o'tirganimda, bunda hech qanday g'ayritabiiy narsa yo'q. Odamlar bundan katta shov-shuv yasashga urinishadi. Men uchun eng muhimi, klub va jamoadoshlarim mening kayfiyatimni bilishadi. Zaxirada qolamanmi yoki maydonga tushamanmi, baribir g'alaba qozonishni istayman va har bir o'yinda bor kuchimni berishga harakat qilaman.

Ijtimoiy tarmoqlardagi irqchilik xabarlari xususida:

Bunday xabarlarni olganingizda, albatta, bu ta'sir qiladi. Men va boshqa futbolchilar uchun odamlar nimalar yozayotganini ko'rsatish juda muhim. O'ylaymanki, bu haqda gapirishda davom etishimiz kerak. Odamlarga nima uchun bu yo'l qo'yilmasligi kerakligini tushuntirish zarur. Ijtimoiy tarmoqlar uchun javobgar shaxslar ham bu muammo ustida ishlashi kerak. Gap faqat futbol haqida ketmayapti. Dunyoda umuman shunday muammo bor, odamlarga istalgan narsani yozish juda oson. Ba'zida xabar olaman va hatto bu odam irqchi deb o'ylamayman. U natijadan norozi bo'lgani uchun menga maymun rasmlarini yuboradi. Lekin keyingi o'yinda gol ursam, o'sha odam meni qo'llab-quvvatlaydi. Odamlarga bunday gapirish mumkin emasligini tushuntirish kerak. Nega bu haqda ochiq gapiryapman? Yosh futbolchilar ham shunday xabarlarni olayotganini ko'ryapman, lekin ular e'tiborni tortmaslik yoki o'zlarini himoyasiz his qilmaslik uchun hech narsa deyishmayapti. Ba'zilarga bu yoqmasligini bilaman, lekin bu haqda gapirishim kerak deb hisoblayman. Kimdir "Uesli doim shu haqda gapiradi" desa, parvo qilmayman. Shunchaki xarakterim shunaqa. Menga bu unchalik kuchli ta'sir qilmaydi. Shunchaki javobgarlikni his qilaman.

O'tgan mavsumdagi muammolar haqida:

Mavsum davomida ko'p o'zgarishlar bo'ldi. Albatta, buni bahona sifatida ishlatish mumkin, lekin o'ylaymanki, gap birinchi navbatda futbolchilarda. Biz har doim ham bor kuchimizni bermadik, alohida o'yinlarda muvaffaqiyatsizlikka uchradik, kerakli darajani ko'rsata olmadik – ko'p narsa noto'g'ri ketdi. O'tgan mavsumda nima noto'g'ri bo'lganini hamma tushunib turibdi. Har kim o'ziga ko'zgu oldida nazar tashladi.