#Andreas Shiker — yangiliklari

«Hoffenxaym» Daniya terma jamoasi futbolchisi Adam Dagimni o'z safiga qo'shib olganini rasman e'lon qildi. 20 yoshli o'yinchi «Red Bull Zalsburg»dan transfer qilindi va klub bilan 2031-yilga qadar mo'ljallangan uzoq muddatli shartnoma imzoladi. OAV xabarlariga ko'ra, klub vinger uchun 13–14 million yevro atrofida tovon puli va bonuslar to'lagan.

Dagim chap oyoqda o'ynaydi va hujum chizig'ining bir nechta pozitsiyalarida harakat qila oladi.

Klub sport direktori Andreas Shiker shunday dedi:

«Adam — yosh va iqtidorli futbolchi. O'zining sifatlari va yuqori tezligi evaziga u ushbu pozitsiya uchun asosiy nomzodimiz edi. Atigi 20 yoshda bo'lishiga qaramay, u katta rivojlanish salohiyatiga ega va ham klub darajasida, ham milliy terma jamoa safida xalqaro tajribaga ega. Qolaversa, o'tgan mavsumda u «Volfsburg» safida to'p surib, Bundesligada o'zini sinab ko'rgan».

Dagimning o'zi shunday deydi:

«Hoffenxaym»ga o'tganimdan juda xursandman. Bu klub yosh o'yinchilarga rivojlanish uchun qanday imkoniyatlar taqdim etishini bilaman. Shu bois ongli ravishda TSGni tanladim va imkon qadar tezroq jamoaning bir qismiga aylanishni intiqlik bilan kutyapman. Birgalikda muvaffaqiyatga erishish uchun bor kuchimni ishga solaman».

Hujumchining bo'yi 189 sm. U «Kopengagen» va «Orxus» akademiyalari tarbiyalanuvchisi hisoblanadi.

2023-yil yozida Dagim «Red Bull Zalsburg»ga o'tdi, shundan so'ng bir mavsumga «Lifering»ga ijaraga berildi. 2024/25-yilgi mavsumda u «Red Bull Zalsburg» safida 47 ta o'yin o'tkazdi: 29 tasi Avstriya chempionatida, 11 tasi Chempionlar ligasida (saralash bosqichini qo'shganda), 4 tasi Avstriya kubogida va 3 tasi FIFA klublar o'rtasidagi jahon chempionatida. U 6 ta gol va 5 ta golli uzatmaga mualliflik qilgan.

O'tgan mavsumni daniyalik futbolchi «Volfsburg»da ijara asosida o'tkazib, 30 ta rasmiy o'yinda maydonga tushdi (2 ta gol, 3 ta assist).

2026-yil iyun oyi boshida Dagim Daniya milliy terma jamoasida debyut qildi. DR Kongo terma jamoasiga qarshi o'rtoqlik uchrashuvida (0:0) u 90 daqiqa davomida maydonda bo'ldi. Bungacha Kopengagenlik futbolchi Daniyaning o'smirlar va yoshlar terma jamoalarida 17 ta o'yin o'tkazgan.

🚨 Rasman: yozgi transfer oynasining so'nggi sagasi yakunlandi!

✅ Fisnik Asllani "Hoffenheim"da qoladi.

Hujumchimiz boshqa klubga o'tmaydi. So'nggi vaqtlarda "Hoffenheim" va "RB Leipzig" 23 yoshli forvardning transferi borasida muzokaralar olib borayotgan edi. Biroq, "RB Leipzig"da yuzaga kelgan tibbiy xavotirlar sababli kelishuv amalga oshmaydigan bo'ldi.

📊 Berlinlik futbolchi o'tgan mavsumda "Hoffenheim" tarkibida asosiy figuralardan biriga aylandi va barcha musobaqalarda 35 ta o'yinda 21 ta samarali harakat (11 ta gol va 10 ta assist) qayd etdi. U klubning Bundesligadagi eng yaxshi mavsumlaridan birini o'tkazishiga katta hissa qo'shdi.

🗣 Boshqaruvchi direktor Andreas Shiker vaziyatga izoh berdi:

Fisnik "Hoffenheim"da ta'sirli o'sishga erishdi. Bu transferning amalga oshmagani sport nuqtai nazaridan biz uchun yomon yangilik emas. Fisnik ham jismoniy, ham o'yin jihatidan yuqori darajani namoyish eta olishiga ishonchimiz komil. Biz o'z futbolchimizni to'liq qo'llab-quvvatlaymiz. O'tgan mavsumda Fisnik muvaffaqiyatimizga ulkan hissa qo'shdi, mavsumoldi tayyorgarlikni odatdagi yuqori darajada o'tkazdi va kelasi haftadan yana jamoa bilan mashg'ulotlarga kirishadi.