The Athletic: «Chelsi» Mixail Mudrikning kelajagi borasida qaror qabul qiladi
The Athletic nashri «Chelsi» vingeri Mixail Mudrikning kelajagi va uning jamoa rejalaridagi o'rni haqida xabar berdi.
The Athletic nashri jurnalisti Liam Toumi «Chelsi»ning Mixail Mudrik bilan bog'liq rejalari va futbolchining istaklari haqida ma'lumot berdi:
Mudrikning futboldagi tanaffusdan keyingi asosiy maqsadi — imkon qadar ko'proq o'yin amaliyotiga ega bo'lish. Garchi hozircha o'yin raqamiga ega bo'lmasa-da, u shu haftaning o'zida uzoq tanaffusdan so'ng ilk bor «Chelsi» libosida maydonga tushishi mumkin.
Xabi Alonso va klub uchun hozirda eng muhimi — Mudrikni asosiy tarkib futbolchilari bilan birgalikdagi mashg'ulotlarda baholash. Shundan so'ng uning jamoadagi o'rni bo'yicha qaror qabul qilinadi.
Agar «Chelsi»da Mixail jamoaga Chempionlar ligasiga qaytish yo'lida yordam bera oladi deb hisoblashsa, u yana asosiy tarkibga integratsiya qilinadi.
Vingerning kelajagi borasidagi barcha variantlar ochiq qolmoqda. «Chelsi» tarkibida qolishdan tashqari, ijara va to'liq transfer masalalari ham ko'rib chiqilmoqda. Yakuniy qaror transfer oynasining so'nggi haftasida qabul qilinishi kutilmoqda.
Diskvalifikatsiya muddati tugaganidan so'ng, Mudrikka Angliya, Italiya, Germaniya va Ispaniyaning yetakchi klublari qiziqish bildirmoqda. Shu bilan birga, «Strasbur»ga ijara asosida o'tish varianti hozircha ko'rib chiqilmayapti.
Mudrikning o'zi uchun nafaqat muntazam o'yin amaliyoti, balki klub darajasi ham muhim omil hisoblanadi. Uning atrofidagilar himoyaviy uslubda o'ynaydigan va to'pga egalik qilish ko'rsatkichi past bo'lgan jamoaga o'tish uning kuchli tomonlarini ochib berishiga to'sqinlik qiladi deb hisoblashadi.
Mudrik va «Chelsi» o'rtasidagi munosabatlar futbolchining uzoq vaqt maydondan chetda qolgan davrida klub tomonidan ko'rsatilgan qo'llab-quvvatlash tufayli yanada mustahkamlandi. Futbolchi va uning vakillari faoliyatini davom ettirish uchun eng yaxshi variantni tanlash ustida klub rahbariyati bilan birgalikda ishlamoqda.
Mudrikning o'zi hali keyingi mavsumni qayerda o'tkazishini bilmaydi. Ammo endi u bir narsaga aniq ishonchi komil — u yana futbol o'ynay oladi.
