Massimo Marianella: «Kertis Jons — har tomonlama mukammal futbolchi»
Italiyalik jurnalist Massimo Marianella «Liverpul» yarim himoyachisi Kertis Jonsning o'yin uslubi va universalligi haqida gapirdi.
Ingliz futboli bo'yicha mutaxassis Massimo Marianella Kertis Jons haqida o'z fikrlari bilan o'rtoqlashdi:
Kertis Jons — bu «Inter» yoki boshqa istalgan jamoa yarim himoyasini to'ldirish uchun kerakli futbolchi. U shunday futbolchiki, uni deyarli sezmaysiz, chunki u ko'zga tashlanmaydi, lekin uning borligini his qilasiz. Chunki u hamma joydagi kamchiliklarni yopib chiqadi, u favqulodda universal o'yinchi.
«Liverpul»da u yarim himoyaning barcha uchta pozitsiyasida o'ynadi, shuningdek, hujumda chap qanot vingeri va hatto «Liverpul»da jarohatlar ko'paygan vaqtda o'ng qanot himoyachisi sifatida ham harakat qildi. Undan ko'ra mukammalroq futbolchini topish qiyin, u superyulduz emas, lekin yarim himoyani kuchaytirish uchun men har doim uni tanlagan bo'lardim.
