Enso Fernandesning «Chelsi»dagi faoliyati va xulq-atvori haqida fikrlar

Enso Fernandesning «Chelsi»dagi butun faoliyati davomidagi munosabatimni bilasiz.

«Benfika»dan ketish tarixi menga darrov yoqmagandi, bu haqda ko'p marta gapirganman. Ammo «Chelsi»dagi inqirozli davrning dastlabki olti oyida u meni o'ziga rom etgandi.

Keyin esa hammasi tuman ichidagi kabi kechdi. Ideal pozitsiyani doimiy izlash. Qayerga qo'ymang, baribir muammolar yuzaga chiqaverdi. U bir o'yinda gol urib, golli uzatma berishi, keyingisida esa 90 daqiqa davomida pozitsiyasini yo'qotishi mumkin edi. Lekin ijobiy ta'siri ko'proq bo'lgan. Jamoa va muxlislarni ham yaxshi ruhlantirardi.

Ammo uning «Chelsi»ning sobiq o'yinchilariga qarata qilgan hujumlari menga doim g'alati tuyulgan. Mauntni tanqid qildi, vaholanki o'zi «Benfika»dan ko'z yoshlari bilan ketgan – axir bu unga ishongan birinchi Yevropa klubi edi. O'zi shunday ishni boshqa klubda qilgan bo'lsa, boshqalarni qoralash g'alati.

Uning Kepaga qarata baqir-chaqiri-chi? Bu nima edi? Eslatib o'taman, Enso buni Liga kubogida «Arsenal» foydasiga 2:3 hisobi qayd etilayotgan paytda qilgandi. Siz yutqazayapsiz, nega keraksiz qiliqlar qilasiz?

«Benfika»da Enso gol urgach, qolishini ishora bilan ko'rsatgandi. Bir hafta o'tib esa ketib qoldi. Shu sababli sizlarga doim aytganman – uning muxlislar va «Chelsi» emblemasi bilan o'ynashishiga uchmang. Agar bir marta qilgan bo'lsa, buni yana takrorlamasligiga qanday kafolat bor? Mana, tasdig'i.

Liderlik sifatlari ham ba'zan zarariga ishladi. «PSJ»ga qarshi o'yinda Yorgensen bilan qanday asabiylashganini eslang. Ha, o'shanda hammamiz jahlimiz chiqqandi, lekin jamoadoshi, klub vitse-kapitani-ku? Hisob 2:3 bo'lib turganida asabiylashish yordam beradimi? Qiyin. Ko'rganimizdek, bu faqat yomonroq bo'ldi – 2:3 dan keyin yana ikkita gol o'tkazib yubordik. Bunda Enso aybdormi? Yo'q. Vaziyatni yaxshilashga hissa qo'sha olarmidi? Balki.

Fernandes – zamonaviy futbolning ko'zgusi. O'yinchilar klubga ishga keladi, yaxshiroq sharoit bo'lsa boshqasiga ketadi. Romantika deyarli qolmadi, buni allaqachon tushunish kerak. Ammo Ensoning obrazi yanada achinarli – u o'ynayotgan klubini juda yaxshi ko'rishini ko'rsatadi. Qiyin pallada esa uni tashlab, muhit quyoshliroq bo'lgan joyga ketish uchun.

Enso yaxshi o'yinchi. Yetarlicha yorqin lider. Lekin klubning joniga aylana olmadi. Masalan, Kaysedodan farqli o'laroq. Ularning xulq-atvoridagi farqni ko'rdingizmi? Biri ko'z-ko'z qilib sevishini ko'rsatadi, ikkinchisi esa – shov-shuvli intervyularda ko'rinmaydigan, kamtarin va mehnatkash.

Hatto klubdagi eng yaxshi davrlarida ham orqasida uning familiyasi yozilgan futbolka haqida o'ylab ko'rmaganman. Garchi o'yinchilarni doim tahlil qilsam-da, Fernandes meni o'ziga tortmagandi. Aloqani his qilmaganman, his-tuyg'ularida samimiylik sezmaganman. Ko'rinib turibdiki, bejiz emas ekan.