Mourinyu: "Madrid" La Ligada g'alaba qozonish uchun o'ynamoqda, "Kamp Nou"da emas.
"Qirollik klubi" ustozi o'yinidan keyingi matbuot anjumanining birinchi qismi.
"Ikkinchi bo'limda "Barselona" faolroq harakat qila boshladi, ammo biz xotirjamlik va sovuqqonlikni saqlab qoldik. Biz juda va juda muhim g'alabaga erishdik — ham natija, ham o'yin sifati bo'yicha. Kuchli raqibga qarshi ajoyib o'yin o'tkazdik.
Muhimi, aynan qanday g'alaba qozonganimizda. Bu g'alabaga to'liq loyiq edik. Juda yaxshi tarkibga egaman va barcha futbolchilar astoydil mehnat qilishmoqda. Bugun haqiqatan ham bunga loyiq bo'lgan jamoa g'alaba qozondi.
O'yinchilarim shunchaki ajoyib edi! Ular katta jasorat ko'rsatishdi, ayniqsa, juda intensiv va yuqori pressing qiladigan jamoa bosimi ostida mudofaadan chiqishda.
Hisobni 2:0 ko'rinishiga keltirish uchun ko'plab imkoniyatlarimiz bo'ldi. Va albatta, bunday vaziyatlardan foydalana olmaganingizda, "Barselona" hisobni tenglashtirishga urinib, oldinga o'ta boshlaydi. Yakunda ular bunga erishishdi. Ammo gol o'tkazib yuborganimizdan keyin ham sarosimaga tushmadik va konsentratsiyani yo'qotmadik".
"Hakamlikmi? Bosh hakam o'z ishini a'lo darajada bajardi deb hisoblayman, ammo VAR xonasidagilar ikkinchi bo'lim boshida uxlab qolishgan ko'rinadi: hakamni monitor oldiga chaqirishmadi, u yerda Kanselu Diomande oyog'ini bosib olgani uchun yaqqol qizil kartochka olishi kerak edi".
"Hech qachon o'zgarmas asosiy tarkibim bor deb aytmayman. Ixtiyorimda ulkan, nihoyatda iqtidorli jamoa bor. Har bir o'yinchi maydonga tushishga va o'z hissasini qo'shishga tayyor.
"Madrid"ning hozirgi tarkibi bilan ishlash — bu zavq. Jamoamda ajoyib futbolchilar jamlangan va hech qanday muammomiz yo'q. Kamroq amaliyot olayotgan o'yinchilar ko'proq o'ynayotganlarni qo'llab-quvvatlashadi. Ular o'rtasida ajoyib munosabatlar bor, bir-biriga ishonishadi va jamoa sifatida birlashgan. Ular bilan ishlashni yaxshi ko'raman!"
"Luninni qarang. Nega siz jurnalistlardan hech kim mendan uning "El-Klasiko"dagi o'yini haqida so'ramadi?! Agar bugun yutqazganimizda, birinchi savol shunday bo'lardi: "Kurtua yo'qligi va Lunin o'ynagani uchun yutqazdingizmi?". Lunin ajoyib edi.
Bizda dunyoning eng yaxshi darvozaboni Kurtua bor. Ammo bugun u o'ynamasligini bilganimizda, hech kim yig'lamadi. Luninning oldiga borib, shunday dedim: "Sen zaxirada o'tirish uchun emas, o'ynash uchun shug'ullanyapsan. Shunday ekan, chiq va o'yna".
"Valverde haqida alohida gapirishim kerak. Bugun u jarohat bilan o'ynadi. Jiddiy shikastlanishiga qaramay, 40 daqiqa maydonda harakat qildi. U maydonni tark etishdan bosh tortdi va imkoni boricha o'ynashda davom etdi".
"Men uchun Kamavinga — asosiy tarkib o'yinchisi. Muammo shundaki, ixtiyorimda asosiy tarkibga loyiq juda ko'p futbolchi bor, shuning uchun ularning ba'zilari zaxirada qolishga majbur. Zaxira o'rindig'iga qarayman va u yerda asosiy tarkibga loyiq o'yinchilarni ko'raman.
Kamavinga "Leyptsig"ga qarshi o'yinda ajoyib harakat qildi, bugun esa yana fantastik futbol namoyish etdi. U maydonga tushganidan keyin taktik rejamiz qanday edi? Kamavingaga Tchuameni chuqurroq o'ynab, mudofaa chizig'ini sug'urtalashini, uning vazifasi esa bo'sh zonalarga hujum qilish ekanligini aytdim.
Hujumchilar uchun "Barselona"ga qarshi bo'sh zonalarga chiqish juda qiyin. Yagona yechim — buning uchun yarim himoyachilardan foydalanish. Shuning uchun yuqori mudofaa chizig'ini yorib o'tish uchun Kamavinga va Bellingem kabi xavbeklardan foydalanish kerak. Va bugun bu ish berdi".
Izohlar (0)
Izoh qoldirish uchun tizimga kiring.
Hozircha izoh yo'q. Birinchi bo'lib fikr bildiring!