#Ayden Xeven — yangiliklari

🗣️ Ayden Xevenning onasi Liza o'g'lining jamoadoshlari bilan munosabati haqida gapirdi:

Uning Brunu bilan munosabatlarini ko'rish juda yoqimli. Tajribali futbolchilar unga haqiqatan ham ukasidek munosabatda bo'lishayotgani sezilib turibdi.

Ayniqsa, Maguayrning Ayden haqida qayg'urishi menga juda yoqadi. Maydonga tushishdan oldin, tunnelda turganimizda ham u doimo o'g'limga sekin nimalardir deb maslahat berib turadi.

Unga eslatadi: biz muhokama qilgan narsalarni unutma, bunga va bunga tayyor bo'l, mana bunday vaziyatlarga e'tibor ber — taxminan shunaqa gaplar.

Lyuk Shou ham Ayden uchun o'ziga xos katta akaga aylandi. Umuman olganda, himoyachilar unga bir xil munosabatda: u yosh yigit, shuning uchun biz yonida bo'lishimiz va yordam berishimiz kerak.

🗣️ "Manchester Yunayted" futbolchisi Ayden Xevenning onasi Liza Per Mertesacker bilan "Arsenal" akademiyasidagi bahsi o'g'lining faoliyatini belgilab berganini so'zlab berdi:

Per Mertesacker bilan o'sha suhbatni yaxshi eslayman. Biz bahslashardik: men unga: "U himoyachi emas", derdim. Per esa aynan himoyachi ekanligini ta'kidlardi.

Uning Per akademiyani boshqargan ilk mavsumidagi o'yinlaridan birini eslayman. Ayden to'pni darvoza chizig'idan qaytarganida, Perning ko'zlari yonib ketganini ko'rdim. O'zim esa: "Axir u himoyachi emas-ku, u gol urishi kerak", deb o'ylaganman. Chamasi, o'sha vaqtda Ayden "oltilik" yoki "sakkizlik" pozitsiyasida, haqiqiy box-to-box yarim himoyachisi sifatida o'ynardi. Ammo Per buni eshitishni ham istamasdi. U: "U ajoyib futbolchi, lekin himoyachi bo'lib yetishadi", derdi.

"Manchester Yunayted"ga o'tganimizda, Ayden markaziy himoyachi pozitsiyasida faqat bir to'liq mavsum o'tkazgandi. Ungacha u ko'proq tayanch yarim himoyachisi sifatida harakat qilgan. Shu bois ham unda to'p bilan ishlash, uni oldinga olib chiqish va ikkala oyoqda ham o'ynash qobiliyati shakllangan. U hali ham bu pozitsiyani o'zlashtirmoqda. Ammo aynan Per unda markaziy himoyachini birinchi bo'lib ko'ra olgan.