#Diego Milito — yangiliklari

DAZN nashriga bergan intervyusida Gian Piero Gasperini jamoaning mavsum starti va tarkibdagi o'zgarishlar haqida gapirdi:

«O'tgan yili biz qiyin safar o'yinlarida, masalan, Dortmundda 80 ming tomoshabin qarshisida ajoyib tajriba orttirdik. Jamoa o'ziga bo'lgan ishonch va xarakterni shakllantirmoqda. Paulo Dybala va Donyell Malenning barqaror o'yini boshqalarga ilhom bag'ishlamoqda. Hujum chizig'ida tanlov imkoniyatlarimiz boy», — dedi murabbiy.

Gasperini tarkibni kuchaytirish borasidagi ishlarga ham to'xtaldi:

«Biz tarkibni kengaytirish va raqobatbardoshlikni oshirish ustida ishladik. Himoyani kuchaytirdik, Marten de Ron yarim himoyani mustahkamlamoqda. Hujumga Rodrigo kabi yuqori saviyali futbolchini oldik, shuningdek, Santiago Kastrodan katta umidlarimiz bor. Hozir tarkib chuqurligi biroz yetishmayapti, ammo Lorenzo Pellegrini qaytmoqda va Devyne Rensch ham safga qaytishiga umid qilaman. Maqsadim — Evan Ndika kabi futbolchilar safdan chiqqanda, zaxiradan tushganlar jamoa saviyasini tushirmasligini ta'minlashdir».

Donyell Malen haqida gapirar ekan, murabbiy uni Diego Militoga qiyosladi:

«Men ko'plab ajoyib hujumchilarni boshqarganman, masalan, «Jenoa»da Milito bilan ishlaganman. Malen o'ziga xos futbolchi, u menga Militoni eslatadi. U to'pni nazorat qilish, darvozaga zarba berish va qisqa masofada tezlashib, himoyachilarni ortda qoldirish bo'yicha ajoyib qobiliyatlarga ega».

«Roma»ning chempionlik poygasidagi imkoniyatlari haqida so'ralganda, Gasperini shunday dedi:

«Muxlislar g'alabalardan xursand bo'lishga haqli. Skudetto haqida gapiradigan bo'lsak, «Inter» ustunlikka ega va ular oldinda bormoqda. Shuningdek, «Komo» kabi sezilarli darajada kuchaygan jamoalar bor. Biz esa o'z yo'limizga e'tibor qaratishimiz kerak».

«Inter» noyob do'stlar jamoasi edi va bu Mourinyuning xizmati, – deb ta'kidladi Uesli Sneyder o'z xotiralarida. – Samolyotga chiqayotganim yodimda. Oldingi qatorlarda – rahbariyat. Joze esa salonning oxirida, o'yinchilar bilan kulib o'tiribdi. Uning huzurida futbolchilar o'zlarini erkin his qilishardi.

U shunday derdi: «Sizlar odatdagidan biroz ko'proq erkinlik olasizlar, men esa evaziga ideal jamoaga ega bo'laman». O'yinlarda u bizdan maksimal darajada harakat talab qilardi, maydon tashqarisida esa mayda xatolarga – vino, sigaretaga ruxsat berardi… Joze – haqiqiy jentlmen. Barcha o'yinchilarning xotinlari va farzandlarining ismlarini bilardi. U bizni shunchaki maftun etib qo'ygandi.

Uning ko'rsatmalari odatda o'n daqiqa davom etardi, shundan so'ng biz shaxsiy raqibimizning o'yini yozilgan diskni olardik. Istisno tariqasida 2010-yilgi Chempionlar ligasi yarim finali doirasidagi «Barsa»ga qarshi o'yin oldidan so'zlagan nutqi bo'ldi – u qirq daqiqa davom etgan!

Joze bor kuchini sarflab, video, taktik tahlil va ovoz kuchidan foydalandi. U o'z chiqishini «Barsa»ning himoyadan hujumga o'tishdagi zaif tomonlariga va bizning o'zimizga bo'lgan ishonchimizga bag'ishladi.

Ko'rsatmalardan oldin biz «Barsa»dan o'tish juda qiyin deb o'ylardik, keyin esa finalga chiqishimizga ishondik. «San-Siro»dagi 3:1 hisobidagi g'alabadan va mening golimdan so'ng, «Kamp Nou»da bor-yo'g'i 66 daqiqa dosh bera oldim va o'rnimga Muntari tushdi. Kiyinish xonasiga borib hojatxona ustiga o'tirdim – shunchalik asabiylashgandim.

Mourinyu yakuniy g'alabamizdan so'ng aytgan ilk gap: «Endi biz final favoritimiz».

Barselonadagi o'yin – pley-offdagi ikkinchi va oxirgi uchrashuv bo'lib, unda Sneyder golsiz va assistsiz qolgan. 1/8 finalga «Inter» guruhda bor-yo'g'i ikkita g'alaba bilan kirib kelgan va ulardan birinchisi – Kiyevdagi (2:1) g'alaba Ueslining 1+1 natijasi evaziga qo'lga kiritilgan.

Keyin Eto’O uning uzatmasidan «Chelsi» darvozasiga gol urdi, Milito – SSKA va «Barsa»ga «San-Siro»da, Ueslining o'zi esa Valdesga gol urishdan oldin «Lujniki»da Akinfeev darvozasiga jarima zarbasidan gol kiritgan. Sneyder g'oliblik bilan yakunlangan Chempionlar ligasida «Inter»ning eng yaxshi to'purari nomini Milito bilan bo'lishib olgan: Ueslida 3+6, Diegoda 6+3.

«Real»ning zaxira maydonidagi mashg'ulotlar bilan boshlangan mavsum «Bernabeu»dagi Chempionlar ligasi finalidagi g'alaba bilan yakunlandi – Sneyderning Militoning ilk goliga qilgan assisti bilan.

15 yildan so'ng Uesli Ziggo Sport telekanali ekspertiga aylandi va 2025-yil kuzida shu sifatda «Ayaks» – «Benfika» o'yini oldidan Mourinyuni kutib oldi.

Joze semirib ketgan Sneyderning peshonasidan o'pdi va tushuntirdi: «Nega bunday qildim? Qo'ysangiz-chi, Uesli menga trebl va murabbiylik faoliyatimdagi eng yaxshi yilni sovg'a qilgan. Bu semiz odam – juda yoqimli».