#Forbes — yangiliklari

Chap ustun yangiliklari

O'ng ustun yangiliklari

Krishtianu Ronaldu sport tarixida 2 milliard dollar ishlab topgan ilk sportchiga aylandi

Krishtianu Ronaldu sport tarixida 2 milliard dollar ishlab topgan ilk sportchiga aylandi

Krishtianu Ronaldu o'z faoliyati davomida 2 milliard dollardan ortiq daromad olgan tarixdagi ilk faol sportchiga aylandi.

Krishtianu Ronaldu navbatdagi rekordni o'rnatdi – bu safar moliyaviy. Forbes hisob-kitoblariga ko'ra, u o'z faoliyati davomida 2 milliard dollardan ortiq daromad olgan tarixdagi ilk faol sportchiga aylandi.

O'tgan yili Bloomberg uni milliard dollar ishlab topgan ilk futbolchi deb ataganida, Krishtianu Pirs Morganga bu uning maqsadlaridan biri bo'lganini tan olgandi.

«Bu xuddi «Oltin to'p»ni yutishdek gap. Men shunday bo'lishini bilardim, tayyor edim. Bu vaqt masalasi edi», – degandi futbolchi.

Demak, Ronaldu pullarga xuddi sovrinlarga qaragandek qaraydi. Endi milliardlar ikki barobarga oshdi.

Faoliyatidagi umumiy daromad – 2.09 milliard dollar. Buning deyarli yarmini Saudiya Arabistoni taqdim etdi.

● Muhim: bu boylik emas, balki Ronaldu faoliyati davomida ishlab topgan barcha mablag' – maoshlar, bonuslar, homiylik va litsenziya daromadlari (soliqlar to'langunga qadar). Forbes uning umumiy boyligini taxminan 1.2 milliard dollar, Bloomberg esa 1.4 milliard dollar deb baholamoqda.

● Maydonda Ronaldu taxminan 1.39 milliard dollar ishlab topdi. «Sporting» va «MYu» taxminan 84 million, «Real» 351 million, «Yuventus» 195 million, «MYu»ga qaytishi esa 60 million dollar keltirdi.

● «Al-Nasr» esa uch yarim yil ichida taxminan 700 million dollar to'ladi. Bu «Real»dagi to'qqiz mavsumdagidan ikki barobar ko'p. 2025-yilda shartnoma yana ikki yilga uzaytirildi, Bloomberg ma'lumotiga ko'ra, klub aksiyalarining 15 foizini olish imkoniyati bilan.

● Maydon tashqarisida yana taxminan 690 million dollar. Asosiy homiy – Nike, 2003-yildan beri. 2016-yildan buyon Ronaldu bilan umrbod shartnoma imzolangan, u Bloomberg ma'lumotiga ko'ra yiliga taxminan 18 million dollar keltiradi. Faqat 2016-yilning o'zida uning postlari Nike'ga qariyb 500 million dollarlik reklama samaradorligini berdi.

● Ijtimoiy tarmoqlar – Ronalduning asosiy valyutasi: qariyb bir milliard obunachi, sayyoradagi eng katta auditoriya. Instagram'dagi bitta reklama posti taxminan 3.4 million dollar turadi – dunyoda birinchi o'rin. YouTube-kanal esa ilk million obunachini 90 daqiqada yig'di.

● CR7 brendi – bu butun boshli biznes tarmog'i: atirlar, ichki kiyimlar, soatlar, suv, fitnes-klublar va soch ko'chirish klinikalar. Eng yirik loyiha – Lissabon, Madrid, Nyu-York va Marrakeshdagi Pestana CR7 mehmonxonalari. 2027-yilda Parijda mehmonxona ochiladi.

● Eng kutilmagani: Ronaldu Portugaliyaning eng qadimiy chinni zavodi Vista Alegre'ning 10 foiziga egalik qiladi. Shuningdek, u fitnes-startap Whoop, sun'iy intellekt qidiruv tizimi Perplexity'da ulushlarga va Ispaniyaning «Almeriya» klubida 25 foiz aksiyaga ega.

● Saudiya Arabistoniga ko'chib o'tgunga qadar Ronaldu va Messi deyarli tengma-teng ketishayotgandi: 2011-yildan 2022-yilgacha farq bor-yo'g'i 8 million dollarni tashkil etgan. Hozir Messi 1.87 milliard dollar bilan reytingda uchinchi, ular orasida esa Tayger Vuds (1.97 milliard dollar) bor.

● Forbes prognoziga ko'ra, 2027-yilning may oyiga kelib Ronalduda 2.39 milliard dollar bo'ladi. Messi shu vaqtga kelib 2 milliard dollar bilan tarixda ikkinchi sportchiga aylanishi mumkin, ammo Krishtianuni quvib yetishi dargumon.

O'zining moliyaviy motivatsiyasini portugaliyalik futbolchi inson tabiati bilan izohlaydi.

«Biz insonmiz. Qo'limizda bor narsadan hech qachon qoniqmaymiz», – deydi u.

Ehtimol, ikki milliard dollarlik marrani bosib o'tib, Krishtianu baribir biroz qoniqish hosil qilgandir.

🤔 41 yoshda Ronalduda futbolchi orzu qiladigan hamma narsa bor, faqat bittasidan tashqari – bu yetarli degan hissiyot.