#Jeyden Danns — yangiliklari

Dominik King xabariga ko'ra, Jeyden Danns Yevropaning ko'plab klublari e'tiborini tortmoqda. Mazkur jamoalar futbolchini ijara asosida tarkibga qo'shib olish variantini ko'rib chiqishmoqda.

Shuningdek, jurnalist bugun yangi transferlar amalga oshirilishi rejalashtirilmaganini qo'shimcha qildi.

"Liverpul" shu paytga qadar APL doirasidagi birorta mavsumni tarkibida biror nafar skauzer (Liverpul shahri vakili) ishtirokisiz o'tkazmagan. Ayni damda jamoada faqatgina Kertis Jons mahalliy tarbiyalanuvchi hisoblanadi.

Jeyden Danns va Josh Eyb asosiy jamoada o'ynashga eng yaqin turgan yosh skauzerlar hisoblanadi. Biroq, ulardan biri jarohatlar sababli yana mavsumoldi tayyorgarligini o'tkazib yubordi, ikkinchisiga esa endigina 16 yosh to'ldi. Shu bois, "Liverpul" joriy mavsumda birorta ham skauzer maydonga tushmasligi ehtimoli juda yuqori.

*Gap 1992-yildagi islohotdan keyingi APL yoki butun tarix haqida ketayotgani noma'lum. Katta ehtimol bilan, birinchisi nazarda tutilgan.

Jek Lasbi xabariga ko'ra, Jeyden Danns hozircha "Liverpul"ning asosiy tarkibi bilan mavsumoldi tayyorgarligida ishtirok etmayapti. U avvalroq U21 jamoasi bilan mashg'ulotlarda qatnashgan bo'lsa-da, klubdagilar sentyabr oyida jarohat olgan son mushaklari tufayli futbolchini ehtiyot qilishmoqda.

Jeydenning jamoa bilan AQSHdagi turnega yo'l olishi hozircha noma'lum.

"Everton"ga qarshi derbi, hatto yoshlar darajasidagi mini-derbi bo'lsa ham, hech qachon zerikarli o'tmaydi.

Uchrashuvning so'nggi daqiqalarida hisob 1:1 bo'lib turgan pallada hakam jamoamiz U21 darvozaboni Xarvi Devisni maydondan chetlatdi. Barcha almashtirishlar allaqachon amalga oshirilganligi sababli, darvoza chizig'iga markaziy himoyachi Mor Talla Ndiaye o'tishiga to'g'ri keldi.

Biroq, ko'p o'tmay maydonda janjal yuzaga keldi va uning natijasiga ko'ra "Everton"ning bir futbolchisi ham qizil kartochka oldi. Shunday qilib, tarkiblar tenglashdi, ammo "Everton" darvozasida himoyachi emas, darvozabon qoldi.

Yakunda yoshlar o'rtasidagi Angliya chempionatining birinchi turida o'tli bahs durang bilan yakunlandi. Yoqimli jihatlardan biri — Jeyden Danns zaxiradan maydonga tushib, yarim soatdan ortiq vaqt o'ynadi.