#Amit Bxatiya — yangiliklari

Amit Bxatiya bergan intervyudan katta xulosalar chiqarishga hali erta. Ammo u aytgan so'zlar juda o'rinli va to'g'ri tanlangan. FSG va muxlislar tomonida biroz xushomad borligi seziladi, ammo bunday darajadagi klubga kirib kelayotganingizda, bu tabiiy hol, chunki maqsadingiz hamma yoqmasa ham, hech bo'lmaganda g'azabini keltirmaslikdir.

Uning ehtiyotkor pozitsiyasi yaqqol ko'zga tashlanadi:

biz bitim tasdiqlanmaguncha hech narsaga egalik qilmaymiz va FSG asosiy rahbar, biz esa qo'limizdan kelgancha yordam beramiz

Muxlislarga ham ko'p e'tibor qaratilgan, bu juda muhim va to'g'ri. Uni va butun konsorsiumni ishlariga qarab baholash kerakligi tushunarli, ammo Amit Liverpulga kelganidan juda xursand va ochiq ko'rindi. FSG klub yoki butun guruhning bir qismi bo'lishga kamdan-kam odamga ishonch bildirganini hisobga olsak, ularda biznes nuqtai nazaridan unga ishonish uchun barcha asoslar bor. Biz esa yaqin yillarda bularning barchasi qanchalik to'g'ri ekanligini amalda ko'ramiz.

Financial Times xabariga ko'ra, FSG «Liverpul»ning ozchilik ulushini sotish bo'yicha muzokaralar olib bormoqda.

Xaridor sifatida «KPR» egasi, britaniyalik-hindistonlik tadbirkor Amit Bxatiya boshchiligidagi investorlar konsorsiumi ishtirok etmoqda. Ularni dunyodagi eng yirik po'lat ishlab chiqaruvchi ArcelorMittal kompaniyasiga egalik qiluvchi mashhur Mittal sulolasi qo'llab-quvvatlamoqda.

Manbalarga ko'ra, investorlar guruhi taklif ustida ishlash uchun maslahatchilarni yollagan va FSG bilan faol muzokaralar olib bormoqda. Agar bitim muvaffaqiyatli yakunlansa, «Liverpul»ning qiymati 6 milliard dollardan (4,48 milliard funt) oshib ketadi, bu futbol tarixidagi eng yuqori summalardan biri bo'lishi mumkin.

FSG Financial Times nashriga muzokaralar ketayotganini tasdiqladi. Biroq, hali yakuniy kelishuvga erishilgani yo'q.

Amit Bhatiya «Liverpul» klubining hammuassisi sifatidagi ilk intervyusini berdi. Quyida uning fikrlari bilan tanishishingiz mumkin:

🛑 Amit, «Liverpul» futbol klubiga xush kelibsiz. Bu so'zlarni eshitish qanday tuyulmoqda?

Bu aqlbovar qilmas tuyg'u. Bu so'zlarni eshitganimda, hammasi haqiqatga o'xshamaydi. Shubhasiz, bu men uchun, oilam va hamkorlarimiz uchun g'ururli va muhim lahza. Biz dunyodagi eng buyuk futbol klubi — «Liverpul» haqida gapiryapmiz. Shu bois, uning bir qismi bo'lish — katta sharaf va imtiyoz.

Men ushbu klub bilan bog'liq bo'lgan barcha narsaning — uning tarixi, madaniyati, muxlislari, bosib o'tgan yo'li va egalari FSG'ning ashaddiy muxlisiman. Bu yerda hayratlanarli narsalar juda ko'p. Hozirgi bosqichda, barcha tartibga soluvchi organlarning ruxsatini kutayotgan bir paytda, FSG bizni shunday tarixiy va kult klubning bir qismi sifatida qabul qilishi — ko'pchilik orzu qiladigan narsa.

Shuningdek, bizga juda omad kulib boqdi: biz «Liverpul» egalari bilan yaqindan tanishib oldik. Jon Genri, Mayk Gordon, Tom Verner, Sem Kennedi kabi FSG vakillari, shuningdek, klub ichida Billi Xogan va Jen Bihem bilan muloqot qildik. Bu ajoyib klub, uni ajoyib insonlar boshqarmoqda. Biz ozchilik ulush egasi sifatida shunday yuksak axloqiy tamoyillarga ega insonlar bilan bir stolda o'tirish imkoniga ega bo'lishimiz mumkin. Men ularni sport olamidagi eng yaxshi egalar deb bilaman. Ular har doim klub manfaatini birinchi o'ringa qo'yishadi.

Shunday klubga aloqador bo'lish, bunday insonlar va rahbariyat bilan ishlash, klubning salohiyatini ko'rish faqat ijobiy his-tuyg'ular uyg'otadi. Men muxlislar oldidagi katta mas'uliyatni tushunaman — klub doimo oldinga qarab harakatlanishi kerak.

Ammo shuni ta'kidlash kerakki, klub baribir FSG egaligida qoladi; biz shunchaki ularning yonidan joy olgan ozchilik investorlarimiz. Barcha ruxsatnomalar olingandan so'ng, ular bilan bir stolda o'tirish imkoniyatiga ega bo'lganimizdan juda g'ururlanamiz va minnatdormiz.

The Guardian xabariga ko'ra, Jeff Bezos Amit Bxatiya boshchiligidagi konsorsiumga qo'shilish bo'yicha muzokaralar o'tkazgan. Ushbu guruh «Liverpul» aksiyalarining taxminan 30 foizini sotib olishni maqsad qilgan.

Guruh FSG'ga ulushni sotib olish uchun 1,35 milliard funt sterlinglik taklif bilan chiqqan va moliyalashtirishni ta'minlash uchun boshqa potensial investorlar bilan muzokaralarni davom ettirmoqda.

Bezos avvalroq NFL jamoalari — «Sietl Sixoks» va «Vashington Kommanders»ni sotib olish variantlarini ko'rib chiqqan, biroq bitimlar amalga oshmagan. Amazon asoschisi ilgari APL klublariga investitsiya kiritmagan, ammo muzokaralar jarayonidan xabardor manbalarning ta'kidlashicha, Bxatiya konsorsiumi bilan kelishuvga erishilsa, Bezos «Liverpul»dan ulush oladi.

Ma'lumotlarga ko'ra, Bxatiyaning «Liverpul» ulushini sotib olish bo'yicha taklifi klubni taxminan 4,5 milliard funt sterlingga baholamoqda. Bu «Manchester Yunayted»ning ikki yil avval Ratkliff tomonidan 25 foiz aksiyasi sotib olingan vaqtdagi bahosidan yuqoriroqdir.

Yangi investorlarni izlash davom etayotgan bo'lsa-da, Bxatiyani uning qaynotasi, boyligi 23 milliard funt sterlingga baholanadigan hindistonlik po'lat magnati Mittal moliyaviy jihatdan qo'llab-quvvatlayotgani aytilmoqda.

Sky xabariga ko'ra, Amit Bhatiya boshchiligidagi konsorsium «Liverpul» klubi aksiyalarining kamida 30 foizini sotib olishga tayyor va bu sarmoyadorlar guruhiga qo'shilish uchun Amazon asoschisi Jeff Bezosga taklif bilan chiqqan.

Muzokaralar dastlabki bosqichda turibdi, yakunda qancha ulush sotilishi hozircha noma'lum. Agar konsorsium haqiqatan ham klub aksiyalarining 30 foizini qo'lga kiritsa, bu ko'pchilik tomonidan kelajakda nazorat paketini to'liq sotib olish sari qo'yilgan qadam sifatida baholanishi mumkin, ammo hozircha bu haqda gap ketmayapti.

Klub aksiyalarining 100 foizi taxminan 4.5 milliard funt sterlingga baholanayotganini hisobga olsak, bu 1.35 milliard funt sterling miqdoridagi sarmoya bo'ladi — ozchilik ulush uchun bu juda katta mablag'.

"KPR" klubi Amit Bhatiya 18 yillik faoliyatidan so'ng klubdagi o'z ulushini sotgani va direktorlar kengashini tark etishini ma'lum qildi. Bunday qarorlar shunchaki qabul qilinmaydi, qolaversa, bu Angliyada klublarga egalik qilish qoidalariga rioya etish uchun zaruriy shart hisoblanadi.

Tushunish uchun: Bhatiya "Liverpul"dan ulush sotib olishni istayotgan investorlar guruhining asosiy vakili sifatida ko'rilmoqda, chunki u Angliyada klub boshqarish bo'yicha amaliy tajribaga ega. Mittal oilasi esa bitim doirasida asosiy ishtirokchi emas, balki shunchaki investorlardan biri sifatida namoyon bo'lmoqda.

Bhatiya bunday bitim uchun qanchalik mos nomzod ekanligini baholash uchun "KPR"ning ijtimoiy tarmoqlardagi izohlariga nazar tashlash kifoya — muxlislarning aksariyati uning klubdagi yillari uchun minnatdorchilik bildirmoqda.