Maykl Kerrik: «Progress alomatlari ko'zga tashlanmoqda»
Maykl Kerrik «Manchester Yunayted»ning o'yinlari, tarkibdagi o'zgarishlar va jamoaning kelajagi haqidagi savollarga javob berdi.
🗣️ Maykl Kerrik «Manchester Yunayted»ning bo'lajak o'yini oldidan o'tkazilgan matbuot anjumanida:
Ser Aleks Fergyuson va uning klubga kelganiga 40 yil to'lishi haqida:
«U haqida avval aytilmagan yana nima deyish mumkin? Bu haqiqatan ham nishonlashga arziydigan voqea. Shu hafta uning klubga kelganiga 40 yil to'ladi.
Uning «Manchester Yunayted»ga ko'rsatgan ta'siri va u yerda ishlagan vaqti davomida erishgan barcha yutuqlari shunchaki aqlbovar qilmas darajada.
O'ylaymanki, hozir biz u bilan men jamoada o'ynagan vaqtimizdagiga qaraganda hatto yaqinroqmiz».
«Roma» ustidan qozonilgan g'alaba haqida:
«Endi vazifamiz — oldinga qarab harakatlanish uchun ushbu g'alabadan foydalanish. Agar uni alohida voqea sifatida qaraydigan bo'lsak, bu fantastik oqshom bo'ldi.
Barchamiz uchun bu o'ziga xos bo'ldi, ammo biz hali hech narsaga erishganimiz yo'q. Bu bizga to'g'ri yo'nalishda harakatni davom ettirishga yordam berishi kerak bo'lgan lahzalardan biri xolos».
Jamoaning «Roma» va «Chelsi»ga qarshi o'yini haqida:
«Roma» bilan o'yinni qayta ko'rib chiqqanda, birinchi bo'lim unchalik yomon bo'lmaganini tushunasan.
O'zimizni himoyasiz qoldirgan epizodlar bo'ldi va bu xatolarni tuzatish kerak. Shu bilan birga, «Chelsi»ga qarshi birinchi bo'limni juda yaxshi o'tkazdik.
Shubhasiz, progress alomatlari allaqachon ko'zga tashlanmoqda. Endi bu ijobiy o'zgarishlarni rivojlantirish va oldinga qarab harakatlanish muhim».
Ser Aleks Fergyuson jamoa qurish uchun yetarlicha vaqt olgani haqida:
«Futbol o'zgardi. U doimo rivojlanib bormoqda va bu tabiiy jarayon. Biz zamonaviy voqelikni hisobga olishimiz va hozirgi mavjud sharoitlarda ishlashimiz kerak».
Jamoaning reaksiyasi va uning salohiyati haqida:
«Biz ijobiy reaksiya ko'rdik, ammo bu endi eyforiyaga berilamiz degani emas.
Futbolchilarimiz nimalarga qodirligini juda yaxshi bilaman. Muammo shundaki, so'nggi vaqtlarda biz o'z imkoniyatlarimizni maydonda juda kam namoyish etdik».
«Manchester Yunayted»ning avvalgi standartlarga qaytishi haqida:
«Jamoani bosqichma-bosqich qurish, vaziyatni real baholash va sodir bo'layotgan voqealarga to'g'ri nuqtai nazardan qarash kerak.
Bunday o'zgarishlar bir zumda sodir bo'lmaydi. Kerakli darajaga yetish uchun vaqt talab etiladi».
Ole Gunnar Sulsherning intervyusi haqida:
«Men bu intervyuni ko'rmadim, shuning uchun biror narsa deyishim qiyin.
Meni haqiqatan ham yaxshi biladigan odamlar ko'p deb o'ylamayman. Ole ulardan biri ekanligi aniq.
Biz do'stmiz va hamon aloqadamiz. Yaqinda, mavsumoldi tayyorgarlik vaqtida ko'rishgandik».
Karlos Balebaning tiklanish muddatlari haqida:
«Hozircha aniq bilmaymiz, lekin gap bir necha hafta haqida ketmoqda».
Patrik Dorguning holati haqida:
«Patrik allaqachon biroz mashg'ulot o'tkazdi, ammo yuklamalar hajmi hali juda kichik edi. Biz sabrli bo'lishimiz va uning qaytishini tezlashtirmasligimiz kerak».