Gregg Evans Ugo Ekitikening tiklanish jarayoni tafsilotlari haqida maqola tayyorladi va futbolchining holati bo'yicha ijobiy yangiliklar bilan o'rtoqlashdi:
🛑 So'nggi kunlarda Ugo tetik va xushchaqchaq ko'rinmoqda, chunki u tiklanish jarayonining hal qiluvchi bosqichiga yetib keldi. Bir necha oylik hassa yordamidagi harakatdan so'ng, u nihoyat yordamchi vositalarsiz va tabiiy yurishga yaqinlashmoqda. Yaqinda fransiyalik hujumchining fizioterapevti Berengar Bushmann futbolchining ortopedik botinkasiz yurayotgani aks etgan videoni e'lon qildi.
🛑 Axill payining uzilishi tiklanish uchun eng murakkab jarohatlardan biri hisoblansa-da, «Liverpul»da Ekitike belgilangan 12 oylik muddatdan ancha oldinroq safga qaytishiga umid qilishmoqda. Aniq sana hozircha belgilanmagan, ammo fransiyalik futbolchi shifokorlar tavsiyalariga amal qilgan holda, o'zi uchun tiklanish maqsadlarini belgilab olgan.
🛑 Ugo operatsiya qilingan vaqtda Nyu-Yorkdagi Ixtisoslashgan jarrohlik kasalxonasi (HSS) xodimi, jarroh Martin O'Melli maslahatchi sifatida ishtirok etgan. U «Boston» basketbol yulduzi Jeyson Teytumning axill payi uzilganidan keyin 10 oy ichida maydonga qaytishida yetakchi rol o'ynagan.
🛑 Oyoq va to'piq bo'g'imi muammolarini davolashga ixtisoslashgan, HSS'da doktor O'Melli bilan birga ishlaydigan va MLS vakili «Nyu-York Red Bullz» jamoasi shifokori bo'lgan doktor Endryu J. Elliott o'z tajribasiga asoslanib (350 dan ortiq axill payi operatsiyasini o'tkazgan) tiklanish jarayoni haqida shunday dedi:
Reabilitatsiya harakatlanish qobiliyatini neytral holatga qaytarish, izometrik mashqlarni (statik kuch mashqlari) boshlash va mushaklar massasini saqlab qolish uchun qon oqimini cheklash (BFR) usulidan foydalanishga qaratilgan. Tez orada u antigravitatsion yugurish yo'lakchasida shug'ullanishi, yurishi va ehtimol yengil yugurishni boshlashi mumkin.
Tiklanish ko'pincha odamlar kutganidan ko'ra ko'proq vaqt oladi. Fizioterapevt tavsiyalariga amal qilish juda muhim, chunki juda tez va muddatidan oldin yuklama berish axill payini cho'zib yuborishi va uning qayta uzilish xavfini keltirib chiqarishi mumkin.
Murabbiylar va tibbiy shtabga tayanish, bu yo'lni bosib o'tganlarning maslahatlariga quloq solish va tiklanish muddatlariga rioya qilish juda muhim. Hali qila olmayotgan narsalarga emas, balki erishilayotgan natijalarga e'tibor qaratish lozim.
