#Robert Sanches — yangiliklari

Filip Yorgensen «Strasbur»ga o'tmoqda. Nega uning «Chelsi»dagi davri muvaffaqiyatsiz chiqdi va nima uchun bu «Strasbur» darvozabonlar chizig'i uchun yaxshi variant bo'lishi mumkin:

Filip Yorgensen «Chelsi»ga 2024-yilda Robert Sanchesga o'rinbosar sifatida kelgandi. Unga imkon berilganda, u hech qanday ajralib turadigan o'yin ko'rsatmadi. Faqat «Liverpul»ga qarshi durang (1:1) bilan yakunlangan yaxshi o'yin yodda qolgan, xolos. APLdagi ikki mavsum davomida u 76 ta o'yindan atigi 11 tasida maydonga tushdi, bu umumiy o'yinlarning 1/7 qismini tashkil etadi. Asosan Filip Konferensiyalar ligasida o'ynadi va u yerda munosib turnir o'tkazdi, ammo raqiblar darajasi juda past bo'lganini unutmaslik kerak.

Datchalik darvozabon «PSJ»ga qarshi o'yindagi chiqishi bilan yodda qoldi: u parijliklarning g'alaba goliga sababchi bo'ldi va 5-gol urilgan vaziyatda xatoga yo'l qo'yib, to'pni deyarli o'z ostidan o'tkazib yubordi. Bu jamoa uchun halokatli xatolar bo'lib, javob o'yinida vaziyatni o'nglash imkoniyatini qoldirmadi.

«Strasbur» uchun bu darvozabon pozitsiyasida yomon variant emas. Asosiy tarkib uchun raqobatchilari sifatida yaqinda Polshadan kelgan Pekutkovskiy va katta ehtimol bilan shu transfer oynasida jamoaga o'tadigan Slonina bo'ladi. Slonina o'tgan mavsumni o'tkazib yubordi, bungacha esa Angliya 3-divizioni va Belgiya ligasida o'rtacha o'yinlar ko'rsatgandi. Filipda tajriba ko'proq, u top-5 ligalarning ikkitasida o'ynagan. Agar uni to'g'ri yo'naltirishsa va unda «Strasbur»ni yangi g'alabalarga yetaklash uchun xohish bo'lsa, hammasi yaxshi bo'lishi mumkin. Shuningdek, hozir «Chelsi»da unga joy yo'qligini tan olish kerak: Robert Sanches jamoaning asosiy darvozaboni, Mayk Penders esa «Strasbur»dagi mavsumdan keyin juda yaxshi o'sish ko'rsatdi.

Filipga o'z ustida ishlash va «Strasbur»da asosiy hamda ishonchli darvozabon sifatida o'rnashib olishini tilayman.

BBC Sport xabariga ko'ra, Tibo Kurtua Belgiya terma jamoasidagi faoliyati davomida Mayk Pendersning o'yin uslubi va insoniy fazilatlaridan juda ta'sirlangan.

Ayni damda «Chelsi»da Robert Sanches asosiy darvozabon sifatida ko'rilmoqda, biroq unga Penders tomonidan jiddiy raqobat kutilmoqda.

Yevropaning top-5 ligalaridagi barcha darvozabonlar orasida aynan Penders o'z darvozasidan eng uzoq masofada joylashadi. Bu uning «Strasbur» hujumlarini boshlashdagi muhim rolini va jarima maydonchasi tashqarisida qanchalik faol harakat qilishini ko'rsatadi.

«Genk»ning sobiq darvozabonlar murabbiyi Gilbert Ruksning fikricha, Pendersning xotirjamligi uning mustahkam oilasi va Genk yaqinidagi kichik Maasmehelen shaharchasida o'sgani bilan bog'liq.

Ruksning so'zlariga ko'ra, u «13 yoshdan 18 yoshgacha bo'lgan davrda biror futbolchining bunchalik tez o'sganini ko'rmagan». U bunga sabab qilib Pendersning ajoyib ruhiyati va bosimni his qilmasligini keltiradi.

Biz ko'plab ajoyib darvozabonlarni tarbiyalaganmiz, ammo aynan Mayk Tibo darajasiga yetish salohiyatiga ega. Uning xotirjamligi darvozabon uchun haqiqiy oltindir. U o'yinni juda yaxshi o'qiydi, zamonaviy futbolda esa texnikadan tashqari qaror qabul qilish, bo'shliqni tushunish, bosimni yengish va harakat qilish uchun to'g'ri lahzani tanlash juda muhim.

The Athletic nashriga intervyu bergan darvozabon Robert Sanches o'z fikrlari bilan o'rtoqlashdi.

Mayk Penders haqida:

«Mayk – ajoyib darvozabon. O'tgan mavsumda u «Strasbur» safida o'zini juda yaxshi ko'rsatdi. U o'tgan yili klublar o'rtasidagi jahon chempionatida biz bilan birga edi. Uning salohiyati juda katta va kelajakda u buyuk darvozabon bo'lib yetishishiga ishonchim komil. Uning kuchli tomonlari? U juda bo'yli – taxminan 200 sm. U jarima maydonchasini yaxshi nazorat qiladi va juda xotirjam. Inson sifatida ham u juda yaxshi yigit».

Raqobat haqida:

«Bunday raqobat har doim kerak, chunki birinchi raqamli darvozabon bilan nima bo'lishini hech qachon bilmaysiz – u jarohat olishi yoki formadan chiqishi mumkin. Shu sababli, uni almashtira oladigan va doimo o'sishga undaydigan yana bir darvozabon kerak. Agar yoningizda har kuni sizni bor kuchingiz bilan ishlashga majbur qiladigan odam bo'lmasa, bo'shashib qolishingiz mumkin va o'yin darajasi tushib ketadi. Shuning uchun har kuni raqobatni his qilib turish har doim foydali».

Xabi Alonso haqida:

«Xabi menga katta ishonch bag'ishladi. U menga o'z imkoniyatlarimni ko'rsatishga sharoit yaratib bermoqda. U har bir futbolchining kuchli tomonlarini biladi va mening imkoniyatlarimni ham juda yaxshi tushunadi. Bu mavsumda u maydonda qo'limdan keladigan eng yaxshi ishlarni qilishimga imkon beradi. U jamoaga boshqacha ruh va xotirjamlik olib kirdi. Uning o'zi ham juda xotirjam inson. O'ylaymanki, bu uning futbolchilik tajribasi bilan bog'liq. Menga uning futbolga bo'lgan qarashi yoqadi. U va uning shtabi klubga olib kirgan narsalar ajoyib. Eng muhimi, u narsalarni soddalashtiradi. Men APLda ko'p o'yin o'tkazganman va hamma mening kuchli va zaif tomonlarimni biladi. U menga qo'limdan keladigan eng yaxshi narsalarni qilishga ruxsat beradi. Shu bois o'zimga bo'lgan ishonchim ortmoqda va o'yinim yanada yaxshilanadi».