#Deniel Levi — yangiliklari

🚨 Antonio Konte o'zining «Tottenxem»dagi davri va Daniel Levi bilan bo'lgan suhbat haqida gapirib berdi.

Men «Tottenxem»ga vaziyatni biroz o'zgartirish ambitsiyalari bilan kelganman, bunga qisman u yerda [Fabio] Paratichi ishlagani sabab bo'lgan. Men kelganimda jamoa to'qqizinchi o'rinda edi. Biz mavsumni to'rtinchi o'rinda, «Arsenal»dan oldinda yakunladik.

Men bir safar o'yinni yuta olmaganimiz yoki durang o'ynaganimizni eslayman va Daniel Leviga yozgandim. U menga: „Xavotir olma, keyingi o'yinda yutamiz“, deb javob berdi.

Men o'shanda: „Bu nima degani...?“ deb o'ylaganman. Men unga doim: „Qara!“ derdim. 😡

Meni eng ko'p jahlimni chiqargani, atrofimdagi odamlar: „«Tottenxem» hech qachon hech narsa yutmaydi“, deyishardi. Ular omadsiz, deyishardi.

Ularning ustidan kulishardi. Hozir ham kulishda davom etishmoqda. Masalan, «Arsenal» «Brayton»ga 0:3 hisobida yutqazganda, ular hazillashishdi: „«Arsenal» «Tottenxem»ga aylanib qoldi“. Tushunyapsizmi? Ishoning, bu meni juda jahlimni chiqargan. 😬

Antonio Konte «Tottenxem»dagi o'z faoliyati haqida The Athletic nashriga bergan intervyusida so'zlab berdi:

Dastlab Konte «Tottenxem»ni boshqarish taklifini rad etgan (uning dastlabki instinktlari to'g'ri bo'lib chiqqan), ammo klubdagilar unga qo'ng'iroq qilishdan to'xtashmagan. Nihoyat, yozda tayinlangan Nunu Eshpiritu Santu 2021-yilning noyabrida ishdan bo'shatilgach, Konte o'z shubhalariga qaramay, mavsumoldi tayyorgarliksiz va to'liq transfer oynasisiz ushbu ishni qabul qilishga qaror qildi.

«Men «Tottenxem»ga vaziyatni biroz o'zgartirish ambitsiyasi bilan kelgandim, — deb eslaydi Konte. — Qisman u yerda «Yuventus»dagi sobiq hamkasbim Fabio Paratichi bo'lgani uchun. Men kelganimda ular to'qqizinchi o'rinda edi. Biz mavsumni to'rtinchi o'rinda yakunladik va «Arsenal»ni ortda qoldirdik».

Konte kelganidan keyingi olti oy ichida «Shporlar» qolgan jamoalar orasida eng yaxshilaridan biri bo'lishdi. Ulardan yuqorida faqat APL gigantlari turardi, ammo «Tottenxem» hatto ular bilan ham natijalarga erishdi: safarda «Manchester Siti»ni 3:2 hisobida mag'lub etdi, «Enfild»da bo'lajak kumush medal sohibi «Liverpul» bilan 1:1 hisobida durang o'ynadi va mavsum yakunida Mikel Arteta «Arsenal»iga 3:0 hisobida g'alaba qozonib, og'riqli zarba berdi.

Keyingi dushanba kuni «Arsenal» «Nyukasl»ga mag'lub bo'ldi va «Tottenxem» Maurisio Pochettino ketganidan keyin ilk bor Chempionlar ligasiga yo'llanma oldi. O'shandan beri «Shporlar» chempionatdagi yakuniy o'rin orqali u yerga qayta olishmadi.

Konte «Tottenxem»da birorta ham to'liq mavsum o'tkazmadi. Ikkinchi mavsumda Paratichi diskvalifikatsiya qilindi, birinchi jamoaning jismoniy tayyorgarlik bo'yicha murabbiyi Jan Pero Ventrone vafot etdi, Konte esa kasal bo'lib qoldi. Bundan tashqari, Konte klub bilan mos emasligini tushunib yetdi.

«Esimda, biz yutqazgan yoki durang o'ynagan paytlarimizda Deniel Leviga xabar yozardim. U menga: «Xavotir olma, keyingisini yutamiz», deb javob berardi. Bu qo'llab-quvvatlash sifatida aytilgandi. Ammo men uchun bu ko'p narsani anglatardi. Men unga tinmay: «Siz umuman...? Qarang!» derdim».

Konteda ochko yo'qotishlar ahamiyatsiz bo'lmasa-da, hech bo'lmaganda yo'l qo'ysa bo'ladigan narsa sifatida qabul qilinadi degan taassurot qoldi. O'yinchilar ham buni ong ostida qabul qilishardi. Baliq boshidan sasiydi.

«Futbolchilar har doim eng oson variantni tanlashadi, — deydi Konte. — Bu ularga o'zlarini yaxshi his qilish imkonini beradi va kamroq kuch sarflashni talab qiladi».

Mart oyida Konte o'yinchilarning muammolari va «Tottenxem» ichidagi madaniyat haqida ochiq gapirish kerakligini his qildi. Bu uning klub bosh murabbiyi sifatidagi so'nggi matbuot anjumani bo'ldi. Jamoa o'yin tugashiga 16 daqiqa qolganida 3:1 hisobidagi ustunlikni boy berib, jon saqlash zonasidagi «Sautgempton» bilan durang o'ynadi.

«Meni eng ko'p aqldan ozdirgan narsa atrofimdagi odamlarning: «Tottenxem» hech qachon hech narsa yutmaydi», «Ular omadsizlar» deyishlari edi».

Konte fikricha, klubga aloqador barcha odamlar buni eng dahshatli haqorat sifatida qabul qilishlari kerak edi.

«Ularni masxara qilishardi. Hozir ham masxara qilishmoqda. Hatto hozir ham. «Arsenal» «Brayton»ga 0:3 hisobida yutqazdi (xalqaro tanaffusdan oldingi so'nggi o'yinda) va muxlislar: «Arsenal» «Tottenxem»ga aylanib qoldi», deb hazil qilishdi, tushunyapsizmi? Ishoning, bu meni juda g'azablantirdi».

«Tottenxem» Konte faoliyatining so'nggi 20 yili ichida «Atalanta» bilan bir qatorda istisno bo'ldi. Qolgan barcha klublarda u muvaffaqiyatga erishgan.

Garri Rednapp o'z fikricha, «Tottenxem» uni nima uchun ishdan bo'shatganini aytib berdi. Uning fikricha, hammasi Deniel Levi va Jo Lyuisning Robbi Kin tufayli qilgan qo'ng'iroqlaridan boshlangan:

Biz ligada ikkinchi o'rinda edik, hammasi a'lo darajada ketayotgandi. Men «Tottenxem» egasi Jo Lyuis bilan hech qachon uchrashmaganman. Deniel Levi klubdagi barcha kundalik ishlar bilan shug'ullangan. Ammo Jo boshliq edi va men u bilan hech qachon uchrashmaganman.

Bir kuni juma kuni «Manchester Yunayted»ga qarshi o'yin oldidan aeroportga ketayotgan edim. Menga Levi qo'ng'iroq qildi. U menga hech qachon juma kunlari qo'ng'iroq qilmagan va hech qachon ishlarimga aralashmagan. Deniel har doim menga nisbatan yaxshi munosabatda bo'lgan. U bilan hech qachon muammolarim bo'lmagan. U hujumda kimni maydonga tushirishimni so'radi.

Men: «Robbi Kinni», deb javob berdim. Levi hayron bo'ldi va Rafael van der Vartdan kim bilan o'ynashni xohlashini so'ragan-so'ramaganimni so'radi.

Men: «Buning unga nima aloqasi bor? Jamoani men tanlayman, Rafael emas», deb javob qaytardim.

Keyin kechqurun mehmonxonada Jo Lyuis qo'ng'iroq qildi. U menga hujum chizig'i: Lennon, Pavlyuchenko, van der Vart, Garet Beyl yoqishini aytdi, keyin esa Robbi Kin foydasiz ekanini qo'shimcha qildi. Men: «Bu sening fikring, Jo», dedim. U hatto Kin ofsayd qoidasini ham bilmasligini aytdi. Men: «Biladi deb o'ylayman. U bunchalik ko'p gol urgan», deb javob berdim. Oxirida Jo: «Agar Kin ertaga maydonga tushsa, men o'yinni hatto tomosha ham qilmayman», dedi. Men: «Bu sening tanloving, Jo», dedim. O'shanda tushundim: agar biror narsa noto'g'ri ketsa, muammolarga duch kelishim mumkin.

Tabiiyki, men baribir Kinni maydonga tushirdim. Levi yana van der Vart haqida so'radi. Men yana o'sha javobni qaytardim. Ammo men allaqachon tushunib yetgandim: har qanday xato — meni ishdan bo'shatishadi.

Rostini aytsam, Denielning o'ziga ham ketishimni ko'rish og'ir bo'lgan deb o'ylayman. Balki u hatto meni himoya qilishga ham uringandir. Ammo Lyuisning Kin tufayli e'tirozi bor edi.

NFL «Tottenxem»ga qo'shimcha daromad keltirmoqda — klub o'yinlardan qancha foyda ko'rayotgani va jarohatlar to'lqini haqida.

«Tottenxem Xotspur Stedium» allaqachon NFL o'yinlarini qabul qilishga o'rganib qolgan. Bu safar Londondagi joriy NFL seriyasining ilk o'yinida 60 907 nafar muxlis «Indianapolis Kolts»ning «Vashington Kommanders» ustidan 30:13 hisobidagi g'alabasini kuzatish uchun stadionga yig'ildi.

Ta'kidlash joizki, «Kommanders» uchrashuv mezboni bo'ldi va «Tottenxem» muxlislari uchun tanish bo'lgan tendensiyani davom ettirdi: mehmon jamoa «Tottenxem Xotspur Stedium»ni ochkolar va yuzida tabassum bilan tark etmoqda.

«Shporlar» muxlislari uchun odatiy muhitni saqlab qolish maqsadida, mezbonlar ham jiddiy jarohatlar sabab bir nechta o'yinchisini yo'qotdi, garchi bu safar voqealar boshqa qoplamada sodir bo'lgan bo'lsa-da.

Umuman olganda, «Tottenxem» muxlislari hozirda o'z jamoasi o'ynamayotgan vaqtda stadionda sodir bo'layotgan voqealarga ancha xotirjam qarashmoqda — yoki hech bo'lmaganda, bunga ko'nikishgan.

Deniel Levi davrida NFL o'yinlari, konsertlar, boks, regbi va boshqa tadbirlar salbiy qabul qilingan: go'yoki sovrinlardan ko'ra Beyonse va Ledi Gaga ko'proq qiziqtiradi, degan gaplar bo'lardi.

Ammo shu yozda kayfiyat biroz o'zgardi: «Tottenxem» nihoyat o'yinchilarga katta mablag' sarflashni boshladi.

Va to'satdan boshqa klub muxlislari noliya boshlashdi: «Tottenxem» avval cheklangan bo'lib, moliyaviy feyr-pley sabab yulduzlarini sotgan bo'lsa, qanday qilib bunchalik ko'p pul sarflay oladi? Javob, albatta, NFL, konsertlar, boks, regbi va boshqa tadbirlarda.

Shuni unutmaslik kerakki, eski «Uayt Xart Leyn» stadioni ham faqat futbol uchun ishlatilmagan. «Tottenxem» katta mablag' sarflaydigan raqiblar bilan moliyaviy jihatdan raqobatlashishi kerak va yangi ulkan stadion klubga bu tafovutni qisqartirishga yordam berdi.

Premer-liga o'yinlari hamon daromadning ulkan manbai bo'lib qolmoqda. Klub har bir o'yin uchun 6 million funt sterling oladi. «Uayt Xart Leyn» esa 1 million funtdan kamroq daromad keltirardi.

Agar yillik ko'rsatkichlarga nazar tashlasak, «Tottenxem»ning 2024/25-yilgi mavsum hisobotiga ko'ra, klub matchdey (o'yin kuni) daromadidan 126 million funt, konsertlar va NFL o'yinlarini o'z ichiga olgan tijorat daromadidan esa 277 million funt ishlab topgan.

Taqqoslash uchun, «Uayt Xart Leyn»da yillik matchdey daromadi atigi 45 million funt, tijorat daromadi esa 73 million funtni tashkil etgan.

NFL o'yinlari bo'yicha «shporlar» asosan stadionni ijaraga berishadi. Ular 2029/30-yilgi mavsumgacha uzaytirilgan NFL bilan shartnoma, shuningdek, ovqat, ichimliklar va megastordagi mahsulotlar savdosidan o'z ulushlarini olishadi.

NFL o'yinlarida o'z o'rindiqlarida ovqatlanish va ichishga ruxsat berilgan. Tanaffuslarda ular zaxiralarni to'ldirib, yana o'z joylariga qaytishlari mumkin.

Hali 2019-yilda N17 hududidagi ilk NFL o'yinidan so'ng, Bottoms Up Beer kompaniyasi pivo tugaguniga qadar savdo 1 million funtga yetganini xabar qilgandi. Bu Yevropadagi istalgan stadionda qayd etilgan pivo savdosi rekordi edi.

O'shandan beri raqamlar faqat o'sdi — ham narxlarning oshishi, ham pivo zaxiralarining ko'payishi evaziga. football.london ma'lumotlariga ko'ra, «Tottenxem»ning NFL o'yinlaridan oladigan daromadi so'nggi bir necha yil ichida 5–10 foizga o'sgan.

Bir kun kelib, xorijiy franchayzalar bilan bog'liq masalalar hal bo'lsa, «Tottenxem»ning o'z London NFL jamoasi paydo bo'lishi mumkin. Stadion bunga allaqachon tayyor.

«Kommanders»ning 2,8 milliard funtlik o'z loyihasi bor — eski RFK Stadium o'rnida yangi stadion. London pabida 3000 nafar «Kommanders» muxlisi uchun ichimliklarga qariyb 38 000 funt sarflagan xo'jayin Josh Xarris «Tottenxem» stadioni unga g'oyalar berishini tan oldi.

«Biz ular bu yerda amalga oshirgan barcha narsani o'rganmoqdamiz. Ularda maysazorni olib tashlash va qaytarish imkonini beradigan juda zo'r tizim bor... Afsuski, biz uchun u unchalik mos kelmaydi, chunki ostimizda suv bo'ladi.

Ammo ular ajoyib ish qilishgan. Biz bu stadionni bir necha bor ko'zdan kechirdik. Biz har bir stadiondan eng yaxshisini olishni istaymiz».

Endi «Tottenxem»ga faqat unda g'alaba qozonishni eslash va uni nafaqat moliyaviy, balki futbol nuqtai nazaridan ham faxrlanish mumkin bo'lgan haqiqiy qal'aga aylantirish qoldi.

Manchester Siti manziliga 800 million funt sterlinggacha bo'lgan miqdorda jamoaviy da'vo qo'zg'atilishi mumkin. Daily Mail Sport ma'lumotlariga ko'ra, sud jarayoni yana ikki yilga cho'zilishi ehtimoli bor.

Hali 2024-yil oxirida Arsenal, Tottenxem, Liverpul va Manchester Yunayted rasman bayonot berib, agar Siti aybdor deb topilsa, sudga murojaat qilish huquqini o'zida saqlab qolishini ma'lum qilgandi. Ko'pchilikning fikricha, eng ko'p zarar ko'rganlar, masalan, bir necha bor Chempionlar ligasiga chiqa olmagan Tottenxem ko'proq talab qilishi mumkin.

Ushbu ishga yaqin bo'lgan odamlarning so'zlariga ko'ra, potensial ravishda 200 million funt sterlinggacha talab qilinishi mumkin.

Nu, aytgancha, shuni ta'kidlashni istardimki, 2024-yilda boshqaruvda hali Levi bor edi. Hozir esa u yerda boshqa odamlar va ular bu vaziyatga qanday qarashi hamda umuman kompensatsiya talab qiladimi yoki yo'q, noma'lum. Yoki men juda soddaman?

Maurisio Pochettino «Chelsi» 2016/17-yilgi mavsumda moliyaviy qoidalarni buzgani uchun Premer-liga chempionligidan mahrum etilishi va sovrin o'sha mavsumda ikkinchi o'rinni egallagan «Tottenxem»ga topshirilishi kerakligini aytdi:

Biz bitta Premer-liga chempionligini yutishimiz kerak edi, uni bizga berishlari lozim edi. Agar bu [«Chelsi»ning qoidabuzarligi] rost bo'lsa, demak, o'sha yili chempion bo'lishga loyiq edik, shubhasiz. Ularni jazolashdimi, tan olishdimi? Bo'ldi, tamom. Titul ikkinchi o'rinni egallagan jamoaga o'tishi kerak.

Ular gollar urgan, o'yinlarda g'alaba qozongan deyish mumkin. Mayli. Lekin mavsum boshida biz teng sharoitda raqobatlashmaganimizni aytish mutlaqo adolatli. Balki, qoidalar bir xil bo'lganida, jamoani kuchaytiradigan yoki ko'proq gol uradigan futbolchilarni sotib olgan bo'lardik.

Menda shubha yo'q va haqiqatni aytishdan qo'rqmayman. «Chelsi» muxlislari mendan norozi bo'lishadi. Ammo agar biz «Tottenxem»da qoidalarni buzganimizda, men ham xuddi shunday tan olgan bo'lardim: «Biz titulga loyiq emasmiz, chunki qoidalarni buzganmiz».

Agar bir klublar ofsayd bilan, boshqalari esa ofsaydsiz o'ynasa, bu imkonsiz. Yoki biri VAR bilan, ikkinchisi VARsiz o'ynasa. Qoidalar hamma uchun bir xil bo'lishi kerak. Shunda senda kuchliroq jamoa yaratish imkoniyati bo'ladi.

Men «Chelsi» yomon o'ynagan yoki Konte zo'r bo'lmagan demoqchi emasman. Men buni aytmayapman. Fikrim noto'g'ri talqin qilinishini istamayman. Lekin agar sen qoidalarni buzgan bo'lsang, unda xayr — titulni boshqa jamoaga berishing kerak. Nega bunday bo'lmaganini tushunmayapman.

Demak, hozir qoidalarni buzish rag'batlantirilmoqda. Agar kerakli darajada jazolamasang, men aytaman: «Ha... men ishdan bo'shatildim, chunki biz titulni yuta olmadik».

Maurisio Pochettino «Tottenxem» va ularning katta xarajatlar bilan bog'liq yangi strategiyasi haqida:

Ular boshqa klublar kabi sarmoya kiritishmoqda. Hech qachon bilmaysan. Bu ish beradimi yoki yo'q, tushunish uchun vaqt kerak.

Har qanday o'yinda bo'lgani kabi, murabbiy qaror qabul qilganda, u ish berishi ham, bermasligi ham mumkin. O'ylaymanki, bu boshqacha strategiya va ishlashga boshqacha yondashuv.

Men har doim «Tottenxem»ga eng yaxshilarini tilayman, chunki bu klub qalbimda.

Maurisio Pochettino kelajakda «Tottenxem»ga qaytish ehtimoli va yaqin orada klubga qaytishga yaqin bo'lgani haqida:

Men har doim aytaman: bir kun kelib — nega endi yo'q? Odamlar bu haqda gapirishadi va balki biz qandaydir takliflar olgandirmiz, lekin haqiqiy qaytishga hech qachon ish yetib bormagan.

Maurisio Pochettino «Tottenxem»ni Chempionshipda boshqarishga rozi bo'lishi hamda Tomas Frank ishdan bo'shatilgandan keyin klubning murojaati haqida:

Ha, albatta. «Tottenxem»mi? Ha, albatta. Bu men har doim yordam berishga tayyor bo'lgan yagona klub. Qaysi divizionda bo'lishidan qat'i nazar. Boshqa klubga — yo'q. Lekin «Tottenxem»ga — ha.

Ha, lekin o'sha paytda ular hammaga qo'ng'iroq qilishayotgan edi! Ham erkin agent bo'lgan, ham klubi bor murabbiylarga!

Maurisio Pochettino Deniel Levi haqida:

O'ylaymanki, hozir u men ishdan bo'shatilganimda his qilgan narsani his qilmoqda! Endi u buning qandayligini biladi. Unga achinaman.