#Andijon — yangiliklari

Chap ustun yangiliklari

Sergey Lushan: «Imkoni boricha jamoani Superligada saqlab qolishga harakat qilamiz»
FC ANDIJON ↗ Matbuot

Sergey Lushan: «Imkoni boricha jamoani Superligada saqlab qolishga harakat qilamiz»

#Mash`al #Mash'al #Sergey Lushchan #Andijon

Mash'al bosh murabbiyi Sergey Lushan jamoaning Superligadagi qiyin ahvoli va tarkibni yangilash jarayoni haqida gapirdi.

«Mash'al» — «Andijon» bahsidan keyin mezbonlar bosh murabbiyi Sergey Lushan matbuot anjumanida qatnashdi.

Fikr bildirish qiyin. O'yinimiz o'xshamadi. Maydonga tushishyapti, ammo qo'lidan hech nima kelmayapti. Bu intellekt saviyamiz shunday. Keyin nima bo'ladi, bilmayman. Raqib jamoani g'alaba bilan tabriklayman. Rostini aytsam, tabriklayverib, o'zim ham charchadim. Shunga qaramay, bugungi o'yinda ijobiy jihatlar ham bo'ldi. Biz tarkibni taxminan 80 foizga yangilash yo'lidan boryapmiz. Bugun ko'rgan bo'lsangiz kerak, maydonga juda yosh futbolchilarni, hali bolaligicha bo'lgan yigitlarni tushirdik. Ulardan har biri, jumladan, zaxiradan maydonga tushgan futbolchilar ham o'zini munosib ko'rsata oldi. Yana bir yigit esa markaziy himoyachi. Biz motivasiyasi bor shu futbolchilarga tayanamiz.
Mening tushunishimcha, tajribali futbolchilarda motivasiya deyarli butunlay yo'qolgan. Bunga sabab bo'layotgan ayrim holatlarni men ham tushunishga harakat qilaman. Bu haqda avval ham gapirganman, shuning uchun yana qaytib o'tirishni istamayman. Agar futbolchilarga yetib borolmasak, ularni ishontirolmasak, tushuntira olmasak, nima qilaman? Axir, faqat biz emas, boshqa klublarda ham shunday vaziyatlar bor. Ba'zi paytlarda sabr qilish kerakligini tushunish lozim.
Hozircha ularga yetib borolmayapmiz. Nima qila olaman? Men ularni ham tushunishga harakat qilaman. Har holda, biz hammamiz Xudoning panohida yuribmiz. Imkoniyat hali bor. Hamma narsa bo'lishi mumkin. Hozircha biz izlanishdamiz. Nimani sinab ko'rmaylik, o'xshamayotgan paytlar bor. Buning faqat ikki xil izohi bor, deb o'ylayman. Yoki bu yerda yig'ilgan futbolchilarning salohiyati shu daraja — ular bundan ortig'iga qodir emas. Yoki bu vaziyatning yarim yildan beri futbolchilar faqat bazada yashab, mashg'ulot o'tkazayotgani bilan bog'liq tomoni bor. Ular pul degan tushunchaning o'zi qanday ko'rinishda bo'lishini ham unutib qo'yishgan, shekilli. Balki ikkalasi ham ta'sir qilayotgandir. Balki ham u sabab, ham bu sabab bordir. Lekin buning bizga yengilligi yo'q.
Yana bir bor aytaman: oldimizda ikki vazifa bor edi. Birinchisi — imkoni boricha jamoani Superligada saqlab qolishga harakat qilish. Agar buning uddasidan chiqa olmasak, keyingi mavsum uchun yangi jamoa shakllantirish. Hozir, asosan, shu ish bilan shug'ullanyapmiz.
O'ylaymanki, keyingi o'yinda ham sizlar hali hech qachon ko'rmagan yana ikki nafar futbolchini maydonda ko'rasiz. Bugun uch nafar yangi futbolchi o'ynadi. Keyingi bahsda yana bir-ikki nafar futbolchini sinab ko'ramiz. Ya'ni, tarkibni bosqichma-bosqich 80 foizga yangilashga o'tamiz. Albatta, biz majbur bo'lib qo'yayotgan pozisiyalar ham bor. Aslida bizga ma'qul bo'lgan ikki-uchta pozisiya bor. Qolgan pozisiyalarda esa yo o'yinchilarning imkoniyati yetmayapti, yoki ularning xohishi yo'q. Shuning uchun tarkibni o'zgartirishga majburmiz. Boshqa variantimiz yo'q.
Jamoa Superligada qoladimi yoki yo'qmi — buni yolg'iz Xudo biladi. Har holda, imkoniyatimiz butunlay tugagani aniq bo'lmaguncha ishlashda, harakat qilishda, nimadir o'ylab topishda va izlanishda davom etamiz.
Bilasizmi, nimadir o'ylab topish juda qiyin. Ayniqsa, mavsumoldi yig'inlar bo'lib, yangi futbolchilarni olib kelish imkoniyati bo'lganda, muammoni hal qilish osonroq. Futbolchini almashtirishingiz, boshqasini olib kelishingiz mumkin. Bizda esa bor narsa shu. Qo'limizdagi futbolchilar bilan ishlashga harakat qilyapmiz. Ularga ham tushuntiryapmiz: boshqa futbolchilarimiz yo'q. Agar hammamiz birga bo'lsak, demak, bir maqsad sari birga harakat qilishimiz kerak. Hozir esa bizda shunday vaziyat: kimdir xohlayapti, lekin qodir emas; kimdir qodir, lekin xohlamayapti. Hozircha mana shu holatni bir joyga yig'ishning uddasidan chiqa olmayapmiz. Shunga qaramay, yaxshi jihatlar bormi? Ha, bor. 👍
Fikr bildirish
Islom Ahmedov: «Qizil kartochka barcha rejalarimizni buzib yubordi»
FC ANDIJON ↗ Matbuot

Islom Ahmedov: «Qizil kartochka barcha rejalarimizni buzib yubordi»

#Neftchi #Qizilqum #Neftchi #Andijon #Islom Ahmedov

«Andijon» bosh murabbiyi Islom Ahmedov «Neftchi»ga qarshi o'yindan so'ng mag'lubiyat sabablari va jamoadagi transferlar haqida gapirdi.

Vodiy derbisi doirasidagi «Andijon» - «Neftchi» o'yinidan keyingi matbuot anjumanining ikkinchi qismida mezbonlar bosh murabbiyi Islom Ahmedov qatnashdi.

Muxlislarimizdan uzr so'raymiz. Juda alamli mag'lubiyatga uchradik. Bizni tinmay qo'llab-quvvatlab kelayotgan ishqibozlarimiz oldida juda uyatdamiz. O'yinga kelsak, qizil kartochkagacha uchrashuv tizgini bizning nazoratimiz ostida o'tayotgandi. Birgina qizil kartochka hamma rejalarimizni buzib yubordi. Uni joyini to'ldirgunimizcha birinchi golni o'tkazib yubordik.

- Mag'lubiyatni asosiy sababchisi kim deb o'ylaysiz?

Mag'lubiyatga uchragandan keyin baribir murabbiy aybdor bo'ladi. Qo'ldan kelgancha tayyorgarlik ko'rdik. Birinchi taymda yomon o'ynamadik. Hujumlarimiz ko'p bo'ldi, to'pni nazorat qildik. Ikkinchi taymni boshidagi kutilmagan qizil kartochka barcha rejalarimizni buzdi. U o'yinchimizni ham atay qildi, deb ayta olmaymiz. Balki emosiyada o'zini to'xtata olmagandir. Futbolchilarimiz ham professional bo'lishi va o'zini boshqarishni ham bilishi kerak. Qizil kartochka xissiyot orqali yuz berdi. Qolgan joyda futbolchilarimiz 100 foiz borini berishdi. Ayblash noto'g'ri.

- O'sha qizil kartochka butun boshli jamoaning o'yinini, tayyorgarligini o'zgartirib yubordi. Oxirgi uchrashuvlarda qizil kartochkalar ko'paymoqda. Buni oldini olish uchun jamoada ruhiy tayyorgarlik ham olib boriladimi?

Baribir futbol hissiyotlarga boy. Tushuntiramiz, gapiramiz. Futbolchilar ham o'zini boshqarishni bilishi kerak. Futbolchilar maydonda o'zini boshqara bilishi kerak. O'yinchilarimiz ham atay qilishyapti, deb o'ylamayman.

- «Andijon» yozgi ta'tilgacha yaxshi o'yin ko'rsatayotgandi. Yozgi tanaffusdan so'ng 6 ta o'yin o'tdi va 5 ochko oldi, xolos. Bu natija murabbiylar shtabini o'ylantirmayaptimi?

Albatta. Izlanyapmiz, kamchiliklar ustida ishlayapmiz. Ko'rib chiqamiz. O'yin tomonlama yomon o'ynamayapmiz. Biroq yakuniy hujumlar bo'yicha bizda muammolar bo'layotgandi. Mana, yangi hujumchi oldik. Bugun ham yaxshi o'ynayotgandik, ammo qizil kartochkadan keyin vaziyat o'zgardi.

- Shoxmalik Komilov nega o'yin qaydnomasiga kiritilmadi?

Qaydnomaga 20 ta o'yinchi kiritiladi. Hamma o'yinchilarga imkoniyat beramiz. Mashg'ulotlar jarayonida kuzatib boramiz. Har bir chiziqqa o'yinchilar qoldirishimiz kerak bo'ladi. Bizda raqobat kuchli. Bu uchrashuvda Shoxmalikka dam berishga qaror qildik. U safimizga yig'inimiz yakunlanayotgan paytda qo'shildi. Hali bizning o'yin uslubimizni to'liq tushunib yetgani yo'q. Shu bois futbolchiga dam berib turdik.

- Bu mag'lubiyatni omad bilan bog'laysizmi? Holbuki, jamoangizda gol urish uchun bir nechta yaxshi vaziyatlar bo'ldi, darvozabon, himoyachilar qaytarib qolishdi...

Omaddan ko'ra, taqdir deb o'ylaymiz. Harakat qildik, bugun yutqazish peshonamizga yozilgan ekan.

- Jamoaga qabul qilingan Nodirxon Ne'matxonov ko'p o'tmasdan shartnomani bekor qilib ketdi. Shuningdek, darvozabon Rustamjonovni ketishiga nima sabab bo'ldi?

Nodirxon Ne'matxonovga «Qizilqum»dan o'yin amaliyoti bo'yicha aniq taklif berishgan. Bizda aytganimizdek, raqobat kuchli. Ko'proq o'yin amaliyotiga ega bo'ladigan joyga o'zi tanladi. Rustamjonov bilan 6 oyga kelishilgan ekan va u «Respublika FA» jamoasiga ketdi.

- Yozgi transferlardan ko'nglingiz to'ldimi?

Ochig'i, ro'yxatimizda bir qator o'yinchilar bor edi. Ularni hammasini ham ololmadik. Oxirgi kungacha futbolchilar bilan aloqada bo'ldik. Olishga harakat qildik. YAxshiki, Rustam Turdimurodovni jalb qila oldik.

- «Neftchi» Izzatilla Po'latovni «Andijon»ga qo'yib yuborishga rozi bo'lgan ekan, lekin «Andijon» bu taklifni rad etibdi. SHu holatga to'xtalib o'tsangiz.

Rahbariyat hal qiladi. Ayrim sabablarga ko'ra o'xshamadi.
Fikr bildirish
Andijon - Neftchi bahsini 19 mingdan ortiq muxlis bevosita stadiondan kuzatdi
UzPFL ↗ Umumiy Bog'langan

Andijon - Neftchi bahsini 19 mingdan ortiq muxlis bevosita stadiondan kuzatdi

#Neftchi #Neftchi #Andijon

Andijon va Neftchi o'rtasidagi uchrashuvga 19 170 nafar muxlis tashrif buyurdi. Bu joriy mavsumdagi eng yaxshi ko'rsatkich.

Andijon va Neftchi jamoalari o'rtasidagi o'yinni tomosha qilish uchun 19 170 nafar muxlis tashrif buyurdi.

⚽️ Bu Superliganing joriy mavsumidagi eng yaxshi natija hisoblanadi.

Fikr bildirish
Xorazm yangi futbolchilar bilan shartnoma imzoladi
XORAZM PFC ↗ Transfer Bog'langan

Xorazm yangi futbolchilar bilan shartnoma imzoladi

#Xorazm #Andijon #Xorazm

Xorazm klubi tarkibni yangi futbolchilar bilan to'ldirdi. Jamoa safiga Andijonning sobiq a'zosi, rossiyalik himoyachi hamda braziliyalik hujumchi kelib qo'shildi.

Xorazm klubi tarkibni yangi futbolchilar bilan to'ldirdi. Jamoa safiga Andijonning sobiq a'zosi, rossiyalik himoyachi hamda braziliyalik hujumchi kelib qo'shildi.

Fikr bildirish
Sardor Azimov "Andijon" bilan xayrlashdi
FC ANDIJON ↗ Transfer Bog'langan

Sardor Azimov "Andijon" bilan xayrlashdi

#FC Andijan #Andijon #Sardor Azimov

Yarim himoyachi Sardor Azimov va "Andijon" klubi o'zaro kelishuvga ko'ra shartnomani bekor qildi.

2023-yildan buyon "Andijon" sharafini munosib himoya qilib kelgan yarim himoyachi Sardor Azimov jamoa bilan xayrlashdi.

Futbolchi bilan tuzilgan mehnat shartnomasi har ikki tomonning o'zaro kelishuviga ko'ra bekor qilindi.

31 yoshli futbolchi o'tgan vaqt davomida "Andijon" safida 60 o'yinda maydonga tushib, 4 ta gol muallifiga aylangan.

Klub Sardorga jamoada olib borgan faoliyati uchun minnatdorchilik bildirib, uning keyingi ishlariga omad tiladi.

Fikr bildirish
Andijon Nodirxon Ne'matxonov bilan shartnomani bekor qildi
FC ANDIJON ↗ Transfer Bog'langan

Andijon Nodirxon Ne'matxonov bilan shartnomani bekor qildi

#FC Andijan #Andijon #Nodirxon Ne'matxonov

Andijon himoyachi Nodirxon Ne'matxonov bilan tuzilgan shartnoma o'zaro kelishuvga ko'ra bekor qilinganini e'lon qildi.

Ma'lumki, bir necha kun muqaddam jamoamiz uch nafar yangi futbolchi bilan shartnoma imzolagan edi. Ularning orasida himoyachi Nodirxon Ne'matxonov ham bor edi.

Biroq keyinchalik o'yinchining shaxsiy masalalari tufayli tomonlarning o'zaro kelishuvi asosida u bilan tuzilgan mehnat shartnomasi bekor qilinganligini ma'lum qilamiz.

Futbolchining keyingi faoliyatiga omad tilaymiz!

Fikr bildirish
Tojiyev: Andijondagi o'yinda ochko yo'qotdik
FC PAKHTAKOR ↗ Matbuot Bog'langan

Tojiyev: Andijondagi o'yinda ochko yo'qotdik

#Paxtakor #Paxtakor #Andijon #Jasur Abduraimov

Andijondagi bellashuvdan so'ng "Paxtakor" bosh murabbiyi matbuot anjumanida o'z fikrlari bilan o'rtoqlashdi.

Andijondagi bellashuvdan so'ng "Paxtakor" bosh murabbiyi matbuot anjumanida qatnashdi.

Tojiyev: - O'yin qiyin bo'lishi aniq edi. Yigitlarga buni tushuntirdik va jamoa yaxshi o'yin namoyish qildi deb o'ylayman. Bugun g'alaba qozonishimizga yo'l qo'yishmadi, lekin sabab "Andijon" jamoasi emas. Ularda yaxshi jamoa bor, lekin bugun biz ochko yo'qotdik.

Alijonov va Erkinov kichik jarohati tufayli o'ynay olishmadi. Qizil kartochkalar berilgan vaziyatlarni hali ko'rib chiqmadim.

Mavsumning rosa yarmi oldinda. Hamma ochko yo'qotmoqda va yo'qotadi. Keyingi o'yinlarni yutishga harakat qilamiz.

Fikr bildirish
Artyom Potapov: «Andijon»da maksimal darajada g'alaba qozonish va o'yinlarni quruq o'tkazishni istayman»
FC ANDIJON ↗ Matbuot Bog'langan

Artyom Potapov: «Andijon»da maksimal darajada g'alaba qozonish va o'yinlarni quruq o'tkazishni istayman»

#Xorazm #FC Surxon #Andijon #Artyom Potapov

«Andijon»ning yangi darvozaboni Artyom Potapov jamoaga moslashuvi, maqsadlari va muxlislar haqida intervyu berdi.

«Andijon» klubi transfer qilgan yangi futbolchilari orasida rossiyalik darvozabon Artyom Potapov ham borligini bilasiz. U jamoaga moslashib ketdi va mashg'ulotlarda ham astoydil ishlamoqda.

Bilasiz, Potapov yurtimizda hozirga qadar «Surxon» bilan «Xorazm»da faoliyat olib borgan. Endilikda «Andijon» sharafini himoya qiladi.

Darvozabon bu boradagi dastlabki intervyusini berdi.

Artyom, «Andijon»ga ko'chib o'tishingizning asosiy sababi nima?

«Andijon»ga kelib qo'shilish varianti paydo bo'lganidayoq o'ylab o'tirmasdan qaror qabul qildim. Chunki uni o'ziga xos tarix va katta ishqibozlar armiyasiga boy klub sifatida bilaman. Murabbiylar shtabi ham kuchli ijrochilardan. Futbolchilarni hammasi ham qobiliyatli.

Bungacha siz O'zbekistonda «Surxon» va «Xorazm» uchun o'ynagansiz. Faoliyatingizning «Andijon»dagi yangi bosqichida nimalarni kutyapsiz?

Yuqori talabga mos tushishga harakat qilaman. Kerakli natijalar qo'lga kiritilishi uchun o'zimdagi bor kuchni sarflashga tayyorman va bu bilan muxlislarni quvontirish maqsadim bor.

Yangi jamoada himoyachilar bilan darvozabonning bir-birlarini tushunishlari qay darajada muhim?

Bunday futbolchilar jamlangan jamoada kirishib ketish hech qanday qiyinchilik tug'dirmaydi. Shunday muhitda futbol maydonida ham, uning tashqarisida ham bir-biringiz bilan osongina til topishish mumkin.

«Andijon» ishtirokidagi uchrashuvlarda stadiondagi muhit haqida eshitgan bo'lsangiz kerak. Klub ishqibozlariga nima degan bo'laridingiz?

Nafaqat eshitganman, balki ilgari bu stadionda o'zim ham o'ynab muhitni qandayligini sezganman. Ajoyib qo'llab-quvvatlash! Bu yerda har bir uy o'yini haqiqiy bayramga aylanib ketadi.

Hozirgacha qaysi o'yin yoki qaysi seyvingizni faoliyatingizdagi eng esda qolarlisi deb hisoblaysiz?

Siz sanab o'tgan jihatlar juda ham ko'p. Qaysi birini esga olishni ham bilaman. Ammo umid qilamanki, eng yaxshilari hali oldinda!

«Andijon» tarkibida mavsumning ikkinchi qismi uchun o'zingizga shaxsiy maqsad sifatida nimani qo'ymoqchisiz?

Maksimal darajada g'alaba qozonish va o'yinlarni quruq o'tkazishni istayman.

«Andijon» muxlislariga uchta so'z bilan ta'rif bera olsangiz qaysi xususiyatlarini sanab o'tgan bo'lardingiz?

Ishonchli, tajribali va umidli!

Fikr bildirish
Nodirxon Ne'matxonov: «Andijon» muxlislari oldida o'ynash har bir futbolchining orzusi
FC ANDIJON ↗ Transfer Bog'langan

Nodirxon Ne'matxonov: «Andijon» muxlislari oldida o'ynash har bir futbolchining orzusi

#Paxtakor #FC Buxoro #FC Surxon #Andijon #Nodirxon Ne'matxonov #Islom To'xtaxo'jaev #Nemanya Chalasan

«Andijon»ning yangi himoyachisi Nodirxon Ne'matxonov jamoaga o'tishi, klubdagi sharoitlar va muxlislar haqida fikr bildirdi.

«Andijon» klubi yozgi transferlar vaqtida tarkibiga qo'shib olgan 25 yoshli himoyachi Nodirxon Ne'matxonov jamoaga moslashuv jarayoni va kelajakdagi maqsadlari haqida gapirib o'tdi.

«Andijon»ga qo'shilganimdan juda xursandman. Murabbiylar shtabi tomonidan menga taklif bo'ldi. Eng zo'r variant, o'zimga ham «Andijon» juda yoqadi. Birinchi navbatda muxlislari. Bunday ishqibozlari bor jamoada o'ynash har qanday futbolchining orzusi deb o'ylayman. Chunki bunday atmosferada futbolchi maza qiladi. O'ylab o'tirmasdan bu taklifga rozi bo'ldim.

Ne'matxonov klubdagi infratuzilma va mashg'ulotlar darajasiga yuqori baho berdi:

«Andijon» haqida menda ma'lumot bor edi. Ammo bu yerga kelib futbol uchun hamma sharoit borligini ko'rib o'zim ham hayron qoldim. O'zbekistonda futbol shunchalik o'sayotganiga yana amin bo'lyapman. Bu yerdagi bazada hamma narsa futbol uchun. Mashg'ulotlar professional darajada. Tiklanish jarayonlari, trenajyor zali, basseyn – hamma narsa zo'r.

Himoyachi jamoa safidagi tajribali futbolchilardan o'rganishga tayyorligini ham ta'kidladi:

Bu yerda futbolchilarning saviyasi juda yuqori. O'yindan-o'yinga hamma ochilib boryapti. O'zini nimaga qodirligini ko'rsatyapti. Menga bulardan o'rganadigan narsam ko'p. Islom To'xtaxo'jaev, Nemanya Chalasan kabi futbolchilar ancha tajribali himoyachilar. Ulardan ko'p narsa o'rganyapman, menga yoqyapti.

Fikr bildirish
Andijon uch nafar futbolchi bilan shartnoma imzoladi
FC ANDIJON ↗ Transfer Bog'langan

Andijon uch nafar futbolchi bilan shartnoma imzoladi

#Paxtakor #Navbahor #FC Surxon #Andijon #Shohmalik Komilov #Artyom Potapov #Nodirxon Ne'matxonov

Andijon klubi yozgi transfer oynasi doirasida Artyom Potapov, Nodirxon Ne'matxonov va Shohmalik Komilov bilan shartnoma imzolaganini e'lon qildi.

Artyom Potapov, Nodirxon Ne'matxonov va Shohmalik Komilov Andijonning yangi futbolchilari!

Yozgi seleksiyada tarkibni yanada kuchaytirish maqsadida transfer oynasi ochilganidan unumli foydalangan jamoamiz uch nafar futbolchilar bilan rasman kelishuvga erishdi. Bular – darvozabon Artyom Potapov, himoyachi Nodirxon Ne'matxonov va yarim himoyachi Shohmalik Komilov.

Artyom Potapov - 1994 yilning 28 iyun kuni Rossiyaning Orenburg shahrida tavallud topgan. Ampluasi darvozabon. Faoliyati davomida Rossiyaning Akron, Krasnodar 2, UFA 2, Mordoviya, Krilya Sovetov, SKA Xabarovsk, Xorvatiyaning Luko, Belarusning Torpedo Minks, Minsk, Qozog'istonning Qaysar, Armanistonning Alashkert va Ararat klublari sharafini himoya qilgan. U 2023 yilda yurtimizga kelgan va hozirga qadar Surxon bilan Xorazmda faoliyat olib borgan. Joriy mavsumning dastlabki qismida Artyom termizliklar safida 2 ta o'yin maydonga tushgan. Faoliyati davomida esa 231 ta o'yin o'tkazgan.

Nodirxon Ne'matxonov – 2001 yilning 14 iyun sanasida Toshkentda tavallud topgan. Ampluasi himoyachi. Paxtakor klubi tarbiyalanuvchisi. Bunga qadar u Paxtakor U21, OKMK U21, Sho'rtan, Neftchi va Surxon jamoalarida to'p tepgan. Ne'matxonov mavsumning dastlabki qismida termizliklar tarkibida 11 ta uchrashuvda maydonga tushdi. Faoliyati davomida 80 ta o'yinda ishtirok etgan.

Shohmalik Komilov – 2000 yilning 14 mart kuni Qashqadaryoda tavallud topgan. Ampluasi – yarim himoyachi. Shu kunga qadar Nasaf, Dinamo, Turon, Buxoro, Merani Martvili (Gruziya) va Navbahor klublarida faoliyat olib borgan. Joriy yilgi mavsumning dastlabki qismida namanganliklar safida 11 ta uchrashuvda maydonga tushdi va 2 ta gol muallifi va 1 ta assist qayd etdi. Faoliyati mobaynida 134 ta o'yinda qatnashgan, 17 ta gol urgan.

Ishonamizki, ushbu futbolchilar jamoamizning yangi g'alabalariga munosib hissa qo'shgan holda muxlislarning ishonchni oqlaydi.

Jamoamizning ahil oilasiga xush kelibsizlar! 👍

Fikr bildirish

O'ng ustun yangiliklari

Andijon G'uzorda g'alabani tantana qildi
FC ANDIJON ↗ Umumiy

Andijon G'uzorda g'alabani tantana qildi

#Mash`al #Andijon #Po'latxo'ja Xoldorxonov

Andijon G'uzorda Mash'al ustidan g'alaba qozondi. O'yindagi yagona gol Po'latxo'ja Xoldorxonov hisobiga yozildi.

Ahmedov boshchiligidagi «Andijon» jamoasi G'uzorda «Mash'al»ga qarshi bo'lib o'tgan uchrashuvda o'zi uchun kerakli uch ochkoni qo'lga kiritishga muvaffaq bo'ldi.

Bahs taqdirini 53-daqiqada Po'latxo'ja Xoldorxonov tomonidan kiritilgan yagona gol hal qildi. Eʼtiborlisi, Xoldorxonov Superligadagi 100-oʼyinini oʼtkazdi va u oʼzining yubiley bahsida hal qiluvchi golni urdi.

Albatta, bahs mobaynida «Burgutlar»da ko'plab imkoniyatlar yuzaga keldi. Tashabbus ham vakillarimiz tarafida bo'ldi. Biroq birgina gol o'yinda yagona bo'lib qoldi.

Birinchi bo'limda Rustam Turdimurodov ham gol urgandi, lekin ofsayd tufayli inobatga olinmadi. Har qanday holatda ham «Andijon» mehmonda o'tgan qiyin o'yinda muhim uch ochkoni qo'lga kiritdi.

Endi jamoamizni 25 avgust kuni «Bobur arena»da «Xorazm»ga qarshi uchrashuv kutmoqda.

«Mash'al» - «Andijon» - 0:1 (0:0).
19 avgust. G'uzor. «Markaziy» stadion. 432 tomoshabin.

Hakamlar: Rustam Choriev, Mahmud Turdiev, Feruz Dostonov
Zaxira hakami: Nurjahon Sulaymonov
VAR: Abdurashid Xudoyberganov
AVAR: Xusan Xudoyberdiev
Nazoratchi: Aleksandr Popov
Komissar: Samandar Ibragimov

«Mash'al»: Doston To'xtaboev, Zafar Akramov (Muhammadbobur Mo'ydinov, 46), Stranija Bosnyak, Komiljon Tojiddinov, Sardor Abduraimov, Ibrohim G'anixonov (Mahmud Jo'raboev, 12), Humoyun Murtazoev (Tohir To'xtasinov, 46), Ifeani Ifeani (Ahror Rahimov, 52), Ergash Ismoilov, Pavel Bureyev, Azizbek Choriev (Normurod Ko'charov, 59).

«Andijon»: Artyom Potapov, Abdurahmon Komilov (Odil Abdumajidov, 83), Mahmud Maxamadjonov, Nemanya Chalasan, Islom To'xtaxo'jaev, Aleksandr Andronikashvili, Damir Temirov (Shoxmalik Komilov, 80), Xumoyunmirzo Iminov (Dragan Cheran, 46), Imeda Ashortia (Doniyor Abdumannopov, 74), Po'latxo'ja Xoldorxonov (Bekzod Sulaymonov, 74), Rustam Turdimurodov.

Gol: Po'latxo'ja Xoldorxonov, 53 – 0:1.

Ogohlantirishlar: Mahmud Jo'raboev, 45+4 – Xumoyunmirzo Iminov, 44. Aleksandr Andronikashvili, 59.

Fikr bildirish
Yozgi transfer oynasidagi o'zgarishlar: kelganlar va ketganlar
FC PAKHTAKOR ↗ Transfer

Yozgi transfer oynasidagi o'zgarishlar: kelganlar va ketganlar

#Neftchi #Paxtakor #Navbahor #Andijon #Ayman Hussayn #Muhammadqodir Hamraliyev

Yozgi transfer oynasi doirasida jamoaga kelib qo'shilgan va tarkibni tark etgan futbolchilar ro'yxati.

Yozgi transfer oynasidagi o'zgarishlar

Kelganlar:
Ayman Hussayn - "Al Karma", Iroq (erkin agent)
Murtazo Puraliganji - "Persepolis", Eron (erkin agent)
Abdurahmon Aliqulov - "Rozenxeym 1860", Germaniya (erkin agent, U-21)
Erkinjon Erkinov - "Toktogul", Qirg'iz Respublikasi (erkin agent, proliga)
Arslan Vepayev - "Arqadag'", Turkmaniston (erkin agent, proliga)
Dilshod Sharofiddinov - "Neftchi" (U-21, erkin agent)

Ketganlar:
Pyotr Pajishek - KuPS, Finlyandiya (erkin agent)
Shahzod Azmiddinov - "Al Salmiya" Kuvayt (ijara)
Rustam Turdimurodov - "Andijon" (ijara)
Muhammadqodir Hamraliyev - "Navbahor" (transfer)

Jamoa ichidagi o'tishlar:
Farruh Agayev U-21 - Proliga
Abdusamad Saidov Proliga - U-21
Amirsaid Kamolxonov Proliga - U-21

Fikr bildirish
Islom Ismoilov: «Neftchi»ning g‘alabasi va jamoadagi jarohatlar haqida»
FC ANDIJON ↗ Matbuot Bog'langan

Islom Ismoilov: «Neftchi»ning g‘alabasi va jamoadagi jarohatlar haqida»

#Neftchi #Islombek Ismoilov #Andijon

«Neftchi» bosh murabbiyi Islom Ismoilov «Andijon»ga qarshi o‘yindan so‘ng jamoasidagi jarohatlar, yosh futbolchilar va kelgusi rejalar haqida gapirdi.

«Bobur arena»da bo‘lib o‘tgan «Andijon» - «Neftchi» (0:3) o‘rtasidagi vodiy derbisidan keyin tashkil qilingan matbuot anjumanida dastlab mehmonlar ustozi Islom Ismoilov qatnashdi.

Birinchi navbatda ajoyib g‘alaba bilan muxlislarimizni tabriklayman. Stadionda ajoyib atmosfera hosil qilishdi. Xuddi uyda o‘ynagandek bo‘ldik. O‘yin og‘ir o‘tishi aniq edi. Sababi, vodiy derbisi va ikkala jamoa ham hujumkor futbol o‘ynaydi. Shunga qaramasdan g‘alaba qozondik. Lobanovskiyning gapi bor: natija qoladi, o‘yin unutiladi. Ba’zi paytlarda sifatsiz yoki yaxshi o‘ynamasdan ham natija muhim hisoblanadi.

O‘yindan oldin futbolchilarimizga bergan ko‘rsatmamizda ko‘proq o‘yin intizomiga e’tibor qaratdik. Bunga sabab bo‘ladigan juda ko‘p omillar bor edi. Uchrashuvni yuqori intensivlikda boshlay olmasdik. Shuning uchun intizom muhimligini tushunib turdik.

Birinchi taymda «Andijon» jamoasi tashabbusga ega bo‘lgan bo‘lishi mumkin. Biz ularga o‘ynash uchun imkoniyat berdik. Bu oldindan ishlab chiqilgan rejaga asosan edi. Ikkinchi taymda ozgina tempni ko‘tardik va o‘z o‘yinimizni o‘ynashni boshladik. Raqibni xatolar qilishga majbur qildik.

Himoyadan pas bilan chiqib ketishga harakat qildik. Maydon sifati bunga yo‘l qo‘ymasdi va ko‘proq uzun paslarga o‘tdik. Qisqa paslarimizni raqib jarima maydoni atrofida qilishga harakat qildik. Havoda to‘p uchun kurashlarda ko‘proq ikkinchi to‘plarni yutqazib qo‘ydik. Birinchi taymda bu narsa yaqqol ko‘zga tashlandi.

Tanaffusdan keyin o‘zimizni pressing uslubimizga qaytishga qaror qildik. Shu bilan raqibni ko‘p xato qilishga majbur qildik. Umuman olganda, «Andijon» jamoasi ham yaxshi o‘yin ko‘rsatdi. Yaxshi murabbiy ishlayapti. O‘ylaymanki, bu murabbiy bilan «Andijon» jamoasi hali ko‘plab yutuqlarga erishadi.

Usmonali Ismonaliyevning qizil kartochka olishi o‘yin natijasiga ta’sir qildi, deb o‘ylaysizmi?

Bu futbol, har narsa bo‘lishi mumkin edi. Balki raqib 11 futbolchi bilan o‘ynaganda ham o‘z golimizni urishimiz mumkin edi. O‘sha holatgacha bo‘lgan vaziyatni oladigan bo‘lsak, ikkinchi taymni hujumkorlik bilan boshladik va raqibni aynan shu holatda xato qilishga majbur qildik. O‘sha vaziyatga yaqin turgandim. Raqib ataylab qo‘pol o‘ynamagandi, ammo bu qoida va u hamma uchun bir xil. Qonun-qoida bo‘yicha bu 100 foiz qizil kartochka edi. Balki bu ham ta’sir qilgan bo‘lishi mumkin. Lekin biz yigitlarga ishondik va ishlab chiqilgan rejamiz ham bor edi. Baribir birinchi taymga nisbatan ikkinchi taymda o‘yinimizni kuchaytirmoqchi edik.

Bungacha asosan himoyachi sifatida o‘ynagan Muhsin Ubaydullayev bugun yarim himoyada o‘ynadi. Bu taktikangizmidi?

Ha, bu jarohatlar bilan bog‘liq. Jarohatlar ko‘payib ketdi. Yovan Jokich, Abror Ismoilov, Anvar G‘ofurov, bugun mana Ratinyo jarohat oldi. Bunaqa holatda jamoa keyingi o‘yinlarga qanday tayyorgarlik ko‘radi? Asosiy yetakchi futbolchilarimiz bitta-bitta safdan chiqishyapti. Bizda boshqa imkoniyat yo‘q edi. Ikrom Aliboyevni nima uchun zaxirada qoldirgandik? Chunki unda sariq kartochkalar soni uchta edi. «Buxoro» bilan uchrashuvni hisobga olgan holda uni zaxirada ushlab turgandik. Afsuski, u ham bugun to‘rtinchi sariq kartochkasini oldi va yana bir o‘yinchimiz safdan chiqdi. Muhsin bu pozitsiyada o‘ynagan. Bunga o‘tgan uchrashuvda tayyorgarlik ko‘rishni boshlagandik. «Qizilqum»ga qarshi oxirgi 20 daqiqalikda aynan «Andijon» uchun tayyorgarlik sifatida o‘zgarishlarni qilganmiz va o‘sha holatda Muhsin o‘zini oqlagan.

Yosh futbolchi Abdug‘aniyevning o‘yini haqida fikringiz?

Insonni quvontiradi. Buning ustiga birinchi o‘rinda ketayotgan «Neftchi»dek jamoada bunday futbolchining o‘ynashi o‘zi uchun katta yutuq. Murabbiy sifatida biz ham katta tavakkalchilikka qo‘l uryapmiz. Bizda boshqa imkon ham yo‘q. Hozirga qadar berilgan ishonchni to‘liq oqlayapti. Ishlashdan to‘xtamasa, u ham Husanov darajasidagi yuqori saviyadagi himoyachi bo‘ladi. 18 yoshida Superligada ishonchli o‘ynayapti. Ungacha 3-4 ta uchrashuv o‘tkazgan bo‘lsa, birorta xato qilmagan.

Yozgi seleksiyada «Andijon» «Neftchi» futbolchilari — Izzatillo Po‘latov va Asilbek Jumayevga qiziqqan ekan. Ularning mahoratini yanada oshirish maqsadida «Andijon»ga bersa bo‘lmasmidi?

Po‘latovni bermoqchi bo‘ldik, keyinchalik «Andijon» buni xohlamadi. Asilbek Jumayevga kelsak, bizda Abror Ismoilov jarohat olgandan keyin iloji yo‘q bu pozitsiyaga o‘yinchi ushlab turishimiz kerak edi.

O‘zingiz aytganingizdek, bir qator o‘yinchilar jarohat olib safdan chiqyapti. OCHL Elit musobaqasida bunday yo‘qotishlar bilan qanday ishtirok etmoqchisizlar?

Hayronman. Bu bo‘yicha murabbiylar shtabi bilan yana maslahat qilamiz. Hozir bir nima deyish qiyin. Har bir uchrashuv og‘ir o‘tyapti. Bunday yo‘qotishlarga uchrayversak, iloji yo‘q, yoshlarga ham ko‘proq imkoniyat beramiz. Lekin vaziyatdan chiqib ketishga harakat qilyapmiz. Yozgi tanaffusdan keyin o‘yinlar yanada qiyin o‘tyapti. Qayerdadir ochko, qayerdadir futbolchilarni yo‘qotyapmiz. Umid qilamanki, bu vaziyatdan chiqib ketamiz. Nasib qilsa, OCHL Elit musobaqasigacha barcha o‘yinchilar to‘liq safga qaytishadi.

Fikr bildirish
Rustam Turdimurodov: «Andijon»ga qaytganimdan xursandman»
FC ANDIJON ↗ Transfer Bog'langan

Rustam Turdimurodov: «Andijon»ga qaytganimdan xursandman»

#Neftchi #Andijon #Rustam Turdimurodov

Rustam Turdimurodov «Andijon»ga qaytishi, jamoa bilan maqsadlari va vodiy derbisiga tayyorgarlik haqida gapirdi.

«Andijon» klubi yozgi transferlar doirasida iqtidorli hujumchi Rustam Turdimurodovni o'z safiga qo'shib oldi. Futbolchi avval ham ushbu jamoada to'p surgan va tajriba orttirgan edi. Bir yillik tanaffusdan so'ng, Rustam jamoaga qaytdi.

Hujumchi klubga qaytishi va kelgusi rejalar haqida o'z fikrlari bilan o'rtoqlashdi.

- Assalomu alaykum. Xudo xohlasa, bu boshqacha qaytish bo'ldi. Baribir jamoa va bu muhit boshqa. Bu yerdagi fan-klub, muxlislar ham boshqacha.
- Dastlab bu ma'lumotni agentim tomonidan eshitdim. Yozgi transfer oynasi ochilganida shu xabar keldi. Albatta, oldimizda boshqa klublarning variantlari ham bor edi. Hammasini ko'rib chiqib, yakunda «Andijon»ga to'xtaldik.
- O'sha davrlardagi xayolimga keladigan birinchisi – bu «Andijon» tarkibida ilk bor tarix yaratganimiz. Farg'onada O'zbekiston Kubogini yuqoriga ko'targanimiz, Andijon ahlini xursand qilganimiz albatta esga keladi.
- Birinchi navbatda sharoit o'zgargan. Yangi baza, bu yerda hamma sharoitlar bor. Yangi mashg'ulot maydonlari, ichki muhit, qulay shart-sharoitlar yangilangan. Hammasi ajoyib.
- Avvalo, «Andijon»ni tanlashimda agentim yordam berdi. Chunki bu yerda bo'lganman, o'ynaganman va «Andijon»ga yordam berish uchun keldik. Oldimizda 15-16 ta o'yin bor, maqsad qo'yganmizki, ko'proq gollar urib, yaxshi statistika qayd etib, jamoaga yordam berib, chempionlikka da'vogar bo'lish niyati bilan keldik. Xudo xohlasa, harakat qilamiz.
- Albatta, maqsadim oldingi yoqimli onlarni takrorlash va Kubokni yana bir bor boshimiz uzra ko'tarish.
- Bu yil ko'proq gol urmoqchiman. Birinchi maqsadim 10 ta gol urish. Chunki oldingi o'ynagan paytlarimda 8-9 ta gol urganman. Endi ko'proq urmoqchiman.
- Ko'p derbilarda bo'ldim. Baribir vodiy derbisi boshqacha. Bu yerda bo'lganimda ham o'ynaganman. Bu derbida faqat «Andijon» uchun, g'alaba uchun chiqamiz. Borimizni beramiz, o'yinga 100 foiz tayyorlanamiz va tayyor bo'lib chiqamiz.
- O'yinga kelib bizni qo'llab-quvvatlashlariga ishonaman, Xudo xohlasa, g'alabani birga nishonlashni tilab qolaman! 👍
Fikr bildirish
Rustam Turdimurodov «Andijon» safiga qaytdi
FC ANDIJON ↗ Transfer Bog'langan

Rustam Turdimurodov «Andijon» safiga qaytdi

#Paxtakor #Andijon #Rustam Turdimurodov

Rustam Turdimurodov «Paxtakor»dan «Andijon» safiga qaytdi. Hujumchi joriy mavsumning ikkinchi qismini «burgutlar» safida o'tkazadi.

Yozgi transfer oynasi yopilishi arafasida «Andijon» jamoasi tarkibni iqtidorli hujumchi Rustam Turdimurodov bilan kuchaytirdi.

Rustam 2004 yilning 4 aprel kuni Toshkentda tavallud topgan. Futbolchi uchun jamoamiz begona emas. U 2024 yilda «Andijon»ga qo'shilgan va 2025 yilning yarmigacha faoliyat olib borgan. O'shanda Rustam «Burgutlar» tarkibida bir yarim yil mobaynida 43 ta o'yinda maydonga tushib, 11 ta gol muallifiga aylangan.

Joriy yilning birinchi yarmini «Paxtakor»da o'tkazgan hujumchi 13 ta uchrashuvda 5 ta gol urdi. Oradan bir yil o'tib, «Paxtakor» hujumchisi yana o'zi uchun qadrdon bo'lgan «Andijon»ga qaytdi.

Ishonamizki, Rustam mavsumning ikkinchi qismida o'zining ajoyib o'yinlari va gollari bilan jamoamizga foyda keltiradi. Jamoamizning ahil oilasiga qaytganing bilan, Rustam!
Fikr bildirish
Sardor Azimov «Xorazm» futbolchisiga aylandi
XORAZM PFC ↗ Transfer Bog'langan

Sardor Azimov «Xorazm» futbolchisiga aylandi

#Xorazm #Andijon #Sardor Azimov

«Xorazm» futbol klubi «Andijon» yarim himoyachisi Sardor Azimovni o'z safiga qo'shib olganini e'lon qildi.

«Xorazm» futbol klubi o'z tarkibini yangi futbolchi bilan to'ldirdi. Jamoa safiga Sardor Azimov kelib qo'shildi.

Sardor Azimov
Tug'ilgan yili: 01.06.1995
Ampluasi: Yarim himoyachi
Qaysi jamoadan keldi: «Andijon» futbol jamoasi

Fikr bildirish
«Andijon» uch nafar futbolchi bilan shartnomani uzaytirdi
FC ANDIJON ↗ Transfer

«Andijon» uch nafar futbolchi bilan shartnomani uzaytirdi

#FC Andijan #Andijon #Hamidullo Karimov #Habibullo Habibullayev #Diyorbek Madaminov

«Andijon» klubi Hamidullo Karimov, Habibullo Habibullayev va Diyorbek Madaminov bilan shartnomalarni uzaytirdi.

«Andijon» klubi o'z tarkibini saqlab qolish yo'lida navbatdagi qadamni tashladi. Jamoa uch nafar futbolchi bilan amaldagi kelishuvni uzaytirdi.

Klub matbuot xizmati xabariga ko'ra, Hamidullo Karimov, Habibullo Habibullayev va Diyorbek Madaminov bilan yangi shartnomalar imzolandi.

Hamidullo Karimov 2029-yilning 31-dekabriga qadar, Habibullo Habibullayev va Diyorbek Madaminov esa 2028-yilning 31-dekabriga qadar «burgutlar» safida qoladigan bo'ldi.
Fikr bildirish
Imeda Ashortia: Xudoga shukr, hozir o'zimni ancha yaxshi his qilyapman
FC ANDIJON ↗ Matbuot

Imeda Ashortia: Xudoga shukr, hozir o'zimni ancha yaxshi his qilyapman

#Neftchi #Lokomotiv #Andijon #Imeda Ashortia

Andijon jamoasi futbolchisi Imeda Ashortia jarohatidan so'ng o'zini qanday his qilayotgani va safga qaytish jarayoni haqida gapirdi.

Jamoamizning gruziyalik tajribali futbolchisi Imeda Ashortia yaqinda jarohat olib, safdan chiqqandi. U davolanish uchun yurtiga borib keldi.

Hozirgi holati borasida Ashortia klub matbuot xizmatiga quyidagilarni aytdi:

Mashg'ulot paytida Toshkentning Lokomotiv jamoasiga qarshi o'yin oldidan jarohat oldim. Xudoga shukr, hozir o'zimni ancha yaxshi his qilyapman. Kerak bo'lgan barcha muolajalarni o'tab bo'ldim. Jarohat oson emasdi, lekin, Xudoga shukr, hozir ahvolim ancha yaxshilandi. Hozirgacha uch-to'rtta individual mashg'ulot o'tkazishga ulgurdim. Yaqin kunlarda jamoa bilan birga mashg'ulotlarni boshlayman. Imkon qadar tezroq safga qaytishga umid qilyapman. Men doim qo'limdan kelgan barcha ishni qilaman va jamoaga imkon qadar tezroq qaytish uchun bor kuch-g'ayratimni sarflayman.

Eslatib o'tamiz, Andijon jamoamiz Superliganing 17-turi doirasida 13 avgust kuni Bobur arenada Neftchini qabul qiladi. Vodiy derbisida barcha muxlislarimizni stadionda kutamiz.

Fikr bildirish
Ulug'bek Baqoev: «Rostini aytsam, hisob 0:0 bo'lib qoladi, deb o'ylagandim»
FC ANDIJON ↗ Matbuot Bog'langan

Ulug'bek Baqoev: «Rostini aytsam, hisob 0:0 bo'lib qoladi, deb o'ylagandim»

#FC Sog`diona #Andijon #Ulug'bek Baqoyev #So'g'diyona

«So'g'diyona» bosh murabbiyi Ulug'bek Baqoev «Andijon»ga qarshi o'yindan keyin o'z fikrlari bilan o'rtoqlashdi.

«So'g'diyona» bosh murabbiyi Ulug'bek Baqoev «Andijon»ga qarshi o'yindan keyingi matbuot anjumanida ishtirok etdi.

— O'yinda ikki teng kuchli raqib o'zaro bahs olib bordi. Umuman olganda, butun uchrashuv davomida yaxshi, ishonchli o'yin bo'ldi. To'p nazorati, xavfli hujumlar ham «Andijon» tomonidan, ham bizning jamoa tomonidan bo'ldi. Birinchi taym — 0:0, ikkinchi taymda ham xuddi shunday holat kuzatildi. Ularda ham vaziyatlar bo'ldi, bizda ham.

Rostini aytsam, hisob 0:0 bo'lib qoladi, deb o'ylagandim. Ammo futbolchimiz mahorati va vaziyatni ijro etishi o'z so'zini aytdi. U gol urdi, juda chiroyli gol bo'ldi. Shuning uchun jamoamizni, futbolchilarimizni o'zini ayamagani, o'yin intizomi va g'alaba bilan tabriklamoqchiman! Endi keyingi o'yinga tayyorlanamiz. «Andijon» jamoasiga esa keyingi uchrashuvlarda omad va yaxshi o'yin tilayman.

— Bugungi kunga kelib, u yaxshi o'ynayapti, jamoaga foyda keltiryapti. Agar u bo'lmay qolsa, keyin bu savolga javob berishim mumkin. Hozir bu savolga javob berish qiyin. Menimcha, uning vaziyatlarni ijro etishi umuman olganda jamoaga natija olib kelyapti. Biz uning kuchli tomonlarini bilamiz. Shuning uchun uni ayrim o'yin vaziyatlaridan ozod qilishga harakat qilamiz, toki u uchrashuv davomidagi vaziyatlarni yakunlay olsin. Unda bu yaxshi chiqyapti. Agar Doriev bo'lmasa... bilmadim, qandaydir o'ynaymiz, ehtimol.

— Hozir bu haqda aniq aytish qiyin. Hozir shifokor o'z ishini qiladi, oyog'ini tekshirib ko'radi. Ertaga MRT qilishadi. Menimcha, tizzasida jiddiy jarohat yo'q. U yerda nimadir bo'lgan, xolos. Yaxshi natija bo'lishidan umid qilamiz. 👍

Fikr bildirish
Murabbiy Andijon ustidan qozonilgan g'alaba va Doriyev haqida fikr bildirdi
SOGDIANA JIZZAKH ↗ Matbuot Bog'langan

Murabbiy Andijon ustidan qozonilgan g'alaba va Doriyev haqida fikr bildirdi

#FC Sog`diona #Igor Golban #Andijon #Lyupcho Doriyev

Murabbiy Andijonga qarshi kechgan bahs, Doriyevning o'yini va jarohat olgan Golban haqida fikr bildirdi.

O‘yin haqida fikringiz?

O‘ylaymanki, bugun ikkita teng kuchli jamoa o‘zaro bahs olib bordi. Har ikki jamoa to‘pni nazorat qilishga harakat qilib, vaziyatlar yaratishga urindi. Birinchi taymda ham, ikkinchi bo‘limda ham deyarli bir xil ssenariy takrorlandi. To‘g‘risi, men o‘yin 0:0 hisobida yakun topsa kerak deb o‘yladim. Lekin Doriyevning chiroyli goli jamoamizga g‘alaba keltirdi. Gʻalaba bilan muxlislarimizni tabriklayman. "Andijon" jamoasiga keyingi bahslarda omad. Endi biz navbatdagi uchrashuvga hozirlik ko‘ramiz.

Doriyev oxirgi uchrashuvlarda o‘zini ko‘rsatib kelmoqda va gollar uryapti. Doriyevsiz jamoani qanday tasavvur qila olasiz?

Ayni paytda Doriyev jamoamizda o‘ynayapti va ko‘p foyda keltiryapti. Doriyevsiz qanday o‘yin namoyish etishimiz haqida hozir biron gap ayta olmayman. Agar usiz o‘ynab ko‘rsak, shundan so‘ng gapirishim mumkin. Biz o‘yinchilarimizning kuchli-kuchsiz tomonlarini bilamiz. U o‘zini yaxshi ko‘rsatishi uchun kerak paytda ba’zi ishlardan ozod qilganmiz. Hozircha unda hammasi yaxshi ketyapti.

O‘yin oxirlarida Golban jarohat oldi. Uning holati qanday?

Bu borada shifokorimiz bilan hali to‘liq gaplashmadim. MRT qilgach hammasi oydinlashadi deb o‘ylayman. Menimcha, bu jarohat og‘ir emas. Tez orada safimizga qaytishiga umid qilamiz.
Fikr bildirish
Islom Ahmedov: Hujum chizig'ini kuchaytirish ustida ishlayapmiz
FC ANDIJON ↗ Matbuot

Islom Ahmedov: Hujum chizig'ini kuchaytirish ustida ishlayapmiz

#Neftchi #FC Sog`diona #Andijon #Islom Ahmedov

Andijon bosh murabbiyi Islom Ahmedov So'g'diyona bilan o'yindan so'ng jamoaning hujum chizig'ini kuchaytirish bo'yicha muzokaralar olib borilayotganini aytdi.

"So'g'diyona" - "Andijon" (1:0) o'yinidan keyin "Andijon" ustozi Islom Ahmedov matbuot anjumanida ishtirok etdi.

O'yinga keladigan bo'lsak, to'pni nazorat qildik, hujumlarga ham o'tdik. Baribir bizda hujumdagi tajovuzkorlik yetishmadi. Futbolchilarimiz borini berib harakat va mehnat qilishdi. Buning uchun ularga hech qanaqa e'tirozimiz yo'q. Hujumni yakunlashda kamchiliklarimiz ko'rinib qoldi.

- 10 avgust kuni yozgi transfer oynasi yopiladi. Jamoada yana yangi o'yinchilarni ko'rishimiz mumkinmi?

Bu masala bo'yicha rahbariyat bilan birga izlanyapmiz. Ayniqsa, hujum chizig'ini kuchaytirish bo'yicha istayapmiz. Bu borada bir-ikkita futbolchilar bilan muzokaralar olib boryapmiz. Baribir ularni o'z jamoalari bilan amaldagi shartnomalari borligi uchun ushbu jarayon biroz qiyin kechyapti.

- "Andijon"ni keyingi turda o'z uyida "Neftchi"ga qarshi vodiy derbisi kutmoqda. Bugungi mag'lubiyatdan keyin futbolchilarni ruhlantirish va bo'lajak jiddiy uchrashuvga tayyorlash rejasi qanday bo'ladi?

Hozircha yigitlarimizga ikki kunlik dam berdik. Futboldan biroz chalg'ib, oilasi bilan birga bo'lib, ruhiy tomonlama o'zlariga kelib olishlari uchun shunday qildik. 9 avgustdan o'z bazamizda yig'ilib vodiy derbisiga tayyorgarlik ko'ramiz. Bu o'yinni ko'rib chiqib, yo'l qo'yilgan kamchiliklar ustida ko'proq ishlaymiz.
Fikr bildirish
Nemanya Chalasan: «Qizil kartochka olganimdan so'ng juda xavotirlandim»
FC ANDIJON ↗ Matbuot Bog'langan

Nemanya Chalasan: «Qizil kartochka olganimdan so'ng juda xavotirlandim»

#Paxtakor #Andijon #Nemanya Chalasan

Andijon himoyachisi Nemanya Chalasan Paxtakorga qarshi o'yindagi qizil kartochka va jamoaning durang natijasi haqida gapirdi.

«Andijon»ning o'z maydonida «Paxtakor»ga qarshi o'tgan uchrashuvi shiddatli va keskin kurashlar ostida o'tdi, faqat gol yetishmadi. Qolaversa, qizil kartochkalar bilan ham yodda qoladigan bo'ldi. Mezbonlardan ikkita, mehmonlardan bir nafar o'yinchi maydondan chetlatildi.

Uchrashuvdagi dastlabki qizil kartochka «Andijon»ning serbiyalik himoyachisi Nemanya Chalasanga ko'rsatildi.

Futbolchi esa «Paxtakor»ga qarshi o'yin, qizil kartochka va stadiondagi muhit haqida intervyu berdi.

- Nemanya, o'yin sizda qanday taassurot qoldirdi?
- O'ylaymanki, agar biz maydonda 11 ga 11 bo'lib qolganimizda g'alaba qozonishimiz mumkin edi. Menda shunday ichki tuyg'u bor edi. Qolavresa, ishqibozlarimiz bizni faqat oldinga undashdi va ularning daldasi, ko'magida albatta gol kiritgan bo'lardik.
- O'yin chog'ida uch marta qizil kartochka ko'rsatildi, shulardan biri sizga. O'sha holatni qanday izohlab bergan bo'lardingiz?
- Men olgan qizil kartochkaga kelsak, to'pni maydon markazidagi Cheranga uzatmoqchi bo'ldim. Lekin raqib mening bu rejamni oldindan o'qidi va to'pni egallab oldi. Qo'limdan keladigan yagona ish – qoidani buzishdan iborat edi. Bu mening xatoim va jamoaga pand berib qo'yganimni yaxshi tushunib turibman. Martinga kelsak, u qizil kartochkaga munosib ish qilmagandi.
- Maydonda yuz bergan voqealardan kelib chiqib, xulosa qilsak, 0:0 natijasi o'yinga mos keladimi?
- Rostini aytsam, o'yin oxirida deyarli tengma-teng tarkib bilan to'p surganimizda bemalol bellashuvni yutgan bo'lardik. Boya aytganimdek, muxlislarimiz bizga g'alaba qozonishimizga yordam berishardi. Kamchilik bo'lib o'ynab, 0:0 hisobidagi durangga kelsak, buni yomon natija deb hisoblab bo'lmaydi. Natijadan ko'nglim to'ldi.
- Olgan qizil kartochkangiz faoliyatingizdagi nechanchisi?
- Men tez-tez qizil kartochka oladigan o'yinchilar sirasiga kirmayman. O'ylaymanki, agar xotiram pand bermayotgan bo'lsa, bu faoliyatimdagi uchinchi qizil kartochkadir.
- Stadiondagi muhit sizga yoqdimi?
- Stadiondagi muhit har doim ham qoyilmaqom darajada. Bu borada ishqibozlarimizga teng keladigani yo'q. Ularning bizga ko'rsatayotgan beqiyos darajadagi qo'llab-quvvatlashlari uchun katta rahmat aytaman.
- Birinchi davra nihoyasiga yetdi. Jamoaning ishtirokini qanday baholaysiz?
- Futbolda har doim o'sish va rivojlanish uchun joy qoladi. Mavsumning ikkinchi qismida xatolarimizni to'g'rilashimizga va yanada kuchliroq o'yin namoyish qilishga harakat qilamiz.
- Qizil kartochka olgan paytingizda ishqibozlar sizni qarsaklar bilan kuzatib qo'yishdi. Shundan so'ng kiyim xonaga yo'l oldingiz. Jamoani ozchilik bo'lib qoldirganingizdan va gol o'tkazib yuborish ehtimoli borligini o'ylab, bundan qay darajada qayg'urdingiz?
- Yashirmayman, men juda ham bundan qayg'urdim. Albatta, muxlislarning meni maydondan olqishlar bilan kuzatib qo'yishgani yuragimni to'lqinlantirib yubordi. Ularga buning uchun katta rahmat aytmoqchiman. Tabiiyki, jamoaga pand berib qo'yar ekansan, albatta bundan iztirobga tushasan. Ishqilib, durang natijani ushlab qolaylik, yutqazib qo'ymasak bo'ldi, degan fikr xayolimdan ketmadi.
- Qizil kartochka olganingizdan so'ng Boake ham ortingizdan kiyimxonaga qizil kartochka olgan holda yo'l oldi. Uni kiyimxonada ko'rganingizdan hayron qolgandirsiz?
- Martinning ham kiyimxonaga tushganini ko'rib to'g'risi hayron qoldim. Ammo bu futbol va ushbu o'yinda istalgan voqea yuz berishi mumkin. Maydonda doim katta bosim hukmronlik qiladi. Ba'zi-ba'zida ehtiroslar ustunlik qilib, qoida buzganingni ham bilmay qolar ekansan.
Fikr bildirish
Sobir Pirnazarov «Andijon» murabbiylar shtabiga qo'shildi
FC ANDIJON ↗ Umumiy

Sobir Pirnazarov «Andijon» murabbiylar shtabiga qo'shildi

#Qizilqum #Andijon #Sobir Pirnazarov #Olimpik

Tahlilchi murabbiy Sobir Pirnazarov «Andijon» klubi murabbiylar shtabida ish boshladi.

«Andijon» jamoasi murabbiylar shtabiga yangi mutaxassis qo'shildi. Tarkibini yanada shakllantirayotgan jamoa murabbiylar shtabini ham boyitib bormoqda.

Jumladan, tahlilchi murabbiy Sobir Pirnazarov «Andijon» klubida ish boshladi. Ushbu mutaxassis 1986-yilning 14-mart kuni Toshkentda tavallud topgan. Murabbiylik faoliyati davomida O'zbekiston U15, U16, U17, U20, U23 terma jamoalarida ishlagan. Shuningdek, «Olimpik» va «Qizilqum» klublarida ham tahlilchi murabbiy sifatida faoliyat yuritgan.

Erishgan natijalari:
- 2022 — Toshkentda o'tkazilgan 23 yoshgacha bo'lganlar o'rtasidagi Osiyo chempionatida 2-o'rin.
- 2023 — Xitoyda bo'lib o'tgan Osiyo o'yinlarida 3-o'rin.
- 2023 — Argentinada o'tkazilgan 20 yoshgacha bo'lganlar o'rtasidagi jahon chempionati ishtirokchisi.
- 2024 — Qatarda o'tkazilgan 23 yoshgacha bo'lganlar o'rtasidagi Osiyo chempionatida 2-o'rin.
- 2024 — Parij Olimpiya o'yinlari ishtirokchisi.
- 2025 — 17 yoshgacha bo'lganlar o'rtasidagi Osiyo chempionati g'olibi, Qatarda bo'lib o'tgan jahon chempionati ishtirokchisi.

Ushbu mutaxassis jamoaning g'alabalariga o'z hissasini qo'shishiga umid qilamiz.

Fikr bildirish
Andijon - Paxtakor uchrashuvi uchun chiptalar sotuvi boshlanadi
FC ANDIJON ↗ Umumiy

Andijon - Paxtakor uchrashuvi uchun chiptalar sotuvi boshlanadi

#Paxtakor #Paxtakor #Andijon

Superliganing 15-turi doirasidagi Andijon - Paxtakor uchrashuviga chiptalar sotuvi ertaga soat 09:30 dan boshlanadi.

1-avgust kuni Andijon shahridagi Bobur arenada Superliganing 15-turidan o'rin olgan Andijon va Paxtakor jamoalari o'rtasidagi bahs bo'lib o'tadi.

Ertaga soat 09:30 dan boshlab ushbu bellashuv uchun chiptalar stadionning rasmiy kassasida sotuvga chiqariladi.

Shuningdek, echipta_bot orqali sotuv jarayoni ham ertadan, 09:30 dan boshlanadi.

Barcha futbol muxlislarini 1-avgust kuni soat 19:30 da boshlanadigan Andijon - Paxtakor o'yiniga taklif qilamiz.

Fikr bildirish