FC Andijan — yangiliklari

⚽️ O’zFHM mutaxassislari «Qizilqum» klubi vakillari bilan uchrashdi

Kecha «Qizilqum» professional klubi bazasiga O’zbekiston futbol hakamlar markazi direktori Ma’mur Saidqosimov hamda mamlakat hakamligini rivojlantirish uchun ma'sul etib tayinlangan Farhod Abdullayevlar tashrif buyurib, jamoamiz a'zolari bilan ochiq muloqat o'tkashdi.

Mazkur uchrashuvning asosiy mavzusi Superligada hakamlik va VAR tizimiga oid dolzarb masalalarni muhokama qilish bo'ldi. Klub rahbariyati, murabbiylar, muxlislar hamda futbolchilarimiz soha mutaxassislariga o'zining qiziqtirgan savollari bilan yuzlandi va ularga javob olishdi. Undan tashqari jamoamiz a'zolari tomonidan markaz rahbariyatiga bir nechta takliflar berildi.

Qolaversa, O‘zbekiston futbol hakamlar markazi vakillari klublar bilan bevosita muloqotlarni davom ettirishini, bildirilgan fikr va takliflar esa hakamlik tizimini takomillashtirish jarayonida inobatga olinishini ta’kidlab o'tishdi.

⚽️ O’zFHM mutaxassislari “Buxoro” jamoasi a’zolari bilan uchrashdi.

Bugun 🔵 “Buxoro” futbol klubi qarorgohida O‘zbekiston futbol hakamlar markazi direktori Ma’mur Saidkasimov hamda mamlakat hakamligini rivojlantirish yo‘nalishida mas’ul etib tayinlangan Farhod Abdullayevlar tashrif buyurib, jamoa a’zolari bilan ochiq muloqot o‘tkazdi.

Ma’lumot o‘rnida, Farhod Abdullayev 2021–2026-yillar davomida Saudiya Arabistonida hakamlar departamenti boshlig‘i sifatida faoliyat yuritgan. Endi esa u yurtimizga qaytib, O‘zbekistonda hakamlik tizimini yanada rivojlantirish va takomillashtirish jarayonida mas’uliyatli vazifaga tayinlandi.

Uchrashuvda “Buxoro” klubi rahbariyati, murabbiylar shtabi, futbolchilar hamda muxlislar ishtirok etdi. Suhbat davomida hakamlik va VAR tizimiga oid dolzarb masalalar ochiq muhokama qilindi, ishtirokchilar o‘zlarini qiziqtirgan savollarga javob oldilar.

Mutaxassislar tomonidan ekranda turli o‘yin epizodlari namoyish qilinib, ularning hakamlik nuqtayi nazaridan tahlili ham o‘tkazildi. Bu esa uchrashuvni oddiy muloqotdan ko‘ra amaliy va mazmunli tus olishiga xizmat qildi.

Shuningdek, endi klublar hakamlik bilan bog‘liq savol, taklif yoki tushunmovchiliklar yuzaga kelgan taqdirda maxsus platforma orqali murojaat qilishlari va tegishli mutaxassislardan javob olishlari mumkinligi ma’lum qilindi.

O‘zbekiston futbol hakamlar markazi vakillari klublar bilan bevosita muloqotlarni davom ettirishini, bildirilgan fikr va takliflar esa hakamlik tizimini takomillashtirish jarayonida inobatga olinishini ta’kidladi.

Mashgʻulotlarda futbolchilarimiz yana “Betmen” qiyofasida😎

Oʼz qarorgohida shugʼullanayotgan jamoamizning bugungi kun rejasi ham koʼngildagidek oʼtdi.

Mashgʼulotimizning maʼlum bir qismida futbolchilariniz maxsus koʻzoynaklarni taqib olgan holda shugʻullandilar. Ilgari ham shu uslub qoʼllanilgan.

Murabbiylarimiz mashgʻulot jarayonida zamonaviy uslub va texnikalardan foydalanishni xush koʼradilar. Yaʼni, futbolchilarni boshini koʻtarib oʻynashga majburlovchi maxsus koʻzoynaklardan foydalandilar.

Bu albatta oʻziga yarasha qiziqarli va futbolchilar uchun shubhasiz foydali jarayondir. Tabiiyki, bugungi tayyorgarlik jarayoni ham juda qiziqarli, rang-barang oʼtdi. Faqat Azizbek Turgʼunboyev oyogʼidan biroz jarohat olgani bois bir nech kun davolanish jarayonlarini olib boradi.

Uchrashuv yakunlandi, unda andijonliklar yirik 4:0 hisobida g'alaba qozonishdi.

Mirjalol Qosimovning “Xorazm”ga qarshi o’yindan so’ng bildirgan fikrlari

— O'yin haqida fikringiz?
— Ikki jamoa ham g'alaba uchun harakat qildi. O'z imkoniyatlarimizdan foydalanib keyingi bosqichga chiqdik. Kubok bahslari bitta o'yindan iborat bo'lgani uchun yarimta vaziyatni ham golga aylantirishga to'g'ri keladi. Kecha ko'rdik, "Andijon" jamoasi 2:0 hisobida oldinda bora turib uchrashuv 2:2 hisobida tugadi va "Andijon" penaltilar seriyasida g'alaba qozondi.

Bugun "Xorazm" jamoasi ham jangovor o'yin ko'rsatdi, oxirigacha kurash olib bordi. Qiziqarli o'yin bo'ldi deb hisoblayman. Keyingi bosqichga chiqqanimizdan xursandman. Endi chempionatning navbatdagi turiga hozirlik ko'ramiz. Stadionga kelgan muxlislarga ham o'z minnatdorchiligimizni bildiramiz.

— O'yinga bir kun qolganida "Xorazm"ga yangi murabbiy tayinlandi. Bu sizning tayyorgarligingizga qanday ta’sir qildi?
— Albatta, o'yindan oldin har bir detalni inobatga olamiz. Raqib safida bugun ayrim yetakchilar o'ynamadi va boshqalar o'zini ko'rsatishga harakat qildi. Bu o'z navbatida boshqa o'yinchilarga imkon beradi. Bugun Kubokka xos bo'lgan dramatik o'yin guvohi bo'ldik.

O‘zbekiston kubogi. 1/4 finalning barcha ishtirokchilari aniqlandi. Ertaga 11:00 da qur'a tashlash marosimi bo‘lib o‘tadi

O‘zbekiston kubogi. 1/4 finalning barcha ishtirokchilari aniqlandi. Ertaga 11:00 da qur'a tashlash marosimi bo‘lib o‘tadi

🟢 🔵 ANDIJON 1:0 OLIMPIK MOBIUZ 🔴

⚽️ Imeda Ashortia, 43 (1:0)

Islom Ahmedov: «Raqib ochiq o‘ynaganida balki imkoniyatlarimiz yanada ko‘proq bo‘lardi»

«Andijon» - «Qoʼqon-1912» (2:1) oʼyinidan so‘ng jamoamiz ustozi Islom Ahmedov matbuot anjumanida qatnashdi.

Bugungi qiyin kechgan g‘alaba bilan muxlislarimizni tabriklaymiz. Qolaversa, o‘yinchilarimizga har qanday bosimni ko‘tarib, oxirigacha kurashib, xarakter ko‘rsatishgani uchun katta rahmat. O‘yin og‘ir kechishini bilardik. Baribir 5 ta himoyachi bilan o‘ynayotgan jamoani yorib o‘tish juda qiyin edi. Raqib o‘yinini o‘rganib chiqqandik, ular asosan qarshi hujumlardan foydalanishadi. Birinchi bo‘limda aynan shu holatdan foydalanib gol urib ketishdi. Umuman olganda, jamoamizdagi barcha futbolchilar yaxshi harakat qilishdi.

— O‘yin davomida jamoangiz ko‘plab burchak zarbalariga ega bo‘ldi. Bu ham yangi bir taktik sxemaga o‘xshadi. Ammo ko‘pi omadsiz yakunlandi. Bunga alohida tayyorgarlik ko‘rilganmidi?

Har o‘yinga tayyorgarlik ko‘rib boramiz. Lekin burchak to‘plarining asosini olib qolamiz va unga biroz elementlarni qo‘shamiz. Xohlaysizmi-yo‘qmi, raqib jamoa ham sizni o‘rganib chiqadi. Ko‘rinib turibdiki, «Qo‘qon-1912» jamoasi bizni juda yaxshi o‘rganib chiqqan. Shu bois qayerdadir o‘ylaganlarimiz amalga oshmadi.

— To‘g‘ri, jamoangiz g‘alaba qozondi. Ammo, menimcha siz o‘yindan qoniqmadingiz-a?

Yo‘q, unday demagan bo‘lardim. Raqib ochiq o‘yin ko‘rsatganida balki imkoniyatlarimiz yanada ko‘proq bo‘lardi. Baribir chuqur himoyaga yotib olgan jamoani yorib o‘tish qiyin. Ko‘proq individual harakatlar ish beradi. Ikkinchi taymda futbolchilarimizni individual harakatlari ko‘proq foyda berdi. Agar raqib 5 ta himoyachi bilan emas, ochiqroq o‘ynaganida ko‘proq vaziyatlarimiz ham bo‘lishi mumkin edi.

— Jarima zarbalaridan foydalanish holati kam. Qolaversa, «Qo‘qon-1912» birinchi zonani yopib pressingga o‘tdi. Futbolchilar ko‘proq orqaga o‘ynadi. Ikkinchi bo‘limda esa qilingan o‘zgarishlar yana o‘zini oqladi. Qo‘qonliklarni pressing qilishini bilib, shunga yarasha taktika tanlanganmidi?

O‘zimizni zonada raqib u qadar pressing qilmadi. Ha, Nimelini oldinroqda kutib olishdi. Lekin oralarida ochiq joylar bor edi. Ikkinchi zonada ularni maydoniga o‘tganimizda barcha o‘yinchilari himoyalanishdi. Ochiq hududlarni yorib o‘tish uchun shoshilgandan ko‘ra orqa paslar bilan yorib o‘tishga harakat qilishdi.

— «Andijon» futbolchilari oxirgi paytlarda bir qator qizil kartochkalar olyapti. Jamoa ichki muhitida o‘zgarishlar bormi?

Xudoga shukr, muhitimiz yaxshi. Bu ko‘proq hissiyotlarga bog‘liq. Chempionatimizda baribir toliqish ham bo‘ladi. Ko‘proq hissiyotlar bilan bog‘lagan bo‘lardim. Atayin qo‘pollik qilaman deb o‘ynashmayapti.

— Hissiyot deyapsiz-u, lekin shu narsa bo‘lib ham yetakchi klublarga qarshi o‘yinlarda yuz beryapti. Bu esa jamoani og‘ir holatga tushirib qo‘ymoqda. Masalan, «Paxtakor», «Neftchi» kabi o‘yinlarda kuzatildi. Balki ruhshunos kerakmi? Hissiyotini ham jilovlay olish professional futbolchiga xos.

To‘g‘ri aytyapsiz. Baribir kuchli jamoalarga qarshi mas’uliyat ikki barobar bo‘ladi. Shuning uchun futbolchilarimiz mas’uliyatni o‘ta o‘z bo‘yniga olishib, o‘zini boshqara olmay qolishyapti. Shuni evaziga kartochkalar kelib chiqyapti.

— «Andijon»ning navbatdagi o‘yini O‘zbekiston Kubogi doirasida 15-sentabr kuni «Bobur arena»da «Olimpik Mobiuz»ga qarshi bo‘lib o‘tadi. Bo‘lajak raqib Superliga vakili emasligini hisobga olganda o‘yinga futbolchilarni ruhiy tarafdan tayyorlash borasida murabbiylarga qo‘shimcha qiyinchilik tug‘dirishi mumkin, deb o‘ylaysizmi?

Albatta, qiyinchilik tug‘diradi. Baribir kuchli jamoalar bilan boshqacha tayyorgarlik bo‘ladi. Bunday raqiblarga qarshi esa biroz bo‘shashishlik bo‘lishi mumkin. Lekin iloji boricha harakat qilamiz. Maqsadimiz oxirigacha borib, Kubokni qo‘lga kiritish. Shuning uchun aksincha bunday jamoalar kuchli klublarga qaraganda, ikki barobar xavfli bo‘ladi. Shuning uchun o‘yinchilarga har tomonlama tushuntirib boramiz. Maksimal tayyorgarlik ko‘ramiz.

Superliga, 21-tur.

Andijon 1:1 Qo'qon-1912.

Uchrashuv yakunlandi. Mezbonlar hisobni o'zgartirdi.

Islom Ahmedov: «Mag‘lubiyat uchun muxlislarimizdan uzr so‘raymiz»

«Paxtakor» - «Andijon» (3:0) bellashuvdan keyingi matbuot anjumanida jamoamiz ustozi Islom Ahmedov jurnalistlarning savollariga javob berdi.

— Assalomu alaykum. Alamli mag‘lubiyatga uchradik. Buning uchun Andijondan tashrif buyurgan muxlislarimiz oldida uzr so‘raymiz. O‘yinga keladigan bo‘lsak, o‘ziga xos reja qilgandik. Birinchi taymda hisobni ushlab turgan holda ikkinchi taymda yangi kuchlarni qo‘shib, harakat qilamiz, deb shunday reja asosida ishlagan edik. Lekin 20-daqiqagacha o‘yinchilarimiz yaxshi o‘ynadi. Ana shu bitta burchak to‘pidan gol o‘tkazib yuborganimizdan keyin hammasi buzilib ketdi — rejamiz. Ortian ikkinchi golni ham o‘tkazib yubordik. Bolalar muvozanatni yo‘qotib qo‘yishdi. Shuning hisobidan ko‘p narsani topshirib qo‘ydik. O‘rtani berib qo‘ydik. Ikkinchi taymda yangi kuchlarni maydonga tushirish holatida rejamiz bor edi. Yana qizil kartochka kutilmaganda rejamizni buzib yubordi.

— Sizning jamoangizni kuzataman, ko‘raman, jangovar xarakter bilan va har doim siz faqat hujumda o‘ynaysiz. Lekin ba’zi joylarda sizning jamoangizga balans yetishmayapti. Shu evaziga qandaydir salbiy natijalar kuzatilmayaptimi?

— To‘g‘ri aytyapsiz. Agar hisob 0:0 shunday holatda bo‘lganida, ya’ni siz aytgandek, tavakkalchilikka yo‘l qo‘ymasdan, himoyachini tushirib, o‘sha hisobni saqlab qolish mumkin edi. Lekin biz endi 0:2 hisobida yutqazayotgan edik. Shuning uchun baribir oldinga o‘tmasak bo‘lmas edi. Hujum qilib, hisobni tenglashtirishga, tavakkalchilik qildik.

— To‘g‘ri aytyapsiz, lekin «Paxtakor»ga qarshi birinchi uchrashuvda 0:0 hisobi qayd etilgandi va o‘shanda siz markaziy himoyachi Chalasan chetlatilgach, baribir hujum haqida o‘ylagandingiz...

— Unda bizda Aleksandr Andronikashvili bor edi. U shunday pozitsiyada, ya’ni oxirgi himoyachi bo‘lib o‘ynay olardi. Chunki u avvalgi jamoasida shu pozitsiyada o‘ynagan. Shuning uchun uni pastga tushirib turib, ya’ni oldiga o‘yinchi chiqarardik. Bu o‘yinda yutqazayotgan edik, shuning uchun endi himoyani ushlagandan ko‘ra, tavakkal qilib, oxirigacha kurashdik, baribir 2:0 ga yutqazdingizmi, 3:0 ga yutqazdingizmi, baribir mag‘lubiyat. Shu bois hujumlar qilib, hisobni yaqinlashtirishga harakat qildik.

— Afsuski, bu safar yana qizil kartochka bo‘ldi. Balki asosiy tarkibda Artyom Potapov emas, balki Eldor Adhamov tushganida vaziyat boshqacha bo‘lishi ham mumkin edi. Bunga fikringiz qanday?

— Darvozabonlar bo‘yicha murabbiyimiz bilan maslahatlashamiz. Darvozabonlar murabbiyi bor. Oxirgi o‘yinlarda Potapov yaxshi turgandi. Darvozasi daxlsizligini saqlayotgandi. Yaxshi turgan darvozabonni almashtirib yuborish noto‘g‘ri bo‘ladi, deb o‘ylagandik. Shuning uchun unga imkoniyat bergandik.

— Dragan Cheran nega zaxirada qoldi?

— Rejamiz bo‘yicha Draganni maydonga tushirish bor edi. O‘yindan oldin o‘zi gaplashgandik, ikkinchi taymda u bilan kuchaytirishni reja qilgan edik. Lekin qizil kartochka hammasini o‘zgartirib yubordi. Bizda Bekzod Sulaymonov ham bor va u himoyachi rolida ham o‘ynay oladi, hujumga borib-kelib o‘ynaydi. Shuning uchun shu o‘yinchini tushirdik-da. Qizil kartochka hamma rejamizni buzib qo‘ydi.

— Birinchi davrani olib qaraydigan bo‘lsak, birinchi davrda Babayan keldi. 7 ta o‘yin o‘tkazdi. 2 ta g‘alaba, 5 ta mag‘lubiyat bo‘ldi. Siz «Qo‘qon-1912» bilan o‘yindan boshladingiz. O‘rtamiyona jamoalarga qarshi barqaror ochko to‘pladingiz. Mana, ikkinchi davra boshlandi, «Neftchi»ga, «Paxtakor»ga imkoniyat boy berildi. Islom Ahmedov effekti faqat o‘rtamiyona jamoalar uchunmi yoki katta jamoalarni ham yuta oladimi?

— Birinchi davrada «Bunyodkor» bilan o‘ynaganimizda, ular uchinchi o‘rinda edi va yaxshi jamoa edi. Masalan, «Xorazm» ham uncha pastda emas edi. Birinchi davradagi «Paxtakor» yoki «Neftchi» bilan o‘yinni solishtiradigan bo‘lsak, natija bo‘yicha yutqazdik. Lekin o‘yin bo‘yicha, hujumkorlik, to‘p nazorati bo‘yicha yaxshiroq edik. Ya’ni, yutqazishni yutqazishdan farqi bor. Hujumlar qilyapmiz, to‘p nazorati bor, har xil harakat qilyapmiz, qayerdadir o‘zimizning xatolarimizdan ham gol o‘tkazib yuborib, shunday bo‘ldi. «Neftchi» bilan ham birinchi taym yomon o‘ynamaganimiz yo‘q. Unda hamma tomonlama ustunlik qildik. Faqat aytganimizdek, yana qizil kartochka hisobiga yutqazgandik.

— Birinchi davraga nisbatan o‘yin uslubi o‘zgardi, harakat ko‘paydi, nisbatan tezlik qo‘shildi. Jamoada «qurol» bormi? Misol uchun, Xomyakov paytida standartlarda xavfli edi. Ikkinchi qavatda imkoniyat bermasdi. Hozir «Andijon»da «qurol» bormi?

— To‘g‘ri aytyapsiz. Bizda bo‘ydoq o‘yinchilarimizdan Boake va Cheran bor. Lekin Dragan ko‘proq orqaroqdan pas beradi. Shuning uchun shu o‘yinchilarimizning kuchli tomoni — ular to‘pni yaxshi nazorat qila oladi. Intellekti yaxshi. Futbolchilarimizning salohiyatidan kelib chiqib, kesuvchi paslar, oralaridan uzatiladigan paslarni qo‘llaymiz. Standart holatlardan ham ikki-uchta jamoaga gol urganmiz. Biz ko‘proq to‘p nazorati, hujumkorlikka e’tibor beryapmiz.

— Potapov o‘rtamiyonalarga qarshi yaxshi o‘ynadi. Eldor Adhamov jamoaning asosiy darvozaboni, jamoa kuchli raqib bilan o‘ynayotgan edi. Yana uni asosiy tarkibda tushirsa bo‘lmasmidi?

— Agar hamma narsani oldindan bilganimizda, shunga tayyorgarlik ko‘rardik. Oldindan hech narsani bila olmaysiz. Masalan, qilgan rejalarimiz o‘xshamadi. Chunki o‘yin buzilib ketdi. Boshqacha reja qilgandik. Kutilmaganda boshida ikkita gol o‘tkazib yubordik, ikkinchi taymda keyin darvozabonimiz qizil kartochka olib qoldi. Rejalarimiz buzilib ketdi.

— O‘zbekiston chempionatining eng yaxshi legionerlaridan biri deb aytiladigan Cheran zaxirada qoldi. O‘tgan o‘yinda ham ikkinchi taymda maydonga tushgandi. Gap-so‘zlarga qaraganda, murabbiylar shtabi bilan biroz kelishmovchilik bo‘lgan. Bu qanchalik rost?

— Yo‘q, oramizda hech qanday muammo yo‘q. Dragan bilan yaqin munosabatdamiz. E’tibor bergan bo‘lsangizlar, Draganni oxirgi o‘yinlarda faqat ikkinchi taymda tushiryapmiz, o‘yinni kuchaytirib beryapti. Chunki to‘pni nazorat qilyapti, shoshilmaslikka undayapti. Ya’ni, o‘yinni boshqaryapti. Raqiblar charchagan holatda bo‘sh hududlar topib, o‘yinni o‘z qo‘liga olayotgandi. O‘yindan oldin Dragan bilan har doim gaplashamiz. Shu reja asosida ish tutmoqchi edik, lekin rejamiz o‘xshamadi. Maydonga tushmaganiga baribir futbolchining kayfiyati tushishi mumkin, mag‘lubiyat ham baribir ta’sir qiladi.

— Demak, o‘zi shu rolga ko‘nyaptimi? Unda norozichilik bo‘lmayaptimi?

— Yo‘q, yo‘q. Aytayapman-ku, u bilan bu borada gaplashib turamiz, o‘zi menga aytadi: «Men ikkinchi taymda tushib, yordam beray. Chunki raqiblar charchaganda», deydi. O‘zidan chiqadi, tashabbus. Lekin asosiy tarkibda ham qo‘yaveraman. Lekin ikkinchi taymda tushib, yordam beray, deydi.

Superliga 20-turidan o'rin olgan "Paxtakor" - "Andijon" uchrashuvi yakunlandi. O'yinda hisob 3:0 ko'rinishida qayd etildi.

Gollar: Tahsin 21, Sobirxo'jayev 29, Abdumajidov 69.

"Paxtakor" matbuot xizmati xabariga ko'ra, "AKFA" bilan "Paxtakor" yanada kuchli!

Kuni kecha «Andijon»dan Rossiyaning «Dinamo» Maxachkala jamoasiga transfer qilingan Mahmud Mahamadjonov «Andijon» matbuot xizmatiga quyidagilarni aytdi:

Men uchun oson bo‘lmagan qarorni qabul qilib, yangi jamoa sari yo‘l olyapman.

Avvalo, shu vaqt davomida menga ishonch bildirgan, qo‘llab-quvvatlagan va futbolchi sifatida rivojlanishimga katta hissa qo‘shgan jamoam rahbariyati, murabbiylar shtabi, jamoadoshlarim va muxlislarimizga chin qalbimdan minnatdorchilik bildiraman.

Alohida viloyat hokimimiz Shuhratbek Qushaqbayevichga ham futbolga, jamoamizga va biz futbolchilarga ko‘rsatgan e’tibori, qo‘llab-quvvatlovi va ishonchi uchun katta rahmat aytaman. Bu e’tibor va ishonch men uchun doimo qadrlidir.

Bu jamoada o‘tkazgan har bir kunim, birga qo‘lga kiritgan g‘alabalarimiz, boshdan kechirgan qiyinchiliklarimiz va yaxshi xotiralarim qalbimda qoladi.

Men bu jamoani tark etayotgan bo‘lsam ham unga bo‘lgan hurmatim va mehrim doimo saqlanib qoladi. Menga berilgan ishonchni boshqa jamoada ham oqlashga va yanada katta marralar sari intilishga harakat qilaman.

Barchangizga yana bir bor katta rahmat. Sizlarga faqat omad, rivoj va yangi g‘alabalar tilayman!

Bu xayrlashuv emas — yana uchrashamiz. 🤝⚽️❤️

O'yindan keyingi matbuot anjumanida Kamoliddin Tojiyev qatnashdi.

Tojiyev: - Yaxshi o'yin bo'ldi, ikkala jamoa futbol o'ynashga intildi. Vaziyatlar yaratdik, ulardan foydalanmadik. Bekor qilingan golni tushunmadim, takroriy lavhani ko'rdik. Hakamlar ofsayd chizig'ini darvoza orqasidan chizishmoqda. Darvoza ortidan chizilganda ham ofsayd yo'q. Ular qanday qilib chiziqni chizishganini bilmayman. Shunchaki golimizni bekor qilishdi va ochkolardan mahrum bo'ldik.

Ikki kun oldin umumiy mashg'ulotda Aziz Turg'unboyevning chap oyog'i jarohatlandi. Bu haqida oʼsha kuni xabar berib o'tgandek. Klub shifokori Olimjon Ne'matov esa futbolchining jarohati bo'yicha klub matbuot xizmatiga ma'lumot berdi.

Unga ko'ra, ultratovush tekshirish jarayonida Turg'unboyevning jarohati tashxisi aniqlandi: boldir mushagining uzilishi!

Bu jarohat bitishi o'rtacha 12-14 kun vaqtni oladi. Besh kun davolanishdan keyin alohida shug'ullanishni boshlaydi.

Biz Azizbekga sog'liq va tezroq sog'ayib safga qaytishini tilab qolamiz. 👍

Bugun «Andijon» futbol klubi qarorgohi muhim uchrashuvga mezbonlik qildi. O‘zbekiston futbol hakamlar markazi direktori Ma’mur Saidqosimov hamda mamlakat hakamligini rivojlantirish yo‘nalishida mas’ul etib tayinlangan Farhod Abdullayev klub qarorgohiga tashrif buyurib, jamoa a’zolari bilan ochiq muloqot o‘tkazdi.

E’tiborlisi, hakamlik masalalari bo‘yicha klublar bilan bevosita muloqotlarni yo‘lga qo‘yish tashabbusining dastlabki uchrashuvi aynan «Andijon»dan boshlandi.

Ma’lumot o‘rnida, Farhod Abdullayev 2021–2026-yillar davomida Saudiya Arabistonida hakamlar departamenti boshlig‘i sifatida faoliyat yuritgan. Endi esa u yurtimizga qaytib, O‘zbekistonda hakamlik tizimini yanada rivojlantirish va takomillashtirish jarayonida mas’uliyatli vazifaga tayinlandi.

Uchrashuvda «Andijon» klubi rahbariyati, murabbiylar shtabi, futbolchilar hamda muxlislar ishtirok etdi. Suhbat davomida hakamlik va VAR tizimiga oid dolzarb masalalar ochiq muhokama qilindi, ishtirokchilar o‘zlarini qiziqtirgan savollarga javob oldilar.

Mutaxassislar tomonidan ekranda turli o‘yin epizodlari namoyish qilinib, ularning hakamlik nuqtayi nazaridan tahlili ham o‘tkazildi. Bu esa uchrashuvni oddiy muloqotdan ko‘ra amaliy va mazmunli tus olishiga xizmat qildi.

Shuningdek, endi klublar hakamlik bilan bog‘liq savol, taklif yoki tushunmovchiliklar yuzaga kelgan taqdirda maxsus platforma orqali murojaat qilishlari va tegishli mutaxassislardan javob olishlari mumkinligi ma’lum qilindi.

Uchrashuvda muxlislar ham o‘z fikr va mulohazalarini bildirib, hakamlik tizimiga oid takliflarini o‘rtaga tashladilar. Murabbiylar va futbolchilar esa amaliyotda uchrayotgan masalalar yuzasidan o‘z tavsiyalarini bildirishdi.

Eng muhimi, bu jarayonda asosiy e’tibor — ochiqlik, muloqot va muammolarni birgalikda hal etishga qaratilmoqda.

O‘zbekiston futbol hakamlar markazi vakillari klublar bilan bevosita muloqotlarni davom ettirishini, bildirilgan fikr va takliflar esa hakamlik tizimini takomillashtirish jarayonida inobatga olinishini ta’kidladi.

«Andijon» futbol klubi rahbariyati o‘z navbatida bunday ochiq muloqot va tashrif uchun minnatdorlik bildirdi.

Demak, hakamlik haqidagi muloqot endi maydondan tashqarida ham ochiq davom etadi. Yangi yondashuvning ilk manzili esa — «Andijon» bo‘ldi. 👍

Ayollar futboli. Birinchi liga. 17-tur

“Navbahor-W” – “Andijanka” – 0:4 (0:2).
28 sentabr. Namangan. “Yoshlik” stadioni. 45 tomoshabin.

Hakamlar: Islom Nosirov, Aziz Onorboev, Gulbahor Mirsobirova.
Zaxira hakami: Otabek Mamatov
Nazoratchi: Mo'minjon Majidov
Komissar: Umid Xolmatov

“Navbahor-W”: Gulsaman Oribova, Gulyora Valieva, Xusnidaxon Allanova, Umida Egamberdieva, Sarvinoz Komiljonova, Mushtariybegim Saloxiddinova (Namunabonu Jalolova, 58), Ma'rifat Davronbekova, Mubina Murodullaeva (Dilnoza Tojiboeva, 58), Sarvinoz Dilmurodova (Odinaxon Rahimjonova, 70), Gulchehra Alimjonova, Shabbona Erkinova.

“Andijanka”: Xurmatoy Rahmatullaeva, Gulshoda Sobirova, Dilnoza Zokirova, Gulnoza Hamidova (Marziyaxon Rejabboeva, 77), Komila Xudoyberdieva, Zuxraxon Obidova (O'g'iloy Jumaboeva, 90+2), Umida Abdumutalova, Robiyaxon Mirzaeva, Gulsevarbonu Azimova, Zilola Sayfiddinova, Umida Olimjonova.

Gollar: Dilnoza Zokirova, 12 – 0:1. Gulnoza Hamidova, 30 – 0:2. Gulnoza Hamidova, 54 – 0:3. Dilnoza Zokirova, 78 – 0:4.

Amalga oshirilmagan penalti: Robiyaxon Mirzayeva, 76.

Ogohlantirishlar: Sarvinoz Dilmurodova, 60. Sarvinoz Komiljonova, 79 – Umida Olimjonova, 48. Gulnoza Hamidova, 55.

O'zbekiston kubogi 1/4 finalda jamoamiz Andijon jamoasiga qarshi bahs olib boradi. Uchrashuv Zomin markaziy stadionida bo'lib o'tadi.

O'zbekiston kubogi. Qur'a tashlash marosimi

Suratda musobaqa setkasi ko'rsatib o'tilgan bo'lib, mos ketma-ketlikda va tartibi bo'yicha chorak final juftliklari aniqlab olinadi. Yarim finalda birinchi va uchinchi juftlik g'oliblari o'zaro hamda ikkinchi va to'rtinchi jutlik g'oliblari o'zaro kurash olib boradi.

Vali Sultonovning OKMKga qarshi o’yindan so’ng bildirgan fikrlari

— O'yin haqida fikringiz?
— Uchrashuv juda chiroyli va qiziqarli kechdi. Avvalambor Olmaliq jamoasini g'alaba bilan tabriklayman. Bazan chempionatda ham shunday qiziq o'yinni ko'rmasligimiz mumkin. Bir so'z bilan aytganda, muxlislarga yoqadigan futbol kechdi desa bo'ladi.

— Bundan 13 kun avval "Xorazm" shu stadionda OKMK mehmoni bo'lgandi. Albatta, shu o'yinni ham ko'rib chiqqan bo'lishingiz tabiiy. O'sha bahs bilan solishtirganda nimalarni o'zgartira oldingiz?
— To'g'ri savol berdingiz. Jamoani kecha qabul qilib oldim va endi birinchi mashg'ulotni o'tkazdik. Bugun esa Kubokda rasmiy uchrashuvda maydonga tushdik. Afsus, to'liq tarkib bilan o'ynay olmadik, 6-7 nafar futbolchimizda jarohat bor va ular uyda qolishgan. Ko'rsatilgan o'yin uchun futbolchilarga rahmat aytaman, oxirigacha kurash olib bordik.

Mirjalol Qosimovni juda hurmat qilaman, buni ko'pchilik biladi, u kishini o'zimga ustoz deb hisoblayman. Shogird ustozdan o'tmasa, shogird emas deyishadi-ku, bugun shunga yaqin kelgandik. Olmaliq jamoasiga O'zbekiston Kubogida omad tilab qolaman.

O'zbekiston Kubogi 1/8 final doirasida «Andijon» pro liga a'zosi – «Olimpik Mobiuz» jamoasini qabul qildi. Asosiy vaqt 2:2 hisobi bilan yakunlandi. Ekstra taymlarda ham hisob o'zgarmadi. Penaltilar seriyasida esa maydon egalari 5:4 hisobida g'alaba qozondi va chorak finalga chiqdi.

Penaltilar seriyasida raqibni oxirgi zarbasini qaytargan darvozabon Eldor Adhamov tabiiyki, uchrashuv qahramoniga aylandi. Uchrashuvdan keyin darvozabon bir qator savollarga javob qaytardi.

- O'yin haqidagi taassurotlaringiz qanday bo'ldi?

- Qiyin bo'lishini bilardik. Chunki bunday jamoalarga qarshi avvalo «nastroy» qilishni o'zi qiyin. Boz ustiga «Olimpik Mobiuz» yoshlardan tashkil topgan, yaxshi loyiha. Terma jamoalarga nomzodlarni yetkazib beradi. U yerdagi barchasi iqtidorli yigitlar. Qarshi hujum xavfli bo'lishini bilib turgandik. Ammo birinchi bo'limda umuman muammo bo'lgani yo'q. Ikkita gol urganimizdan keyin menimcha g'alaba qozondik, deb o'ylab biroz bo'shashdik. Erta xotirjamlikka berilganimiz evaziga ikkita gol o'tkazib yubordik. Ammo o'zimizni tez qo'lga olib, yana hujum qilishni boshladik. So'nggi daqiqagacha raqibni xavf ostida ushlab turdik. Ammo omadimiz kelmadi. G'alaba baribir penaltilar seriyasiga yozilgan ekan, yuzimiz yorug' bo'ldi.

- Yakunda o'yin qahramoniga aylandingiz. Penaltilar seriyasidagi oxirgi zarbada qutqardingiz. O'sha holatni qanday izohlagan bo'lardingiz?

- O'shanda raqib futbolchisini ko'ziga qarayotganimda biroz xayajonlanayotganini bildim va burchakka tepa olmaydi, deb o'yladim. Bunaqa holatda ko'pchilik tavakkal qilishga qo'rqadi. Qaerga tepishini o'yladim. Hatto, oxirgi lahzada ham to'p darvozaga kirib ketyapti deb o'yladim. Xudoga shukr, reaksiya bo'lib, oyog'im bilan qaytardim.

- Penaltilar seriyasida aksariyat zarbalarning yo'nalishini topgandingiz. Qolaversa, zarba berishdan oldin raqib futbolchilariga ham nimadir dedingiz...

- Bu mening shaxsiy sirim. Nimadirlar deyish ko'p narsani hal qilmaydi. Hammasi Xudodan. Bu shunchaki, futbolchilarni chalg'itish uchun ishlatiladigan oddiy narsa. Ko'pincha futbolchilarni muvozanatini yo'qotishga sabab bo'lib, ish berib qoladi. Zarbani tepayotgan oxirgi futbolchi xayajonlanib qoldi.

- Jamoa 2:0 hisobida oldinda edi, keyin hisob tenglashdi. Ekstra taymlar va penaltilar seriyasi. O'yindan oldin bunday reja umuman bo'lmagan bo'lsa kerak...

- Yo'q, hattoki, uyga qaytishga samolyotga bilet ham olib qo'ygandim, chunki osonlik bilan yutamiz, deb o'ylagandik. Hammasi kuyib ketdi. Lekin yana bir marta bizga dars bo'ldi. Aslida raqibga yengil qaramagandik. Faqat 2:0 dan keyin biroz bo'shashdik.

- «Andijon» chorak finalga chiqdi. Qaysi raqibni kutyapsiz?

- Kuchliroq raqib bo'lsa ham yaxshiroq bo'lardi. Chunki bugungidek raqiblarga qarshi «nastroy» qilish qiyinroq.

- 20 sentabr kuni «Nasaf»ga qarshi o'tadigan o'yin oldidan nima degan bo'lardingiz?

- Bir kun dam bo'ladi. Bu umuman boshqacha o'yin bo'ladi. Mahoratli o'yinchilarga ega. Bunday paytda xohlaysizmi-yo'qmi, azart qattiq uyg'onadi. Xudo xohlasa, g'alaba qozonib muxlislarni xursand qilamiz.

O‘zbekiston Kubogi 1/8 final doirasidagi «Andijon» – «Olimpik Mobiuz» uchrashuvidan keyin mehmonlar sport direktori Andrey Miklyaev matbuot anjumanida ishtirok etdi.

Nima deyish mumkin? Menimcha, bugungi o‘yin barchaga, jumladan, muxlislarga ham yoqdi.

Albatta, o‘zingiz tushunasiz, kubok bahslari doimo yuqori shiddat va keskinlik ostida o‘tadi. Biz uchun «Andijon» o‘ziga xos prinsipial raqib edi. Biz ham futbol o‘ynay olishimizni ko‘rsatishni xohladik. Menimcha, bugun buni uddaladik.

Umuman olganda, o‘yin shaxsan menga yoqdi. Hatto 0:2 hisobida ortda borayotganimizda ham o‘yinga qaytishning uddasidan chiqdik. Eng muhimi, chuqur himoyaga yopilib olmadik. Biz bugun g‘alaba qozonishimiz ham, mag‘lub bo‘lishimiz ham mumkin edi — men aynan o‘yinning o‘zi haqida gapiryapman. Penaltilar seriyasi esa... o‘zingiz bilasiz, penalti — lotereya.

Butun jahon chempionatini ham ko‘rdik, u yerda ham shunday holatlar bo‘lgan. Albatta, biroz alamli. Hozir yigitlar xafa, ayrimlari yig‘layapti. Ammo futbol shu — penaltilar seriyasi. «Andijon» jamoasini keyingi bosqichga chiqqanligi bilan tabriklayman va ularga kelgusi o‘yinlarda omad tilayman.

Nega darvozabonni almashtirdik? Mashg‘ulotlarda biz penaltilar seriyasiga ham tayyorgarlik ko‘ramiz. Ba’zida mashg‘ulot paytida penaltilar tepamiz. Ikkinchi darvozabonning ham penaltilar paytida o‘zini yaxshi ko‘rsatish imkoniyati bor, deb hisobladik.

Bizda darvozabonlar murabbiyi bor va aynan u ham shu masalada o‘z fikrini bildirdi. Umuman olganda, qaror shu tarzda qabul qilindi: u darvozada penaltilarni yaxshi taxmin qila oladi, deb o‘yladik. Ammo ko‘rib turganingizdek, bu safar taxminlarimiz o‘zini oqlamadi. U birorta penaltini qaytara olmadi. Bunday holatlar futbolda bo‘lib turadi.

Bilasiz, hozir Yaponiyada Osiyo o‘yinlari bo‘lib o‘tmoqda. Jamoamizdan bir nechta futbolchi terma jamoaga chaqirilgan. To‘rt nafar futbolchimiz hozir terma jamoa tarkibida. Bosh murabbiyimiz ham u yerda.

Shu sababli bugungi matbuot anjumanida jamoa nomidan men ishtirok etyapman. Bundan tashqari, yordamchi murabbiyimizda qizil kartochka bor.

Shu fursatdan foydalanib, Osiyo o‘yinlarida ishtirok etayotgan milliy terma jamoamizga ham omad tilaymiz. Bugun, agar bilsangiz, ular Filippin terma jamoasini 5:1 hisobida mag‘lub etishdi. Kelgusi o‘yinlarda ham ularga omad tilaymiz. Biz esa bu yerda o‘z vazifalarimizni bajarishda davom etamiz.

Yaxshi savol. Pro ligada biz, umuman olganda, jamoa shakllantirish bilan shug‘ullanyapmiz. O‘tgan mavsumdan keyin jamoamizni sakkiz nafar futbolchi tark etdi. Qolaversa, ularning barchasi Superliga jamoalariga o‘tib ketishdi. Masalan, Farg‘ona klubi ikki nafar futbolchimizni oldi. «Qizilqum»ga ham, «Nasaf»ga ham futbolchilarimiz o‘tishdi.

Albatta, futbolchilar yuqori bosqichga ko‘tarilayotgan bo‘lsa, biz ularni rag‘batlantirishimiz va qo‘yib yuborishimiz kerak. Ularning o‘rniga esa boshqa futbolchilar keldi. Albatta, yangi futbolchilarni jamoaga moslashtirish va yaxlit jamoani shakllantirish uchun ma’lum vaqt kerak.

Shu tariqa asta-sekin jamoani shakllantiryapmiz. Biz yosh futbolchilarni tarbiyalash uchun ishlayapmiz. Ular kelajakda Superligada o‘ynay oladigan darajaga yetishishini xohlaymiz. Chunki o‘zingiz tushunasiz, barcha futbolchilar Superligada o‘ynashni istaydi.

Biz ham aynan shu maqsadda ishlayapmiz. Agar bizning futbolchilarimizni Superliga klublari olayotgan bo‘lsa, demak, biz ularni yaxshi tarbiyalaganmiz. Demak, ularga talab bor. Shuning uchun futbolchilarimizning jamoadan ketishi biz uchun bir tomondan yo‘qotish bo‘lsa-da, boshqa tomondan bu ularning o‘sishi uchun yaxshi imkoniyat.

Hatto so‘nggi transfer oynasida ham bir nafar hujumchimiz jamoani tark etdi. Hozir u Samarqandda o‘ynayapti. G‘afur Haydarov. Albatta, uning ketishi biz uchun yo‘qotish. Lekin u Superligaga o‘tdi. Bu uning o‘zi uchun ham yaxshi. Demak, uni Superliga klubi tanladi. Bu esa biz uni to‘g‘ri tarbiyalaganimizni anglatadi.

Endi u yerda o‘ynasin, yanada rivojlansin. Biz esa o‘z ishimizni davom ettiramiz. Yosh futbolchilarni tarbiyalaymiz va boshqa yigitlarni ham yuqori darajaga olib chiqishga harakat qilamiz.

Ha, ularni asosiy tarkib futbolchilari, deb aytish mumkin. Ular asosiy tarkibda maydonga tushib, o‘yinlarda ishtirok etishyapti.

Umuman, biz Shukurdan ham, Panjidan ham mamnunmiz. Bilasizmi, bizdagi futbolchilarning deyarli barchasi bir yoshdagi yigitlar. 2005 va 2006-yillarda tug‘ilganlar. Yosh jihatidan hammasi deyarli teng.

Shukur va Panji esa hozir jamoada yetakchilik qilayotgan futbolchilardan hisoblanadi. 👍

Islom Ahmedov: «Hammasini 90 daqiqa vaqt mobaynida hal qilamiz, deb o'ylagandik»

O'zbekiston Kubogi 1/8 final doirasida «Andijon» o'z uyida pro liga vakili – «Olimpik Mobiuz»ni qabul qildi. Asosiy vaqt 2:2 bilan yakunlandi. Qo'shimcha vaqtlarda ham gol urilmadi. Penaltilar seriyasida mezbonlar 5:4 hisobida g'alaba qozonishdi.

O'yindan keyin «Andijon» bosh murabbiyi Islom Ahmedov matbuot anjumanida qatnashdi.

Juda og'ir kechgan o'yindagi qiyin g'alaba bilan barchani tabriklaymiz. O'yin bo'yicha hech nima o'xshamadi. CHempionatdagi eng yomon o'yinimizni ko'rsatdik, desak bo'laveradi. Eng muhimi, og'ir bo'lsa ham g'alabaga erishdik. O'yinni ko'rib chiqib tahlil qilamiz. Boshida aytgandik, baribir yoshlarda kuchliroq jamoaga qarshi o'ynash uchun, o'zini ko'rsatish borasida motivasiya ko'proq bo'ladi. Buni futbolchilarimizga tushuntirgandik. Baribir yakunda mensimaslik holati kuzatildi va bu o'yinda sezildi. Raqib o'yin tizginini ushlab oldi, bizda esa o'xshamadi. Ha, hujumlar ko'p qildik, vaziyatlarimiz ham bo'ldi, yakunlay olmadik. Umuman olganda, uchrashuv og'ir kechdi.

Birinchi bo'limdan keyin Martin Boake nega almashtirildi? U to'pni o'zida nazorat qilib turgandi va raqib himoyachilarini bo'yi pastligi evaziga Boakedan yana foydalanish mumkin emasmidi?

Ha, foydalanish mumkin edi. Lekin o'rtada to'p nazoratini berib qo'yayotgandik. Shu bois Draganni maydonga tushirib, to'pni ko'proq nazorat qilib, hujumlar tashkil qilishni reja qilgandik. Shu bois Martinni birinchi bo'limdan so'ng olishga majbur bo'ldik.

Qandaydir o'yinchilarda ko'zi yonmaslik holati kuzatildi. «Olimpik Mobiuz» pro ligada o'rtamiyona jamoalardan biri. «Andijon» esa Superligada. Ushbu raqibni asosiy vaqtda yuta olmasligiga nima yetishmadi?

Aytganimdek, birinchi o'rinda futbolchilarni ruhiy tayyorgarligi, o'yinga bo'lgan munosabati. Har qanday raqibni qanaqa ligada o'ynashidan qat'iy nazar hurmat bilan chiqib, professionalligini ko'rsatishi kerak edi. Biroz bo'shashishlik bilan maydonga chiqishdi. Shuni hisobiga ular o'yin tizginini «ushlab» olishdi. Raqibga o'zimiz o'ynasa bo'ladi, degan ishonchni berib qo'ydik. Shu bois ularda hamma narsa o'xshayverdi. Bizda esa gol urish uchun shoshilish kuzatildi va buning oqibatida ko'p xatolarga yo'l qo'ydik.

Ha, bunday rejamiz yo'q edi. Hammasini 90 daqiqa vaqt mobaynida hal qilamiz, deb o'ylagandik. Shunga tayyorgarlik ko'rgandik. To'g'risi, qo'shimcha daqiqalarga ham, penaltilar seriyasiga ham tayyorgarlik ko'rmagandik. Penaltilar seriyasi oldidan o'yinchilarni o'zlari tashabbus bilan chiqishdi. Kimda o'ziga ishonch bo'lsa, tepishlarini aytdik.

Eng asosiysi, tiklanishga e'tibor qaratamiz. Bugun ko'p kuch yo'qotdik. Ya'ni, «Nasaf» bilan uchrashuvga u qadar ko'p kuch yo'qotmagan holda yetib boramiz, deb o'ylagandik. Biz reja qilaveramiz, ammo Allohning rejalari boshqa. Xudoimni aytgani bo'ladi. Ko'proq tiklanishga e'tibor qaratamiz va bu o'yinda yo'l qo'yilgan xatolar ustida ishlaymiz.

Andronikashvili oxirgi uchrashuvlarda jarohat bilan o'ynayotgandi. Jarohati kuchayib ketganini hisobiga o'zimizda tibbiy ko'rikdan o'tdi va unga shifokorlarimiz ma'lum vaqt dam berish kerakligini aytishdi. Gruziyaga borib, u yerda ham tibbiy tekshiruvdan o'tdi va tiklanish jarayonini yurtida o'tkazyapti. Ochig'i, «Nasaf» bilan uchrashuvgacha tayyor bo'lmaydi. FIFA kunlarida safimizga qaytadi.

O'zbekiston Kubogi 1/8 finalidan o'rin olgan bahsda "Andijon" va "Olimpik Mobiuz" jamoalari to'qnash keldi. "Bobur arena"da kechgan murosasiz bahsda 120 daqiqa davomida g'olib aniqlanmadi. Penaltilar seriyasida esa asablar bizning tomonda bo'ldi — "Andijon" 1/4 finalda!

To'la stadion, oxirigacha qo'llab-quvvatlagan muxlislar — bu g'alaba sizniki ham. Rahmat!

"Andijon" – "Olimpik Mobiuz" – 2:2 (1:0). Qo'sh.v.0:0. Pen.seriyasi: 5:4.
15 sentabr. Andijon. "Bobur arena" stadioni. 5747 tomoshabin.

Hakamlar: Alisher Rahimqulov, Shoxruh A'zamov, Aziz Isoqov.
Zaxira hakami: Umidjon Rahimjonov
VAR: Jasur Muxtorov
AVAR: Sherzod A'zamov
Nazoratchi: Sulton Zaylobiddinov
Komissar: Qudrat Madraimov

"Andijon": Eldor Adhamov, Odil Abdumajidov, Islom To'xtaxo'jaev, Usmonali Ismonaliev, Bekzod Sulaymonov (Shoxjahon Yorqinboev, 95), Muhammadkarim Toirov, Damir Temirov (Po'latxo'ja Xoldorxonov, 59), Doniyor Abdumannopov (Abdurahmon Komilov, 46), Imeda Ashorita (Aziz Turg'unboev, 59), Rustam Turdimurodov (Xamidullo Karimov, 76), Martin Boake (Dragan Cheran, 46).

"Olimpik Mobiuz": Asqar Qudratov (Shaxboz Ismatullaev, 105), Muhammadali Zoxidov, Meyirbek Rejabaliev, Bunyod Rahimov, Fazliddin Zuxriddinov (Zayniddin Xamraboev, 46), Muhammaddiyor Ma'rifaliev, Abdushukur Maxamatov, Abduaziz Abdurashidov, Diyor Tojiboev (Daler Tuxsanov, 46), Begis Kuanishbaev (Jo'rabek Jo'raev, 90+7), Ravshan Abdumannopov (Ulug'bek Maratov, 90+7).

Gollar: Imeda Ashortia, 43 – 1:0. Rustam Turdimurodov, 47 – 2:0. Ravshan Abdumannonov, 52 – 2:1. Daler Tuxsanov, 57 – 2:2.

Ogohlantirishlar: Usmonali Ismonaliev, 43. Odil Abdumajidov, 67. Shoxjahon Yorqinboev, 100. Dragan Cheran, 103. Aziz Turg'unboev, 112 – Muhammadali Zoxidov, 90+13. Zayniddin Xamraboev.

🏅 UCHRASHUVNING ENG YAXSHISI

Bugun bu unvon — senga, Rustam! 👏

⚽️ 76-daqiqa. Golni sen kiritding. Yakuniy hisob — Andijon 2:1 Qo‘qon-1912.

Muxlislar 655 ta ovoz berdi. Ulardan 188 tasi — 29% — senga tegishli.

Keyingi o'rinlarda:

· Ashortia — 117 ovoz

· Abdumannopov — 103 ovoz

· Sulaymonov — 88 ovoz

Tabriklaymiz, Rustam! Shu ishonch, shu o'yin davom etsin — omad hamisha yoningda bo'lsin. 💙❤️

Bunday o'yinlar uchun butun jamoaga rahmat 🙌

Ovoz bergan har bir muxlisga rahmat — tanlov sizniki edi.

Imeda Ashortia: “Gol urganim va jamoaga uch ochkoni qo'lga kiritishda yordam berganimdan xursandman”

“Andijon”ning vodiy derbisi doirasida “Qo'qon-1912” klubiga qarshi uchrashuvida 90+1-daqiqada gruziyalik Imeda Ashortia g'alaba keltiruvchi golga mualliflik qildi.

Ushbu futbolchi klub matbuot xizmati uchun o'z fikrlari bilan o'rtoqlashdi.

“Avvalo, barcha narsa uchun Xudoga shukr aytaman. Kechagi o'yin, deyarli barcha uchrashuvlar kabi, biz uchun juda muhim edi. Ayniqsa, bu derbi bo'lgani uchun uning ahamiyati katta edi. «Paxtakor»dan uchralgan mag'lubiyatdan keyin psixologik jihatdan uch ochko olish biz uchun juda muhim edi.

O'z golim haqida gapiradigan bo'lsam, yana bir bor barcha narsa uchun Xudoga shukr aytaman. Gol urganim va jamoaga uch ochkoni qo'lga kiritishda yordam berganimdan xursandman. O'z muxlislarimiz qarshisida bu o'yinni qiyin bo'lsa-da, oxirigacha yetkazib, g'alaba qozonganimiz juda hissiyotli lahzalarga boy bo'ldi.

Hozir esa oldimizda juda muhim davr turibdi. Shu tarzda davom etishimiz, o'yin sifatini ham, natijalarni ham yanada yaxshilashimiz kerak. Xudo xohlasa, buning uddasidan chiqamiz”, - dedi Imeda “Andijon” klubi matbuot xizmatiga.

👍

Xarakter, ishtiyoq va shijoat. Yakunda irodali g'alaba❤️

“Bobur arena” yana bir qaynoq muhitdagi unutilmas va asosiysi, yoqimli g'alabaga asoslangan o'yinga mezbonlik qildi.

Albatta, uchrashuv kutilganidek og'ir kechdi. Raqib “Qo'qon-1912” edi va bu o'z-o'zidan vodiy derbisi deb nomlanadi. Stadionda muxlislar doimgidek yevromacha muhitni yaratishdi va bu o'zgacha zavqli edi.

Bahsni mezbonlar xavfli hujumlar bilan boshladi. Ismonaliev, Turdimurodov kabi o'yinchilarning zarbalari xavfli chiqdi. Keyinchalik esa qo'qonliklar ancha faol o'ynay boshladilar. Natijada 18-daqiqada Nimeli hisobni ochdi. Bo'lim oxiraga qadar mezbonlarning uyushtirgan hujumlari besamar bo'ldi. Qolaversa, raqib jiddiy qarshilik ko'rsatdi.

Tanaffusdan keyin “Burgutlar” kutilganidek o'yin shiddatini yanada oshirishdi. Golga yaqin kelgan maydon egalari nihoyat 76-daqiqaga kelib o'z maqsadiga erishdi. Rustam Turdimurodov “Andijon”ga qaytgach, dastlabki golini kiritishga muvaffaq bo'ldi. Uchrashuvning kulminasion nuqtasi esa 90+1-daqiqada yuz berdi. Zaxiradan maydonga tushgan Imeda Ashorita jarima maydoni ichida o'zining aniq zarbasi bilan g'alaba keltruvchi gol muallifiga aylandi.

Butun jamoa munosib o'ynadi, munosib kurashdi va xarakter ko'rsatib, oxirigacha g'alaba uchun intilishi evaziga yakunda uch ochkoni qo'lga kiritishga muvaffaq bo'ldi.

Endi keyingi o'yin 15 sentabr kuni “Bobur arena”da O'zbekiston Kubogi nimchorak finali doirasida “Olimpik Mobiuz”ga qarshi bo'lib o'tadi.

“Andijon” – “Qo'qon-1912” – 2:1 (0:1).
10 sentabr. Andijon. “Bobur arena” stadioni. 6427 tomoshabin.

Hakamlar: Shavkat Nasibullaev, Avaz Abdullaev, Baxtiyorxo'ja Shavkatov
Zaxira hakami: Nurbek Sheraliev
VAR: Ahrol Risqullaev
AVAR: Andrey Sapenko
Nazoratchi: Baxtiyor Namozov
Komissar: Sherzod Rajabov

“Andijon”: Eldor Adhamov, Odil Abdumajidov, Nemanya Chalasan, Abdurahmon Komilov (Bekzod Sulaymonov, 66), Usmonali Ismonaliev, Muhammadkarim Toirov, Damir Temirov, Aziz Turg'unboev (Imeda Ashortia, 66), Po'latxo'ja Xoldorxonov (Doniyor Abdumannopov, 59), Rustam Turdimurodov, Martin Boake.

“Qo'qon-1912”: Rahimjon Davronov, Ibrohim Yo'ldoshev, Jasur Yoqubov, Alisher Salimov, Shaxzod Akramov, Muhammadasan Hasanov (Akbar O'ktamov, 66), G'ulom-Haydar Haydarov, Shota Gvazava, Javohir Sidiqov (Andro Giorgadze, 80), Iqbol Maklijonov, Silvanus Nimeli (Elbek Yo'lchiev, 80).

Gollar: Silvanus Nimeli, 18 – 0:1. Rustam Turdimurodov, 76 – 1:1. Imeda Ashortia, 90+1 – 2:1.

Ogohlantirishlar: Po'latxo'ja Xoldorxonov, 45. Muhammadkarim Toirov, 51. Rustam Turdimurodov, 76. Branko Chirich, 90+1 (jismoniy tayyorgarlik bo'yicha murabbiy) – Shota Gvazava, 72.

Kamoliddin Tojiyev: «O‘yin to‘liq nazoratimizda o‘tdi»

«Paxtakor» - «Andijon»(3:0) o‘yindan keyin mezbonlar ustozi Kamoliddin Tojiyev matbuot anjumanida ishtirok etdi.

Assalomu alaykum. O‘yin haqida keladigan bo‘lsak, uchrashuvni to‘liq o‘z qo‘limizda o‘tkazdik — birinchi bo‘limda ham, ikkinchi bo‘limda ham. Vaziyatlar yaratdik va imkoniyatlarimiz gol bilan yakunlandi, gol urdik. Undan oldingi o‘yinlarda vaziyat yaratib, gol ura olmay turgan edik, bu safar esa yaratilgan vaziyatlardan gol urdik va g‘alaba qozondik. Yigitlarga ham har doimgidek rahmat deyman. Bizda fidoyilik oxirigacha bo‘ldi, kurashishdi va g‘alaba qozondik.

— Hisob 3:0, raqib bir futbolchi kam qoldi. Zaxiradan maydonga, adashmasam, bitta yosh o‘yinchi tushdi...

Ular ham yoshlar ligasida juda qiyin o‘yin o‘tkazishdi. O‘zi jami o‘n bitta odamimiz bor. U-21da ham ular kecha 1:2 yutqazib turgan paytda, oxiri 3:2 yutishdi. O‘shanda ham ular juda ko‘p kuch yo‘qotdi. Sardor ikkita gol urganiga, undan oldin ham gol urgandi, o‘shanga Sardorga imkoniyat berdik. Ular ham kecha ko‘p kuch yo‘qotdi. Ko‘plab yigitlar yoshlar milliy jamoasiga ketishgan edi.

— «Neftchi»ga qarshi o‘yin Kamoliddin Tojiyev uchun oxirgi imkoniyat deyilgandi. Lekin siz hali ham jamoani boshqaryapsiz. Umuman olganda, hozirgi holatda ishlash qanchalik qiyin bo‘ldi? O‘sha gaplar to‘g‘rimi edi?

O‘tgan safar ham aytdim, bunaqa gap yo‘q, rahbariyatdan ham, hech qayerdan bunday gap bo‘lgani yo‘q. Bilmayman, kim buni qayerdan chiqardi, unday gap yo‘q edi. Jamoa yutqazmayapti-da. To‘g‘ri, durang o‘ynab qo‘yyapmiz, hali ham chempionlik uchun kurashyapmiz. Bilmayman, qayerdan bu gap chiqdi.

— O‘zingiz uchun ishlash qanday bo‘lyapti? Bu gaplar hozir ta’sir qilmaydimi, bosim bormi?

Hamma narsaga ahamiyat beraverilsa, qiyin bo‘ladi.

— O‘qimaysizmi, mediani?

O‘qiymiz. Lekin biz faqat jamoaga, keyingi o‘yinga tayyorgarlikka e’tibor qaratib, o‘shaning ustida ishlaymiz.

— Muhammadrasul Abdumajidov transferi bo‘yicha. O‘shanda ham asosiy aybdor deb Kamoliddin Tojiyev ko‘rsatildi. Aslida nima bo‘ldi, rostdan klub uni qo‘yib yuborishni istamagandimi?

Birinchidan, klubga rasmiy xat kelgani yo‘q edi. Klub ham buni yozib chiqdi — rasmiy xat kelmadi, faqat agentidan xat keldi. Ikkinchidan, Rasulning o‘zi ham jamoani hozir tashlab ketishni xohlamadi, «Men qolaman», dedi. Uchinchidan, u yanvarda allaqachon shartnoma imzolab bo‘lgan va «Brest»ga ketadi, bir yilga ijaraga.

— Demak, qishda aniq ketadi hozirgi paytda?

Ha, yanvarda aniq ketadi, bir yilga.

— Iroq «Paxtakor» translyatsiyalarni xarid qilgan. Shundan keyin iroqlik futbolchilarda sermahsullik oshyapti. Bu tasodifmi yoki...

Ularga ham aytaman: «Sizlarni Iroqda ham ko‘rsatishyapti, chiqib yaxshi o‘ynashlaring, o‘zingizni ko‘rsatishlaring va jamoaga yordam berishlaring kerak», deb. Bundan oldin Bashar ham gol urardi, Zayd ham gol urgan.

— Kamoliddin aka, sizni va «Paxtakor» rahbariyatining qarorlarini tanqid qilayotganlar bor: Hamraliyev, Xolmatov, Azmiddinov kabi futbolchilarni berib yubordi, eronlik esa jarohat olib qoldi. Nega ularni qo‘yib yuborib, Abdumajidovni qo‘yib yubormadi, deyishyapti...

Bizning transfer oynamiz yopilgandan keyin chiqishdi. Undan oldin rasmiy xat bilan chiqqanida, biz hech qachon ushlab o‘tirmaymiz. Biz har doim qo‘yib yuboramiz. O‘tgan yili ham Muhammadrasulni mavsum o‘rtasida Belgiyaga qo‘yib yuborgandik. Shunchaki, bu safar shunday vaziyatga tushib qoldiki, transfer oynasi yopilib bo‘lgan edi. Undan oldin aytishganda, biz Hamraliyevni qo‘yib yubormasdik, Azmiddinov bor edi, uni bemalol qo‘yib yuborardik. Bunga rasmiy xat kerak, klubga rasman murojaat qilish kerak.

— Vladimir Nazarov milliy jamoaga borib yuradigan darvozabon edi. Menimcha, o‘sha «Neftchi»ga qarshi Superkubokdagi xatosidan keyin ancha o‘ynamay qo‘ydi. Adashmasam, may oyidan beri o‘ynamayapti. Shu haqida nima deysiz?

Unga ham imkoniyat beramiz. U ham mashg‘ulotlarda ishlayapti, xafagarchiligi yo‘q. Ishlayapti, kutyapti. Biz ham uni ko‘ryapmiz va unga imkoniyat beramiz, u ham o‘ynaydi. Hali o‘yinlarimiz ko‘p.

— Klub rahbari Jahongir Ortiqxo‘jayev «Paxtakor»da qoladigan bo‘ldimi yoki ketadimi? Hali rasmiy xabar chiqmadi.

Jahongir Ortiqxo‘jayev hali ham biz bilan klubda, hamma joyda birgamiz. Gapirishyapti ketdi deb, lekin rasman ketganlari yo‘q, hamon klubda.

— «Neftchi» — «Nasaf» o‘yini natijasini bilib turganmidingiz?

Yo‘q, faqat birinchi bo‘limdan keyingi hisobni bildim. Bizning oldimizda o‘z o‘yinimiz turibdi, o‘zimizning o‘yinlarimizni yutsak bo‘ldi.

— «Nasaf»dan shunday g‘alabani kutgandingizmi?

Yo‘q, kutmagandik.

"Andijon"ga qarshi bahsdan keyin jamoamiz ustozi matbuot anjumanida qatnashdi.

Tojiyev: - Bugun bellashuv boshidanoq juda yaxshi o'yin namoyish qilib, to'liq ustunlikka erishdik. Avvalgi uchrashuvlarda bizga vaziyatlardan foydalanish yetishmagandi. Ushbu bahsda yaratilgan imkoniyatlarni golga aylantira oldik. Doim kamchiliklar ustida ishlashda davom etamiz. Futbolchilarga doimgidek borlarini berishgani uchun rahmat aytaman. Chempionlik uchun imkonimiz bor ekan, kurashishni to'xtatmaymiz.

Ayman jamoaga kirishib ketishga intilmoqda. Gol urishga intildi. Ikkinchi bo'limda raqib darvozabonining qizil kartochka olishiga aynan u sababchi bo'ldi.

Andijon futbolchisi Mahmud Mahamadjonov faoliyatini Rossiyaning Dinamo Maxachqala klubida davom ettiradi.

Liga futbolchiga yangi jamoada omad va zafarlar tilaydi!

Martin Boake: «Biz o'z o'yinimizni namoyish qilishimiz kerak. Muhimi shu»

«Andijon»ning italiyalik hujumchisi Martin Boake o'tgan turda qahramonga aylandi. U «Bobur arena»da «Xorazm» jamoasiga qarshi bo'lib o'tgan uchrashuvda zaxiradan maydonga tushib raqib darvozasini ishg'ol qildi va uning yagona goli «Burgutlar»ga uch ochko keltirdi.

Endilikda u jamoasi bilan «Paxtakor»ga qarshi o'tadigan navbatdagi muhim bellashuvga jiddiy hozirlik ko'ryapti. Muxlislar esa ushbu hujumchidan yana gollar kutishlari tabiiy.

Boake o'tgan turdagi goli va bo'lajak o'yin borasida bir qator savollarga javob qaytardi.

- Martin, hozirgi vaqtda «Paxtakor»ga qarshi muhim uchrashuvga tayyorgarlik jarayoni qanday kechmoqda?

- Bilasizmi, biz har doimgidek, yaxshi va qattiq mehnat qilyapmiz. O'yinga jiddiy tayyorgarlik ko'ryapmiz.

- Uch uchrashuvlik diskvalifikasiyadan so'ng «Xorazm»ga qarshi bahsda maydonga qaytdingiz va jamoaga g'alabani taqdim etgan yagona golni urdingiz. Zaxiradan maydonga tushayotganingizda gol urishingizni his qilganmidingiz?

- Men yaxshi o'ynash va jamoaga yordam berishga e'tibor qaratdim. Xudoga shukr, gol urish imkoniyati berildi va men undan foydalandim. Albatta, jamoamning g'alabasiga hissa qo'shganimdan juda xursandman.

- Diskvalifikasiya paytida motivasiyangiz va g'alabaga bo'lgan intilishingiz yanada kuchaydimi?

- Yanada yaxshiroq harakat qilish uchun o'zimni rag'batlantiryapman. Chunki qizil kartochka olib, xato qildim. Shuning uchun buni doim yodda tutib, bundan keyin bunday xatolarni takrorlamaslikka va har doim yaxshiroq o'ynashga harakat qilaman.

- O'zbekiston chempionatida eng kuchli hujumchi kim, deb hisoblaysiz?

- Aytishim mumkinki, bu ligadagi barcha hujumchilar yaxshi. Birortasini ajratib ko'rsatmayman.

- Chempionatimizda siz uchun noqulay himoyachilar bormi?

- Rosti, bilmayman (kuladi).

- «Paxtakor»ga qarshi uchrashuvdan nimalar kutyapsiz? Yana bir gol urishingizga qanchalik ishonchingiz komil?

- Keling, Xudo bizga nima berishini ko'ramiz. Lekin biz o'z o'yinimizni namoyish qilishimiz kerak. Men uchun eng muhimi shu.

- Ayni paytda hisobingizda uchta gol bor. Chempionat yakuniga qadar nechta gol urishni xohlardingiz?

- Umid qilamanki, hali ko'p-ko'p gollar uraman.