Toshkentning "Paxtakor" klubi O'zbekiston chempionati tarixida 1000-o'yinini o'tkazdi. Jamoa g'alaba va gollar soni bo'yicha rekordchi hisoblanadi.
"Lokomotiv"ga qarshi bahs jamoamiz uchun O'zbekiston chempionatidagi 1000-bellashuvga aylandi. Ulardan 672tasida "Sherlar" g'alaba qozongan. 166 o'yin durang bilan yakunlangan va 162 uchrashuvda imkoniyat boy berilgan.
Raqib darvozasiga kiritilgan to'plar soni 2197taga yetdi. Darvozamizdan 853 to'p o'tkazilgan. Jamoamiz O'zbekiston chempionati tarixida g'alaba qozonish, gol urish va ochko to'plash bo'yicha rekordchi sanaladi.
Navbahor yarim himoyachisi Ruslanbek Jiyanov O'zbekiston Superligasi doirasidagi bahsda klub tarixidagi 1600-gol muallifiga aylandi.
O'zbekiston Superligasining 12-turidan o'rin olgan Navbahor – OKMK (2:3) bahsida jamoa yubiley – 1600-golini urdi. Ushbu golga mazkur uchrashuvning 8-daqiqasida jarima maydonchasi tashqarisidan kuchli zarba yo'llab, olmaliqliklar darvozasini ishg'ol etgan 25 yoshli yarim himoyachi Ruslanbek Jiyanov mualliflik qildi.
Shu tariqa, Jiyanov Navbahorning yubiley gollarini urgan futbolchilar ro'yxatidan joy oldi.
Biz ushbu muvaffaqiyat bilan Ruslanbek Jiyanovni tabriklaymiz.
“Navbahor” klubi O'zbekiston milliy chempionatlaridagi 1000-o'yinini o'tkazdi. Jamoa statistikasi bilan tanishing.
Jamoamiz kecha O'zbekiston milliy chempionatlari tarixidagi o'zining 1000-o'yinini o'tkazdi.
Ortda qolgan 1000 ta bellashuvda “Navbahor” 460 ta g'alaba, 220 ta durang, 320 ta mag'lubiyatni qayd etgan holda, raqiblar darvozasiga 1601 ta gol urib, o'z darvozasidan 1155 ta to'p o'tkazib yuborgan va jami 1600 ochko jamg'argan.
Jamoamizga keyingi o'yinlarda omad yor bo'lib, “Navbahor” milliy chempionatlarimizdagi umumiy statistikasini ancha yaxshilaydi, degan umiddamiz hamda bu borada “lochinlar”ga omad yor bo'lishini tilab qolamiz.
Lokomotiv stadioni VAR tizimi bilan jihozlandi. Bu ishlar hakamlik qarorlarining haqqoniyligini ta’minlash va xalqaro standartlarga moslashishga xizmat qiladi.
Lokomotiv jamoasi stadioniga VAR texnikasi o‘rnatildi.
Prezidentning 262-sonli qarori ijrosini ta’minlash hamda futbol uchrashuvlarini yuqori saviyada tashkil etish maqsadida mamlakatimiz stadionlarida markazlashgan VAR tizimidan foydalanish uchun maxsus texnikalarni o‘rnatish ishlari jadal davom etmoqda.
Hozirda Lokomotiv stadioniga VAR texnikalarini joylashtirish ishlari to‘liq yakunlandi.
Mazkur sa’y-harakatlar hakamlik qarorlarining haqqoniyligini ta’minlash, shuningdek, o‘zbek futbolining xalqaro standartlarga mosligini oshirishga xizmat qiladi.
«Lokomotiv» stadioni xavfsizlik xodimlari «Match TV» muxbiriga nisbatan kuch ishlatib, uni kaltaklashdi va telefonidagi videolarni o'chirishga majbur qilishdi.
⚽ «Match TV» muxbiriga nisbatan «RJD-Arena» yaqinida zo'ravonlik va kamsitish holatlari yuz berdi.
«Akron» bilan o'yindan so'ng jurnalist o'z ishini bajarib, stadion tashqarisida spikerlarni kutayotgan edi. Soat 21:30 atrofida xavfsizlik xizmati xodimlari uni qo'pol tarzda hududni tark etishni talab qilishdi. Muxbir reglamentga ko'ra u yerda 22:00 gacha qolishi mumkinligini aytib, hayron qoldi. Uni haqorat qila boshlashdi va jismonan tashqariga itarib chiqarishdi. Muxbir bularni telefonga tasvirga ola boshlaganida, qo'riqchilar uni qo'lga olishdi.
Ular muxbirning qo'llarini qayirib, kuzatuv kameralari ko'rinmaydigan chodir ortiga sudrab ketishdi. U yerda uni tiz cho'ktirishib, videolarni o'chirish uchun parolni talab qilib, boshi bilan telefonga urishdi. Muxbir rad etganidan so'ng, uni kaltaklab, og'riqli usullarni qo'llashdi. Hayotiga tahdid ostida u parolni berishga majbur bo'ldi va ular telefonidagi videolarni o'chirib tashlashdi. So'ngra uni qo'l-oyog'idan ko'tarib, stadion hududidan tashqariga uloqtirishdi.
Muxbir jarohatlarini va telefon g'ilofidagi shikastlanishlarni travmpunktda qayd etdi. Ish bilan IIV qiziqib qoldi. Dushanba kuni «Match TV» «Lokomotiv» klubiga kuzatuv kameralari yozuvlarini taqdim etish va aybdorlarga nisbatan qat'iy choralar ko'rish talabi bilan xat yubordi. Rasmiy javob hali olinmagan, ammo Cherkizovoda javob tayyorlanmoqda va og'zaki uzr so'ralgan. Yaqin orada klub bosh direktori o'rinbosari Balashov va kanal bosh prodyuseri o'rinbosari Konov o'rtasida uchrashuv o'tkazilishi rejalashtirilgan, — deya xabar bermoqda Karp.
Bu jurnalistik faoliyatga to'sqinlik qilish va jinoiy ish hisoblanadi. «Spartak» muxlislar klubining sobiq rahbari Korshunov «Lukoyl-Arena» yaqinida RBK muxbirining yuziga urgani uchun shartli muddat olgan edi.
O'zbekiston milliy va olimpiya terma jamoalarida 15 yildan ortiq ishlagan massajchi Gurgen Israyelyan terma jamoadagi faoliyatini yakunladi.
O'n besh yildan ziyod vaqt mobaynida O'zbekiston milliy va olimpiya terma jamoalarida faoliyat yuritib kelgan tajribali massajchi Gurgen Israyelyan terma jamoadagi faoliyatini tugatganini ma'lum qildi.
O'zbekiston milliy va olimpiya terma jamoalarida ko'p yil mehnat qildim, turli murabbiylar bilan ishladim, bir nechta katta musobaqalarda ishtirok etdim. Buning uchun hammaga katta rahmat. Men uchun Jahon chempionatiga borish faoliyatimda katta voqea bo'ldi. Endilikda bor e'tiborimni "Lokomotiv"dagi ishimga, shuningdek sport reabilitatsiyasi bo'yicha jarohatdan tiklanayotgan sportchilarga ko'maklashishga qaratmoqchiman.
Navbahor va Paxtakor klublari O'zbekiston Superligasi tarixida 1000-o'yinini o'tkazadigan ilk jamoalarga aylanadi.
Bugun jamoamiz O'zbekiston Superligasining 12-turidan o'rin olgan bahsni o'z maydonida OKMKga qarshi o'tkazadi.
Ma'lumki, “Navbahor” milliy chempionatimizga asos solinganidan buyon Superliganing muntazam ishtirokchisi bo'lgan ikki jamoaning biri (“Paxtakor” bilan birgalikda) hisoblanadi. Bugungi o'yin “lochinlar”ning milliy chempionatimizdagi yubiley – 1000-uchrashuvi hisoblanadi.
Shuningdek, bugun o'z maydonida “Lokomotiv”ni qabul qiladigan “Paxtakor” ham Superligadagi 1000-o'yinini o'tkazadi va ushbu ikki klub milliy chempionatimizda minglik dovonni ilk bora zabt etgan jamoalar sifatida tarixdan joy oladi.
Bo'lajak 1000-uchrashuvda vakillarimizga omad yor bo'lib, muxlislarga quvonch ulashishlariga tilakdoshmiz.
