Lokomotiv — yangiliklari Matbuot

Mirko Yelichich:

Og'ir o'yin bo'ldi. "Dinamo"ga qarshi doimo yaxshi o'yinlar bo'lgan. Bu jamoa ochiq o'yin namoyish qilishga tayyor. Biz ham shunday ochiq o'yin ko'rsatadigan jamoamiz. Bu kabi o'yinlar ham bo'lib turadi, bugun raqib bizdan yaxshiroq o'ynadi. Yaxshi o'yin ko'rsata turib, 3 ochkoni boshqasi olishi albatta, yoqimli emas. Chiroyli o'yin ko'rsatgani uchun raqiblarni tabriklayman. Biz esa oldinga intilishda davom etamiz.

— O'tgan o'yinda Aleksey Kozlovning qizil kartochkasidan keyin rejalarda o'zgarishlar bo'ldimi?

Bu haqda gapirish juda qiyin. Nikita Shevchenko bunday o'yinlarda o'ynamagan va albatta, bosimni his qilishi tabiiy. O'yinni xato bilan boshlagandan keyin u o'ziga kelishi qiyin bo'ldi.

Jamoamiz bosh murabbiy Aleksandr Xomyakovning uchrashuv haqida fikrlari:

Kutganimizdek, o‘yin juda og‘ir kechdi. Ayniqsa, bahsning so‘nggi daqiqalari juda keskin o‘tdi. Bu oson o‘yin bo‘lmasligini avvaldan bilardik. Yigitlarga rahmat aytaman. Ular uzoq vaqtdan keyin o‘z maydonimizda o‘ynashdi va muxlislarimizni xursand qilishni istashdi. Birinchi bo‘limda, ayniqsa uning boshlanishi va o‘rtalarida rejalashtirgan ishlarimizning ko‘pi amalga oshdi, yaxshi imkoniyatlar yaratdik. Ammo ikkinchi bo‘limda, ayniqsa o‘yin oxirida, son jihatidan ustun bo‘lishimizga qaramay, kelishilgan rejadan chetga chiqib ketdik. Hujum qilish o‘rniga hisobni saqlab qolishga harakat qilib, past blokda himoyalanishga o‘tib oldik. Yaxshiyamki, hisobni saqlab qolishga erishdik. Eng muhimi, bugun uch ochkoni qo‘lga kiritganimizdan xursandman.

— Bugungi g‘alaba bilan tabriklaymiz. Raqib bir kishi kam bo‘lib qolganidan keyin nega qarshi hujumlar kamayib ketdi? Bu hisobni saqlab qolish uchun qilingan taktika edimi yoki futbolchilar berilgan vazifani bajara olishmadimi? Qarshi hujumlarda tezlik yetishmadi, ko‘p holatlarda to‘pni ushlab qolish bilan cheklanishdi.

Ikkinchi bo‘lim boshlarida raqib darvozasi oldida imkoniyatlarimiz bo‘lmadi, deb aytolmayman. Lekin 60-daqiqalardan keyin jismoniy jihatdan kuch yetishmay qoldi. Raqibning zaxiradan tushgan futbolchilari o‘yinga yaxshi kirishdi va himoyamizga katta bosim o‘tkazishdi. Bizda esa zaxiradan tushgan futbolchilar o‘yin ritmiga to‘liq moslasha olishmadi va jamoaga kutilgan darajada yordam bera olishmadi. Shuning uchun ham aytamanki, bu juda og‘ir o‘yin bo‘ldi, oxirgi daqiqalari esa haqiqiy asab sinoviga aylandi. Afsuski, ikkinchi bo‘limda asosan himoyalanishga majbur bo‘ldik. Ammo eng muhimi — natijani saqlab qoldik. Hozirgi vaziyatda uch ochko olganimizdan mamnunman. Balki ayrim vaziyatlarda mahorat yetishmadi, ayrim paytlarda esa sabr kamlik qildi. Lekin futbolchilarning fidoyiligi har doimgidek yuqori darajada bo‘ldi. Ular bor kuchini maydonda qoldirishdi.

— Filipovichni qachon maydonda ko‘rishimiz mumkin? Uning jarohati haqida ham ma’lumot bersangiz.

Filipovich tiklanish jarayonini deyarli yakunladi. Ma’lumotlarga ko‘ra, u to‘liq sog‘ayish arafasida va yaqin kunlarda jamoa mashg‘ulotlariga qaytadi. U tezroq safga qaytib, avvalgidek jamoaga yordam berishini umid qilyapmiz.

— Yaqinda Bashelaishvili jamoani tark etdi. Uning o‘rniga akademiyadan yana futbolchi jalb qilish imkoniyati bormi? Iqtidorli o‘yinchilar ko‘p, ammo hozircha faqat ikki nafar yosh futbolchiga imkoniyat berilmoqda. Buning sababi nimada?

Biz Bashelaishvili bilan shartnomani bekor qildik. Uning o‘rniga boshqa futbolchini jalb qilish masalasini hozircha ko‘rib chiqmayapmiz. Albatta, jamoani kuchaytirish uchun kamida yana bir-ikki nafar futbolchi kerakligini yaxshi tushunaman. Hozircha vaziyat shu.

— Jamoa nega 90 daqiqa davomida bir xil sur’atda o‘ynay olmayapti? Buning asosiy sababi nima, deb o‘ylaysiz?

O‘zi qaysi jamoa 90 daqiqa davomida bir xil tempda o‘ynay oladi? Buning iloji yo‘q. Biz kuchga asoslangan futbol o‘ynaymiz. Hozirgi iqlim va ob-havo sharoiti butun o‘yin davomida doimiy pressing va bosim o‘tkazish imkonini bermaydi. Qolaversa, «Lokomotiv»ga qarshi tinimsiz bosim bilan o‘ynash ham xavfli. Ular pressingdan yaxshi chiqib keta oladi va himoya ortida katta bo‘shliqlar qoldirishimizga sabab bo‘ladi. Bu esa katta tavakkalchilik. Faqat chiroyli futbol ko‘rsatish uchun ochilib o‘ynab, keyin o‘z darvozamiz oldida muammoga duch kelishning hech qanday ma’nosi yo‘q. Ayni paytda taqvim juda zich, ob-havo ham og‘ir. Futbolchilarni to‘liq tiklab olishga ulgurmayapmiz. Jarohatlar, charchoq — bularning hammasi to‘planib bormoqda. Amalda deyarli bir xil tarkib bilan o‘ynayapmiz. Futbolchilar robot emas, ular ham inson. Shuning uchun ulardan har doim bir xil darajadagi tempni talab qilish qiyin. Shu bois yana bir bor yigitlarga bugungi maydonda ko‘rsatgan fidoyiligi uchun minnatdorchilik bildiraman.

"Lokomotiv" hamda "Andijon" (3:3) o'rtasidagi uchrashuvdan keyingi matbuot anjumanida jamoa ustozi Islom Ahmedov savollarga javob qaytardi.

G'alabaga teng durang bilan barcha andijonlik muxlislarni, viloyat hokimimizni tabriklaymiz. Yigitlarimizga oxirigacha kurashgani va xarakter ko'rsatishgani uchun katta rahmat. O'yinga keladigan bo'lsak, qiyin kechishini bilardik. Sababi, bizda biroz ruhiy tushkunlik bor edi. Boisi, o'z maydonimizda "Surxon" jamoasiga yutqazib qo'ygandik. Qolaversa, qator o'yinchilarimizda jarohatlar ham bor edi. Shuning uchun uchrashuvni og'ir kechishini bilardik. Lekin Xudoga shukr, ikkinchi bo'limda o'yin tizginini qo'limizga olib, durangga erishdik.

- Ruhiyat haqida gapirdingiz. Shu haqida batafsilroq bilmoqchi edim. Jamoada moliyaviy holat yaxshi deb eshitganman. Bundan tashqari, natijalar ham yomon emasdi. Ruhiy holat nimadan kelib chiqyapti?

Ruhiy holat faqat pul bilan bog'liq emas. Xudoga shukr, jamoamizda sharoit, mablag' tomonlama hech qanaqa muammo yo'q. Xorijga chiqib yig'in o'tkazib keldik. Baribir orada katta tanaffus bo'ldi. Shundan keyingi birinchi o'yinimizni uyimizda o'tkazdik. Baribir u yerda muxlislarni bosimi va yigitlarda xalqimiz oldida g'alabaga erishishimiz kerak, degan javobgarlik ularni bosib qo'ydi va o'sha o'yinda erkinroq harakat qila olishmadi. O'z-o'zidan uyimizda mag'lubiyatga uchraganimizdan keyin bu yerdagi uchrashuvda yana ruhiyat bilan ishlashimizga to'g'ri kelardi. Birinchi taymda ishonch biroz o'z ta'sirini bildirdi.

- O'tgan o'yindan keyin jamoa FIFA taqiqini hal qildi degandingiz. Xabarimizga ko'ra, hali ham bu muammo to'liq hal bo'lmagan ekan. Masalan, Artyom Odinsov bilan ham shunday muammo bor ekan...

Bu holat bo'yicha rahbariyatimiz bilan gaplashganmiz. Qarzdorliklarni hammasini yopib, bu haqida FIFAga jo'natildi. Aytishi bo'yicha, bank orqali o'tadi va aynan shu jarayonda qaerdadir uzilish bo'lib qolgan. Biroq FIFAga to'lov amalga oshirilgani to'g'risida xat yuborilgan. Xudo xohlasa, ertaga shu taqiq yechilib qolsa kerak. Biz ham kutyapmiz.

- Martin Boake qaydnomadan o'rin olmayapti. Uni ketishi mumkin deb ham eshitdik. Qolaversa, Ashorti ham bugun qaydnomada yo'q edi...

Ashortiga kelsak, oxirgi mashg'ulotimizda jarohat olib qoldi. Boake yozgi yig'inni biz bilan birga o'tkazdi. Kelganidan keyin biroz jarohat olib, uyiga ketdi va davolandi. Kuni kecha safimizga qo'shildi va uni ham keyingi uchrashuvlarga tayyorlab boramiz.

- "Andijon" qaysi jihatlarda yutdiyu va qaysi jihatlarda yutqazdi?

To'g'risi, o'yinni ko'rib, tahlil qilgach aytish osonroq edi. Ko'proq muvozanatda va qarshi hujumda o'tkazib yubordik. Shu tomonlama yutqazdik. Birinchi bo'limda hujumga o'tishda ozgina shoshildik. Ikkinchi taymda to'pni nazorat qildik, rejalashtirilganidek, Dragan Cheranni tanaffusdan so'ng maydonga tushirdik. Dragan orqali o'yinni tuzishni reja qildik va bu amalga oshdi. To'p nazorati bizga o'tgani foydamizga ishladi.

"Lokomotiv" bosh murabbiyi Mirko Yelichich o'tgan o'yin borasida o'z fikrlari bilan o'rtoqlashdi:

"O'yinni ko'proq nazorat qilgandik. Ikki ochko yo'qotdik"

- Muxriddin Zoirov, Islombek Baratov va Lazizbek Mirzayev jamoani tark etishdi. Bu haqda nima deya olasiz?

Istalgan futbolchidan ketkazish oson emas. Ularning barchasi ikkinchi davrada ko‘proq o‘ynashlari kerak. Istalgan futbolchi yarim mavsum zaxirada o‘tirsa, o‘zi uchun jamoa izlaydi. "Lokomotiv"da ham, istalgan jamoada ham bunday holatlar bo‘ladi. Chunki jamoadagi barcha futbolchilarga imkoniyat berish juda qiyin. Hozirgi futbolda o‘ynash qiyin, agarda ular jamoada qolganida yanada ko‘proq zaxirada o‘tirib qolishlari mumkin edi. Futbolchilar esa o‘zlari uchun jamoa izlashlari va futbol o‘ynashlari kerak.

- Faoliyatini yakunlashi aytilgan Anzur Ismoilov mavsum yakuniga qadar jamoada qoldi.

Buning barchasi Anzurga bog‘liq emasdi. U yoqimli inson, juda tajribali. Uning tarkibda borligi jamoa uchun ham foydali. Endi u hayotida boshqa sahifani ochmoqda va boshqa ishlar bilan shug‘ullanmoqda. U bilan o‘zaro kelishuvimiz bor: qo‘lidan kelgancha, imkoniyati yetgancha bizga yordam berishi kerak. Biroq uning boshqa ishlar bilan shug‘ullanishini ham biz to‘g‘ri tushunamiz.

- Abdulloh Yo‘ldoshev avvalgi o‘yinlarda o‘ng qanot himoyasida o‘ynayotgandi. Bugun esa markaziy himoyada ko‘rinish berdi. Bu davomiy bo‘ladimi yoki u hali o‘ng qanotga qaytadimi?

U bir qancha pozisiyalarda o‘ynay oladi. Uni hatto tayanch himoyasida ham o‘ynatganmiz. Markaziy va o‘ng qanot himoyasida ham o‘ynay oladi. U haqiqiy atlet - tezligi bor, elastik inson. Biror futbolchi doimo o‘zi uchun eng qulay pozisiyani tanlab oladi. Abdullohda esa unday emas. Shuningdek, Oleksandr Kucherenko belidan noqulaylik his qildi. Bunday holatda uning o‘rnini yopa oladigan futbolchi borligi bizni quvontirdi. Anzur Ismoilov biz bilan ko‘p ham ishlamadi. Shu sababli uni markaziy himoyaga qo‘ya olmasdim.

- Jasur Yaxshiboyevning o‘yiniga qanday baho berasiz?

Uning jamoaga qo‘shilganiga ko‘p ham bo‘lmadi. Uzoq vaqt futbol o‘ynamadi. Bizning futbolga va jismoniy holatini yaxshilab olishiga biroz vaqt kerak. Barcha muxlislar uning qanday sifatga ega ekanligini biladi. Hujumda birga-bir holatlarda raqibni aldab o‘ta oladi. Lekin futbol faqatgina bundan iborat emas. Ikkinchi davrada u jamoamizga katta yordam bera olishiga ishonaman. Qanday darajada yordam berishi esa uning o‘ziga bog‘liq.

- Jarohat olgan Suhrob Nurulloyevning holati qanday?

Yaxshi. Bugun u issiq havoda ko‘p mehnat qildi. Uning mushaklarida jarohat bor. U kelgusi o‘yinga tayyor bo‘ladi, deb o‘ylayman.

Superliga 17-turidan o‘rin olgan "Qo‘qon-1912" – "Lokomotiv" (2:1) uchrashuvidan so‘ng "Lokomotiv" bosh murabbiyi Mirko Yelichich matbuot anjumanida ishtirok etdi.

🎤 Mirko Yelichich: "Ikkita xato ikkita golga olib keldi"

Superliga 17-turidan o'rin olgan "Buxoro" – "OKMK" (2:0) uchrashuvidan keyin "Buxoro" bosh murabbiyi Aleksandr Xomyakov matbuot anjumanida ishtirok etdi.

Avvalo, sizlarni ham g‘alaba bilan tabriklayman. O‘yin juda og‘ir kechdi. Albatta, oson bo‘lmasligini oldindan taxmin qilgandik. Raqib jamoa, mening nazarimda, yaxshi o‘yin ko‘rsata oladigan jamoalardan biri. Ularga qarshi harakat qilish juda qiyin bo‘ldi.

Yaxshiyamki, yana bir bor yigitlar sabr-toqat namoyon qilishdi. Bugun sabr qilish, o‘z imkoniyatlarimizni kutish juda muhim edi. Biz aynan shu vaziyatlarni kutishimiz kerak edi.

Umuman olganda, hamma narsa ham reja bo‘yicha kechmadi. Birinchi taymda ikki nafar himoyachimizdan ayrildik. Keyin o‘yin oxirida yana bir himoyachimiz qizil kartochka oldi.

Shunga qaramay, juda hissiyotlarga boy, ko‘p kuch talab qilgan o‘yin bo‘ldi. Yana bir bor aytaman, yigitlar haqiqiy qahramonlik ko‘rsatishdi. O‘yin oxirigacha bardosh berib, g‘alabani qo‘lga kiritishdi. Buning uchun ularga katta rahmat aytaman.

Superliga 16-turidan o'rin olgan "Paxtakor" – "Buxoro" (2:2) uchrashuvidan keyin "Buxoro" bosh murabbiyi Aleksandr Xomyakov matbuot anjumanida ishtirok etdi.

- O'yin haqida fikringiz?

O'yindan va natijadan qoniqdim. Muhimi, nima uchun bu erga kelganimizni futbolchilarga uqtira oldik. To'g'risi, 2:0dan keyin vaziyatni o'nglashimizga ishonmagandim. Futbolchilarimizga rahmat, ular xarakter ko'rsata olishdi. Biz o'yinni tashlab yubormadik, jiddiy raqibga qarshi durang qayd eta oldik.

- "Paxtakor"ga qarshi alohida yondashuv bo'ldimi?

Albatta, biz har bir raqibdan kelib chiqib tayyorgarlik ko'ramiz. O'tkazib yuborilgan gollarni oladigan bo'lsak, o'tkazmasak ham bo'lardi, lekin xatolar yuzaga keldi. Aytib o'tganimdek, ikkita gol o'tkazganimizdan so'ng hammasi tugashi ham mumkin edi, ammo tavakkalga qo'l urdik. Men hamma sirlarni ochmoqchi emasman. Shuni aytishim mumkin, har bir o'yinga o'z rejamiz bo'yicha hozirlik ko'ramiz. Bu yerda eng muhimi, tanaffusdan keyin o'yinni tashlab yubormaslik edi. Shunday qildik va oxirigacha o'ynadik. Jamoamizdagi hamma mas'uliyatni oxirigacha his qilib turibdi. Zaxiradan tushganlarning o'yinni kuchaytirgani ham yordam berdi.

- Jamoangiz safarda "Paxtakor" bilan durang qayd etdi, lekin umumiy o'yinlarni oladigan bo'lsak, "Buxoro" mehmonda "Mashal" bilan "Navbahor"ni mag'lub eta olgan. Safar uchrashuvlarida nima yetishmayapti?

Biz o'z imkoniyatlarimizni juda yaxshi bilamiz va shuni bilgan holda o'z o'yinimizni namoyish etamiz. Futbolda xatolarni kechirish mumkin, lekin o'yinchi harakat qilmasa buni kechirib bo'lmaydi. Jamoamizdagi hamma buni yaxshi biladi. To'g'ri, ko'p uchrashuvlarda omad yuz o'girdi. "Surxon"ga mag'lub bo'ldik. OKMK bilan yaxshi o'ynab yutqazdik. Turli sabablarga ko'ra, yutqazyapmiz. Aniq sababini bilmayman. "Buxoro" uchinchi o'rinda va buni ko'pchilik yaxshi deb qabul qilyapti. Shunga qaramay, qo'lni tushirmaymiz, har bir bahs biz uchun muhim. Klublardagi moliyaviy holatni zo'r deb bo'lmaydi, shundan kelib chiqib yuqori o'rinni saqlab qolish biz uchun o'ta muhim sanaladi.

- Mavsum oxirigacha uchinchi o'rinni saqlab qolish uchun jamoaning kuchi etadimi?

Men yil boshidayoq maqsadimiz har bir o'yinda bor kuchni ishga solish deb aytganman. Hozir ham shu fikrdaman, o'yinchilarimiz maydonda borlarini berishini xohlayman. Biz uchun hozircha kelajak yo'q, biz uchun faqat bugun bor. Agar hozirgi o'rnimizni chempionat oxirigacha saqlab qolsak yaxshi bo'lardi. Lekin men uchinchi o'rin uchun kurashamiz deb baralla gapirmayman. Bu katta gapirish bo'ladi. Aytib o'tganimdek, hozirgi kun bilan yashayapmiz. O'yinni o'tkazdikmi, biroz dam olib keyingi bahsga hozirlik ko'ramiz. Avvalgi xizmatlar biz uchun rol o'ynamaydi, bugungi o'yinni o'ylashimiz kerak.

Mirko Yelichich: "Buxoro"ni g'alaba bilan tabriklayman. Bu jamoa turnir jadvalida 3-o'rinda turishi bejiz emas. Ularga qarshi o'ynash oson bo'lmagan. O'z navbatida futbolchilarimga ham rahmat aytaman. Bugun ikkala jamoa uch ochko uchun o'ynadi. Jamoamning kurashuvchanligidan mamnunman.

- Qizil kartochka haqida fikringiz.

Hozir kichik xatolar kechirilmayapti. Vaziyatni oldindan his qilish kerak edi. Bu vaziyat, ha, balki qizil kartochkadir. Lekin o'yinning bir qismi ekansan, barchasini his qilib turish kerak. Bugun ikkala jamoada ham e'tibor ko'proq hakamlarga qaratildi. Biroq bu narsa hech kimga yordam bermaydi.

Muhammadali Reimov va Jasur Yaxshiboyevning tarkibda yo'qligi bo'yicha:

Reimovning terma jamoada orttirib olgan eski jarohati bor edi. Mushaklari jarohati unga biroz halaqit qilmoqda. Uni xavf ostiga qo'ymadik va to'liqligicha tuzalishini kutamiz. Unchalik jiddiy bo'lmagan jarohat, lekin bu unga halaqit qilyapti. Bir yarim oy oldin Jasur Yaxshiboyevning mushaklarida jarohat bor edi, keyinchalik u davolandi. Biroq mashg'ulotlarda yana o'zini noqulay his qildi. Uni ham xavf ostiga qo'yishni istamadik. U ham to'liqligicha davolangani ma'qul.

Yozgi transferlar va tarkibni kuchaytirish haqida:

Bizga futbolchi kerak. Yangi futbolchilarni izlayapmiz. Yosh futbolchilarni yo'qotishni istamaymiz, ular bu darajada futbol o'ynashga tayyorlar. Boshqa futbolchi olsak ham yoshlarni tarkibga jalb qilamiz. Yoshlar esa o'z navbatida akalaridan o'rnak olib, yaxshigina tajriba olishmoqda. O'z vazifamizga yetishish uchun bir qancha futbolchilar asqotgan bo'lardi.

Jamshid Saidovning ketishi va murabbiylar shtabidagi o'zgarishlar haqida:

Jamshid menga katta yordam berayotgandi. Futbolchilar bilan ishlashda u yaxshi mehnat qilayotgandi. Biz jamoaga ko'p tomonlama yordam berayotgan muhim insondan ayrildik. Sadriddin Abdullayev biroz qo'shishi kerak. O'zining qilayotgan ishlari esa o'ziga yaxshi. Sadriddin Abdullayevning vazifalarini ko'paytirdik.

Nikolay Ivanov va Yovan Nishichning o'yin amaliyoti haqida:

U jamoaga kelganida yaxshi jismoniy holatda edi va shu sababli Yovan Nishich ko'p o'ynamagandi. Hozir esa teskarisi. Yovanning holati yaxshiroq. Nikolay hozir asosan tayanch futbolchisi bo'lib qoldi va boshqa pozisiyalarga ulgurmayapti. Bir vaqtda ularning ikkovidan ham foydalanib bo'lmaydi. Har o'yinda ularni almashtirib, maydonga tushirish esa hissiyotlarni kamaytirib qo'yishi mumkin. Ikkisi ham erkin o'yin ko'rsatishni yaxshi ko'rishadi. Hozir Yovan yaxshiroq holatda, keyingilarida esa vaziyatga qaraymiz.

«Lokomotiv» va «Andijon» (3:3) o'rtasidagi jangovar durangdan so'ng mezbonlar ustozi Mirko Yelichich matbuot anjumanida qatnashdi.

- Avvalo, o'yin haqidagi fikringizni aytsangiz.

Yaxshi o'yin bo'ldi. Menimcha, uzoq tanaffusdan keyin ham ikkala jamoa ochiq futbol namoyish etdi. Tomoshabinlar uchun qiziqarli uchrashuv bo'ldi. To'p nazorati ko'proq biz tomonda edi, o'yinni ham nazorat qildik. Faqat so'nggi 15–20 daqiqada nazoratni biroz yo'qotdik. Natijada, menimcha, bugun bir ochko olganimizdan ko'ra, ikki ochkoni yo'qotdik. Rahmat.

- Bugun Shushnyar diskvalifikasiya sabab maydonga tushmadi. Uning yo'qligi sezildimi?

Buni aniq aytish qiyin. Shushnyar juda yaxshi mavsum o'tkazyapti, juda barqaror o'ynamoqda. Kucherenko ham shunday. Abdulla ham o'tgan o'yinda yaxshi harakat qilgandi, bugun ham yomon o'ynadi, demagan bo'lardim. Balki ayrim vaziyatlarda boshqa futbolchilarnikidek sifat yetishmagandir. Shushnyar va Kucherenko markazda bo'lsa, sifat biroz yuqoriroq bo'ladi. Bugun esa shu jihatdan ozgina farq sezildi.

- O'yinning boshida «Lokomotiv»ning goli bekor qilindi. O'sha vaziyatni ko'rdingizmi?

Yo'q, hali ko'rmadim. Biz uzoqda turgandik, vaziyatni aniq ko'rish qiyin edi. Endi o'yinni qayta tomosha qilamiz. Menimcha, bugun tushunarsiz vaziyatlar ko'p bo'ldi. Eng yoqimsizi — hakam o'yinni his qilmay qolgani. Agar hakam juda ko'p ko'zga tashlana boshlasa, demak nimadir noto'g'ri ketmoqda. Men hakam haq yoki nohaq edi, demayman. Lekin 50 ga 50 vaziyatlarning ko'pi "Andijon" foydasiga hal bo'lgandek tuyuldi. Bu hakamlik sifati bilan bog'liq masala, lekin bu haqida ko'p gapirmoqchi emasman.

- Jahon chempionati sabab katta tanaffus bo'ldi. Endi esa har besh kunda o'yinlar bo'ladi. Jamoa bunga tayyormi?

Ha, tayyormiz. Jahon chempionati tufayli ikki oydan ortiq tanaffus bo'ldi. Faqat kubok o'yinlarini o'tkazdik. Endi esa chempionatda har besh kunda o'yin bo'ladi. Futbolchilar bunga tez moslashadi. Ikki-uchta o'yindan keyin bu ritmga ko'nikib ketishadi. Agar ikki haftada bir o'yin bo'lsa ham, uch kunda bir o'yin bo'lsa ham, baribir futbolchi shunga moslashadi. Faqat biroz vaqt kerak. Shuncha tanaffusdan keyin yana o'yin ritmini his qilish muhim. Men nafaqat bizning, balki boshqa jamoalarning ham o'yinlarini kuzatdim. Intensivlik va o'yin sifati yomon emas. Menimcha, bu tanaffus futbol sifatiga salbiy ta'sir ko'rsatmagan.

- Hisob 2:0 bo'lganda jamoangiz uchinchi golni uradigandek edi. Ammo keyin ketma-ket ikkita gol o'tkazib yuborildi. Bu muvozanatning yo'qolganidanmi?

Futbolda hammasini mayda detallar hal qiladi. Agar o'sha mayda vaziyatlardan foydalana olmasangiz, o'yin birdaniga o'zgarib ketadi. Shunday shiddatli va teng o'yinlarda bitta kichik xato ham natijani hal qiladi. Bu xatoda aynan kim aybdorligini aytish noto'g'ri. Futbolda bunday holatlar hech qachon bitta futbolchining aybi bo'lmaydi, bu jamoaviy xato. Uni tahlil qilib, keyingi safar takrorlamaslikka harakat qilamiz. Bunga jismoniy holat ham, ruhiy holat ham ta'sir qilishi mumkin. Har kim bunga o'zicha baho beradi, lekin bu faqat shaxsiy fikr, xolos.

- «Lokomotiv» ikki yildan ortiq tanaffusdan keyin yana o'z stadionida Superliga o'yinini o'tkazdi. Maydon sifati haqida fikringiz qanday?

Maydon yomon emas. Lekin avvalgidek ham emas. Besh-olti yil oldin bu yerda o'ynaganimizda maydon sifati yaxshiroq edi. Hozir esa biroz qattiq va to'liq tekis emas. Oldin maysa yumshoqroq va tekisroq edi. Ammo buni ham tushunish kerak: yangi maydonga vaqt kerak. Xuddi yangi qurilgan uy singari, hammasi asta-sekin o'z o'rniga tushadi. Biroz vaqt o'tgach, maydon ham kerakli holatga keladi. Men bunga ishonaman. Hozircha esa unga moslashish kerak.

Mirko Yelichich: - Yaxshi o‘yin bo‘ldi. Ikkala jamoa ochiq o‘yin ko‘rsatdi. Bunday o‘yinlarda o‘ynash va tomosha qilish yoqimli. O‘yinni ko‘proq biz nazorat qildik. So‘nggi daqiqalarda konsentratsiyani yo‘qotib qo‘ydik. Ikki ochko yo‘qotdik va bittagina ochko oldik.

- Aleksandar Shushnyarning o‘rni qanchalik bilinmoqda? Abdulloh Yo‘ldoshev bugun yomon o‘ynamadi, gol ham urdi, biroq baribir 3ta gol juda ko‘p.

- Bir nima deyish qiyin. Shushnyar yaxshi mavsum o‘tkazmoqda va tartibli harakat qilmoqda. Kucherenko ham. Abdulloh Yo‘ldoshev o‘tgan o‘yinni yaxshi o‘tkazdi. Bugun uni yomon o‘ynadi deb ayta olmayman. Balki kuchliroq raqiblar oldida unga biroz sifatlar yetishmayotgandir. Shushnyar-Kucherenko juftligida esa bizda sifat yaxshiroq ko‘rinadi.

«Andijon» va «Surxon» (1:2) uchrashuvidan keyin jamoamiz ustozi Islom Ahmedov matbuot anjumanida ishtirok etdi.

- O'yinga keladigan bo'lsak, mag'lubiyatga uchradik. Ruhiy tomonlama o'yinchilarimizni yaxshi tayyorlay olmadik, deb o'ylayman. Shu kungacha jismoniy va yana boshqa tomonlama ham yaxshi edik. Yozgi yig'indan keyingi birinchi o'yin, muxlislar oldidagi bosim, g'alabaga bo'lgan javobgarlik – yuk o'yinchilarimizni bosib qo'ydi. Hammasi o'z darajasidagi o'yinni ko'rsata olmadilar. Har jabhada yutqazib qo'ydik. Asosan ruhiyat bilan bog'liq bo'ldi.

- Ko'p jabhada yutqazib qo'ydik. O'yinni ko'rib chiqib, tahlil qilamiz. Ko'proq birinchi taymda o'rtani berib qo'yganga o'xshadik. Ikkinchi taymda yangi futbolchilarni, yangi kuchlarni tushirgandik, natijada hujumlar qilishni boshladik. Baribir qaerdadir o'rtani tezroq kesib o'tamiz, deya xatolikka yo'l qo'ydik. Gol urish uchun shoshildik.

- Yo'q, jismoniy holat emas. Qaerdadir ruhiy tomonlama futbolchilarni maydonga tushirib, o'yinni kuchaytirmoqchi edik. Rejamiz amalga oshmadi. Darvozamizdan to'p o'tkazdik, keyin hisobni tenglashtirdik. Afsuski, yana o'z xatoimiz bilan gol o'tkazib yubordik. Endi sovuq kallaga o'yinni ko'rib, har bir epizodni tahlil qilamiz.

- Aytganimdek, ruhiyat bilan bog'liq. Ancha tanaffusdan keyingi uyimizda o'tgan birinchi o'yin. Muxlislarimiz uchun tezroq gol urib, ularni xursand qilish maqsadida shoshilishlar va shunday holatlar ro'y berdi. Natijada xato ketidan xato kelib chiqaverdi. Shuning uchun hech bir chiziqda o'yinimiz o'xshamadi.

- Ba'zi-bir chiziqlarimizni raqobat tomonidan kuchaytirishimiz kerak. FIFA tomonidan taqiq qo'yilgandi. Lekin rahbariyatimiz buni yechishdi. Faqat FIFAdan ruxsat kelishi kerak, shuni kutyapmiz. Shunda futbolchilarni ro'yxatdan o'tkazamiz. Hujum chizig'ini kuchaytirish uchun ham o'yinchilar bilan gaplashyapmiz. Biroq biz xohlagan futbolchilarni o'z jamoalari bor va ularni olishimiz qiyinroq kechyapti.

- Ular bilan qiziqib gaplashdik. Aytganimdek, ularni o'z klublari bilan shartnomalari borligi uchun jamoamizga jalb qilish biroz qiyin bo'lyapti.

- Tiklanish jarayonini hozir, yechinish xonasidanoq boshlaganmiz. Ertaga tushlikdan keyin yig'ilib, keyingi uchrashuvga tayyorgarlik ko'ramiz.