Nasaf — yangiliklari

🌍 FIFA Prezidenti Janni Infantino O‘zbekistonga tashrif buyurdi.

Xalqaro futbol assotsiatsiyalari federatsiyasi (FIFA) prezidenti Janni Infantino boshchiligidagi delegatsiya 29–30-sentabr kunlari rasmiy tashrif bilan O‘zbekistonda bo‘ladi.

FIFA delegatsiyasini O‘zbekiston Respublikasi sport vaziri Adham Ikramov hamda O‘zbekiston futbol assotsiatsiyasi birinchi vitse-prezidenti Ravshan Irmatov kutib oldi.

Tashrif doirasida mamlakatimizda futbolni yanada ommalashtirish, uning infratuzilmasini rivojlantirish hamda xalqaro hamkorlikni mustahkamlashga qaratilgan qator muhim loyihalar va obyektlar bilan tanishish rejalashtirilgan.

Shuningdek, O‘zbekiston futbolini rivojlantirish, yosh iste’dodlarni qo‘llab-quvvatlash hamda mamlakatimizda futbolni yanada taraqqiy ettirish borasidagi hamkorlik masalalariga alohida e’tibor qaratiladi.

Sergey Lushchan: "Jamoani shakllantirish ustida ish olib boryapmiz"

Superliga 22-turdan o'rin olgan "Mash'al" – "Paxtakor" uchrashuvidan so'ng "Mash'al" bosh murabbiyi Sergey Lushchan matbuot anjumanida ishtirok etdi.

🟢 🔵 ANDIJON 1:0 OLIMPIK MOBIUZ 🔴

⚽️ Imeda Ashortia, 43 (1:0)

"Paxtakor" bosh murabbiyi Kamoliddin Tojiyev OKMKga qarshi o’yindan so’ng o’z fikrlarini bildirib o’tdi.

— O'yin haqida fikringiz?
— Yaxshi o'yin bo'ldi. Bahs qiyin kechishini bilardik va shunga yarasha hozirlik ko'rgandik. Bugun ko'p vaziyatlar yaratdik va unumli foydalandik. Avvalgi o'yinlarda ham ko'p vaziyat yuzaga keltirib, foydalana olmay kelayotgandik. G'alaba bilan hammani tabriklayman. Yigitlarga rahmat aytaman.

— "Paxtakor" oxirgi ikkita o'yinda ayniqsa hujumda yaxshi harakat qildi va bir nechta gollar urdi. Engillik yuzaga kelishining sababi nimada?
— Mashg'ulotlarda doim hammasi yaxshi bo'lishi uchun ishlaymiz. Omadimiz kelib gollar uryapmiz. Bundan hammamiz xursandmiz. Yanayam ko'proq to'p kiritishga intilamiz.

— Bugun realizatsiya zo'r bo'ldi: to'rtta imkoniyat va uchta gol. Adashmasam, OKMKda 6-7ta vaziyat bo'ldi. Agar hisob 2:2 yoki 3:3 bo'lib qolganida "Paxtakor" yana qo'sha olarmidi?
— Bu - o'yin, vaziyatlarni yuazaga keltirdik va ulardan foydalandik. Olmaliq jamoasi standartlarda kuchli ekanini futbolchilarimizga alohida uqtirgandik. Bugun raqibga imkon bermadik deb o'ylayman. Sal erkin harakat qilgan paytimiz ham bo'ldi. Kamchiliklar ustida ishlaymiz.

— Hisob 2:0dan keyin ham qarshi hujumlardan foydalanib hisobni 4:0ga keltirish mumkin edi.
— To'g'ri, bugun qarshi hujumga ko'p marta chiqdik. To'g'risi, yanada yaxshi o'yin ko'rsatishimizga maydon holati yo'l qo'ymadi. Hali mavsum uzun, yoshlarga ham imkon beramiz.

— Jamoa "Al Ahli" bilan o'yinga tiklanishga ulguradimi?
— Bugundan shuning ustida ishlaymiz.

— Yaqinda Ro'ziqul Berdiev va Aleksandr Xomyakov O'zbekistondagi eng yaxshi hujumkor jamoa deb OKMKni aytishgandi.
— Aslida men ham ularning fikriga qo'shilaman. OKMK yaxshi jamoalardan biri. Jamoani tajribali murabbiy boshqaryapti, tarkibi ham kuchli. OKMK oxirigacha kurashib futbol o'ynaydigan jamoa. Ham o'zi o'ynaydi, ham raqibga imkon beradi. Olmaliqda g'alaba qozonish oson emas. Hozirgi OKMK oldingilarga nisbatan kuchliroq. Bu yerda boshqa jamoalarga qiyin bo'ladi deb o'ylayman.

— Elit OCHLdagi raqib "Al Ahli"ni qanchalik o'rgandingiz?
— Bu jamoa o'yinlarini kuzatib boryapmiz va tahlil qilyapmiz. Har 3-4 kunda maydonga tushayotganimiz sababli yigitlarda toliqish bor. To'rt nafar futbolchimiz jarohat olgan. Zaxiramizda birgina Nasrullaev bor edi, qolganlar esa yoshlar. Albatta, "Al Ahli" bilan qiyin bo'ladi, lekin o'zimizni ko'rsatishga harakat qilamiz.

— "Paxtakor" ishlari yurishib ketishi, uchtalab gol urib g'alaba qozonishi uchun Ortiqxo'jaev ketdi degan gaplar chiqishi yoki jamoadan Kubokdan chiqib ketishi kabi intriga kerakmidi?
— Biz ham birinchi davrada chempion bo'lmoqchi bo'ldik, endi shunaqasi ham bo'p turadi.

Islom Ahmedov: «Mag‘lubiyat uchun muxlislarimizdan uzr so‘raymiz»

«Paxtakor» - «Andijon» (3:0) bellashuvdan keyingi matbuot anjumanida jamoamiz ustozi Islom Ahmedov jurnalistlarning savollariga javob berdi.

— Assalomu alaykum. Alamli mag‘lubiyatga uchradik. Buning uchun Andijondan tashrif buyurgan muxlislarimiz oldida uzr so‘raymiz. O‘yinga keladigan bo‘lsak, o‘ziga xos reja qilgandik. Birinchi taymda hisobni ushlab turgan holda ikkinchi taymda yangi kuchlarni qo‘shib, harakat qilamiz, deb shunday reja asosida ishlagan edik. Lekin 20-daqiqagacha o‘yinchilarimiz yaxshi o‘ynadi. Ana shu bitta burchak to‘pidan gol o‘tkazib yuborganimizdan keyin hammasi buzilib ketdi — rejamiz. Ortian ikkinchi golni ham o‘tkazib yubordik. Bolalar muvozanatni yo‘qotib qo‘yishdi. Shuning hisobidan ko‘p narsani topshirib qo‘ydik. O‘rtani berib qo‘ydik. Ikkinchi taymda yangi kuchlarni maydonga tushirish holatida rejamiz bor edi. Yana qizil kartochka kutilmaganda rejamizni buzib yubordi.

— Sizning jamoangizni kuzataman, ko‘raman, jangovar xarakter bilan va har doim siz faqat hujumda o‘ynaysiz. Lekin ba’zi joylarda sizning jamoangizga balans yetishmayapti. Shu evaziga qandaydir salbiy natijalar kuzatilmayaptimi?

— To‘g‘ri aytyapsiz. Agar hisob 0:0 shunday holatda bo‘lganida, ya’ni siz aytgandek, tavakkalchilikka yo‘l qo‘ymasdan, himoyachini tushirib, o‘sha hisobni saqlab qolish mumkin edi. Lekin biz endi 0:2 hisobida yutqazayotgan edik. Shuning uchun baribir oldinga o‘tmasak bo‘lmas edi. Hujum qilib, hisobni tenglashtirishga, tavakkalchilik qildik.

— To‘g‘ri aytyapsiz, lekin «Paxtakor»ga qarshi birinchi uchrashuvda 0:0 hisobi qayd etilgandi va o‘shanda siz markaziy himoyachi Chalasan chetlatilgach, baribir hujum haqida o‘ylagandingiz...

— Unda bizda Aleksandr Andronikashvili bor edi. U shunday pozitsiyada, ya’ni oxirgi himoyachi bo‘lib o‘ynay olardi. Chunki u avvalgi jamoasida shu pozitsiyada o‘ynagan. Shuning uchun uni pastga tushirib turib, ya’ni oldiga o‘yinchi chiqarardik. Bu o‘yinda yutqazayotgan edik, shuning uchun endi himoyani ushlagandan ko‘ra, tavakkal qilib, oxirigacha kurashdik, baribir 2:0 ga yutqazdingizmi, 3:0 ga yutqazdingizmi, baribir mag‘lubiyat. Shu bois hujumlar qilib, hisobni yaqinlashtirishga harakat qildik.

— Afsuski, bu safar yana qizil kartochka bo‘ldi. Balki asosiy tarkibda Artyom Potapov emas, balki Eldor Adhamov tushganida vaziyat boshqacha bo‘lishi ham mumkin edi. Bunga fikringiz qanday?

— Darvozabonlar bo‘yicha murabbiyimiz bilan maslahatlashamiz. Darvozabonlar murabbiyi bor. Oxirgi o‘yinlarda Potapov yaxshi turgandi. Darvozasi daxlsizligini saqlayotgandi. Yaxshi turgan darvozabonni almashtirib yuborish noto‘g‘ri bo‘ladi, deb o‘ylagandik. Shuning uchun unga imkoniyat bergandik.

— Dragan Cheran nega zaxirada qoldi?

— Rejamiz bo‘yicha Draganni maydonga tushirish bor edi. O‘yindan oldin o‘zi gaplashgandik, ikkinchi taymda u bilan kuchaytirishni reja qilgan edik. Lekin qizil kartochka hammasini o‘zgartirib yubordi. Bizda Bekzod Sulaymonov ham bor va u himoyachi rolida ham o‘ynay oladi, hujumga borib-kelib o‘ynaydi. Shuning uchun shu o‘yinchini tushirdik-da. Qizil kartochka hamma rejamizni buzib qo‘ydi.

— Birinchi davrani olib qaraydigan bo‘lsak, birinchi davrda Babayan keldi. 7 ta o‘yin o‘tkazdi. 2 ta g‘alaba, 5 ta mag‘lubiyat bo‘ldi. Siz «Qo‘qon-1912» bilan o‘yindan boshladingiz. O‘rtamiyona jamoalarga qarshi barqaror ochko to‘pladingiz. Mana, ikkinchi davra boshlandi, «Neftchi»ga, «Paxtakor»ga imkoniyat boy berildi. Islom Ahmedov effekti faqat o‘rtamiyona jamoalar uchunmi yoki katta jamoalarni ham yuta oladimi?

— Birinchi davrada «Bunyodkor» bilan o‘ynaganimizda, ular uchinchi o‘rinda edi va yaxshi jamoa edi. Masalan, «Xorazm» ham uncha pastda emas edi. Birinchi davradagi «Paxtakor» yoki «Neftchi» bilan o‘yinni solishtiradigan bo‘lsak, natija bo‘yicha yutqazdik. Lekin o‘yin bo‘yicha, hujumkorlik, to‘p nazorati bo‘yicha yaxshiroq edik. Ya’ni, yutqazishni yutqazishdan farqi bor. Hujumlar qilyapmiz, to‘p nazorati bor, har xil harakat qilyapmiz, qayerdadir o‘zimizning xatolarimizdan ham gol o‘tkazib yuborib, shunday bo‘ldi. «Neftchi» bilan ham birinchi taym yomon o‘ynamaganimiz yo‘q. Unda hamma tomonlama ustunlik qildik. Faqat aytganimizdek, yana qizil kartochka hisobiga yutqazgandik.

— Birinchi davraga nisbatan o‘yin uslubi o‘zgardi, harakat ko‘paydi, nisbatan tezlik qo‘shildi. Jamoada «qurol» bormi? Misol uchun, Xomyakov paytida standartlarda xavfli edi. Ikkinchi qavatda imkoniyat bermasdi. Hozir «Andijon»da «qurol» bormi?

— To‘g‘ri aytyapsiz. Bizda bo‘ydoq o‘yinchilarimizdan Boake va Cheran bor. Lekin Dragan ko‘proq orqaroqdan pas beradi. Shuning uchun shu o‘yinchilarimizning kuchli tomoni — ular to‘pni yaxshi nazorat qila oladi. Intellekti yaxshi. Futbolchilarimizning salohiyatidan kelib chiqib, kesuvchi paslar, oralaridan uzatiladigan paslarni qo‘llaymiz. Standart holatlardan ham ikki-uchta jamoaga gol urganmiz. Biz ko‘proq to‘p nazorati, hujumkorlikka e’tibor beryapmiz.

— Potapov o‘rtamiyonalarga qarshi yaxshi o‘ynadi. Eldor Adhamov jamoaning asosiy darvozaboni, jamoa kuchli raqib bilan o‘ynayotgan edi. Yana uni asosiy tarkibda tushirsa bo‘lmasmidi?

— Agar hamma narsani oldindan bilganimizda, shunga tayyorgarlik ko‘rardik. Oldindan hech narsani bila olmaysiz. Masalan, qilgan rejalarimiz o‘xshamadi. Chunki o‘yin buzilib ketdi. Boshqacha reja qilgandik. Kutilmaganda boshida ikkita gol o‘tkazib yubordik, ikkinchi taymda keyin darvozabonimiz qizil kartochka olib qoldi. Rejalarimiz buzilib ketdi.

— O‘zbekiston chempionatining eng yaxshi legionerlaridan biri deb aytiladigan Cheran zaxirada qoldi. O‘tgan o‘yinda ham ikkinchi taymda maydonga tushgandi. Gap-so‘zlarga qaraganda, murabbiylar shtabi bilan biroz kelishmovchilik bo‘lgan. Bu qanchalik rost?

— Yo‘q, oramizda hech qanday muammo yo‘q. Dragan bilan yaqin munosabatdamiz. E’tibor bergan bo‘lsangizlar, Draganni oxirgi o‘yinlarda faqat ikkinchi taymda tushiryapmiz, o‘yinni kuchaytirib beryapti. Chunki to‘pni nazorat qilyapti, shoshilmaslikka undayapti. Ya’ni, o‘yinni boshqaryapti. Raqiblar charchagan holatda bo‘sh hududlar topib, o‘yinni o‘z qo‘liga olayotgandi. O‘yindan oldin Dragan bilan har doim gaplashamiz. Shu reja asosida ish tutmoqchi edik, lekin rejamiz o‘xshamadi. Maydonga tushmaganiga baribir futbolchining kayfiyati tushishi mumkin, mag‘lubiyat ham baribir ta’sir qiladi.

— Demak, o‘zi shu rolga ko‘nyaptimi? Unda norozichilik bo‘lmayaptimi?

— Yo‘q, yo‘q. Aytayapman-ku, u bilan bu borada gaplashib turamiz, o‘zi menga aytadi: «Men ikkinchi taymda tushib, yordam beray. Chunki raqiblar charchaganda», deydi. O‘zidan chiqadi, tashabbus. Lekin asosiy tarkibda ham qo‘yaveraman. Lekin ikkinchi taymda tushib, yordam beray, deydi.

O'zbekiston U-23 terma jamoasi 1-sentyabrdan Milliy futbol markazida o'quv-mashg'ulot yig'inlariga kirishdi. Osiyo o'yinlariga tayyorgarlik ko'rayotgan yoshlarimiz yig'in oldidan 10-sentyabr kuni safarda Xitoy U-23 terma jamoasiga qarshi nazorat o'yinida maydonga tushadi.

Ravshan Haydarov tomonidan yig'inga jalb etilgan futbolchilarning kengaytirilgan tarkibi bilan tanishing.

Osiyo o'yinlari-2026

15-sentyabr
O'zbekiston — Filippin

18-sentyabr
Kuvayt — O'zbekiston

22-sentyabr
O'zbekiston — Vyetnam

O'zbekiston kubogi. 1/8 final

Navbahor 1:0 Nasaf

Gol: Ruslanbek Jiyanov, 90+2 (1:0)

⚽ Superliga. 19-tur

QIZILQUM 0:0 NASAF

LOKOMOTIV 4:1 BUNYODKOR

Shodiyor Shodiboyev, 6 (1:0), Sardor Mirzayev, 36 (2:0), Jasur Yaxshiboyev, 43 (3:0), Sardor Rahmonov, 61 penalti (3:1), Suhrob Nurulloyev, 70 (4:1)

MASH'AL 0:2 NAVBAHOR

Jasurbek Jaloliddinov, 20 (0:1), Shohruhbek Abdurahmonov, 68 (0:2)

AFC Ayollar Chempionlar Ligasining 2026/27 mavsumi guruh bosqichida ishtirok etadigan barcha 12 ta klub nomi ma’lum bo‘ldi.

Ulardan 6 ta jamoa o‘tgan mavsumdagi natijalari asosida musobaqadagi ishtirokini to‘g‘ridan-to‘g‘ri guruh bosqichidan boshlaydi. Ushbu klublar qur’a oldidan 1 va 2-savatchalardan joy olgan.

1-savatcha:

Naegohyang
Melbourne City
Hwacheon KSPO

2-savatcha:

Kobe Leonessa
Beijing Jingtan
Ho Chi Minh City

Qolgan 6 ta jamoa esa saralash bosqichida o‘z guruhlarida birinchi o‘rinni egallab, guruh bosqichi yo‘llanmasini qo‘lga kiritdi. Ular qur’ada 3 va 4-savatchalardan joy oladi.

3-savatcha:

Bam Khatoon
Kaya–Iloilo
East Bengal

4-savatcha:

April 25
Nasaf
Ayeyawady

O‘zbekiston chempioni «Nasaf» saralash bosqichini muvaffaqiyatli yakunlab, o‘z guruhida g‘olib bo‘ldi va Osiyoning eng kuchli 12 klubi qatoridan joy oldi.

Ma'lumot uchun, guruh bosqichiga qur’a tashlash marosimi 3-sentabr kuni Malayziyaning Kuala-Lumpur shahrida bo‘lib o‘tadi.

Qizlarimiz Ayollar o‘rtasida Osiyo Chempionlar Ligasi guruh bosqichiga chiqish yo‘llanmasi uchun kechgan barcha bellashuvlarda 100 foizlik natija qayd etib, musobaqaning guruh bosqichiga yo‘llanmani qo‘lga kiritdi! 🔥

FC Nasaf 11:0 Master FC
Royal Thimphu College FC 0:3 FC Nasaf
Banaat FC 0:7 PFC Nasaf

3 ta o‘yin — 3 ta g‘alaba — 21 ta gol! 💪

Qizlarimiz — Osiyo Chempionlar Ligasi guruh bosqichida!

⚽️ Superliga. 18-tur

Navbahor 1:0 Nasaf

Islombek Ismoilov: “Bugun yirik mag’lubiyatga loyiq emas edik”

Oʻzbekiston Respublikasi Prezidenti Shavkat Mirziyoyev Xalqaro futbol assotsiatsiyalari federatsiyasi (FIFA) rahbari Janni Infantinoni qabul qildi.

Kamoliddin Tojiyev: «Qizil kartochka rejalarimizni o'zgartirib yubordi»

Superliga 22-turidan o'rin olgan «Mash'al» – «Paxtakor» uchrashuvidan so'ng «Paxtakor» bosh murabbiyi Kamoliddin Tojiyev matbuot anjumanida ishtirok etdi.

- O'yin haqida fikringiz?

- "Mash`al" bilan bahs qiyin kechishini bilardik. Muhimi, g'alaba qozonganimiz. Birinchi bo'limdagi qizil kartochka rejalarimizni o'zgartirib yubordi. Tanaffusda yigitlarga kerakli ko'rsatmalarni berdik va ikkinchi taymda iroda ko'rsatib g'alaba qozondik. Oxirigacha kurash olib borishgani uchun yigitlarga rahmat aytib qolaman. Bu o'yin biz uchun nihoyatda muhim edi. Aslida har bir bahs biz uchun muhim bo'lib qolmoqda.

- Bugun kim ko'proq xatoga yo'l qo'ydi: "Mash`al"mi, "Paxtakor"mi yo hakamlar jamoasimi?

- Qo'pol xatolar ko'rinmadi. Biz ham, "Mash`al" ham qo'pol xatolarga yo'l qo'ymadi. O'z imkoniyatlarimizdan foydalanib g'alabaga erishdik. O'yin yoqdi deya olmayman, murakkab uchrashuv kechishini bilardik. Uzoq yo'l bosib keldik. O'yinga tayyorgarlik ko'rish uchun ikki kun vaqtimiz bo'ldi va asosan tiklanish bilan mashg'ul bo'ldik.

- Qizil kartochka o'yinni qanchalik o'zgartirib yubordi?

- Aytganimdek, rejalarimizni tubdan o'zgartirib yubordi. Hech kim o'yin boshida qizil kartochka olib keyin bu rejaga o'tamiz deb o'ylamaydi. O'zim tomonimdan xato kuzatildi deya olmayman. Kimni maydonga tushirgan bo'lsak, hamma yaxshi harakat qildi. O'n kishi qolib ham g'alaba qozondik.

- "Mash`al" hozircha oxirgi o'rinda va tarkibida yoshlarni o'ynatyapti. "Paxtakor" esa ikkinchi o'rinda bormoqda. Kichik hisobda g'alaba qozondik deb hisoblaysizmi?

- Bitta to'p farqi bilan yutuqqa erishgan bo'lsak-da, futbolchilar o'yinga oddiy qarashdi deya olmayman. Baribir kurash oxirigacha kechdi. Tig'iz taqvim bo'yicha o'yinlarni o'tkazyapmiz, hech bir bellashuv oson bo'lmayapti. "Al Ahli" bilan o'yindan keyinoq bu uchrashuvga hozirlikni boshladik. "Mash`al" yosh bo'lgani bilan o'z o'yin uslubi bor. Bugun ham o'zini ko'rsatishga harakat qildi.

- Oybek Bozorov bir necha yil "Nasaf"ning asosiy futbolchisi bo'lib keldi. Lekin u "Paxtakor"da zaxirada qolib ketyapti. Bu futbolchining jismoniy holati bilan bog'liqmi yoki o'yin uslubi mos tushmayapti?

- Oybekda jarohat bor edi, shu bois Saudiyaga ham bora olmadi. G'uzorga kelishimizdan oldin faqat ikkita mashg'ulotda ishtirok etdi. Hozircha to'liq tayyor emas. Endi-endi tuzalib safimizga qaytyapti. Jarohati yana takrorlanmasin deb hozircha zaxirada qoldirdik.

- Ma'lumki, "Paxtakor" ishtirokidagi o'yinlar Iroqda translyatsiya qilinyapti va shu bois Iroqda "Paxtakor" futbolchilariga nisbatan qiziqish ortganini eshitdik. Siz bu borada nima deya olasiz?

- Translyatsiyadan oldin ham bizning futbolchilar Iroqqa borgandi, bir o'yinchimiz to'purar bo'ldi. Ularning uch nafar futbolchisi bizda to'p tepmoqda. Endi baribir qiziqish bo'ladi. Lekin hozircha hech kimga taklif tushmadi.

O'zbekiston Kubogi 1/8 final doirasida «Andijon» pro liga a'zosi – «Olimpik Mobiuz» jamoasini qabul qildi. Asosiy vaqt 2:2 hisobi bilan yakunlandi. Ekstra taymlarda ham hisob o'zgarmadi. Penaltilar seriyasida esa maydon egalari 5:4 hisobida g'alaba qozondi va chorak finalga chiqdi.

Penaltilar seriyasida raqibni oxirgi zarbasini qaytargan darvozabon Eldor Adhamov tabiiyki, uchrashuv qahramoniga aylandi. Uchrashuvdan keyin darvozabon bir qator savollarga javob qaytardi.

- O'yin haqidagi taassurotlaringiz qanday bo'ldi?

- Qiyin bo'lishini bilardik. Chunki bunday jamoalarga qarshi avvalo «nastroy» qilishni o'zi qiyin. Boz ustiga «Olimpik Mobiuz» yoshlardan tashkil topgan, yaxshi loyiha. Terma jamoalarga nomzodlarni yetkazib beradi. U yerdagi barchasi iqtidorli yigitlar. Qarshi hujum xavfli bo'lishini bilib turgandik. Ammo birinchi bo'limda umuman muammo bo'lgani yo'q. Ikkita gol urganimizdan keyin menimcha g'alaba qozondik, deb o'ylab biroz bo'shashdik. Erta xotirjamlikka berilganimiz evaziga ikkita gol o'tkazib yubordik. Ammo o'zimizni tez qo'lga olib, yana hujum qilishni boshladik. So'nggi daqiqagacha raqibni xavf ostida ushlab turdik. Ammo omadimiz kelmadi. G'alaba baribir penaltilar seriyasiga yozilgan ekan, yuzimiz yorug' bo'ldi.

- Yakunda o'yin qahramoniga aylandingiz. Penaltilar seriyasidagi oxirgi zarbada qutqardingiz. O'sha holatni qanday izohlagan bo'lardingiz?

- O'shanda raqib futbolchisini ko'ziga qarayotganimda biroz xayajonlanayotganini bildim va burchakka tepa olmaydi, deb o'yladim. Bunaqa holatda ko'pchilik tavakkal qilishga qo'rqadi. Qaerga tepishini o'yladim. Hatto, oxirgi lahzada ham to'p darvozaga kirib ketyapti deb o'yladim. Xudoga shukr, reaksiya bo'lib, oyog'im bilan qaytardim.

- Penaltilar seriyasida aksariyat zarbalarning yo'nalishini topgandingiz. Qolaversa, zarba berishdan oldin raqib futbolchilariga ham nimadir dedingiz...

- Bu mening shaxsiy sirim. Nimadirlar deyish ko'p narsani hal qilmaydi. Hammasi Xudodan. Bu shunchaki, futbolchilarni chalg'itish uchun ishlatiladigan oddiy narsa. Ko'pincha futbolchilarni muvozanatini yo'qotishga sabab bo'lib, ish berib qoladi. Zarbani tepayotgan oxirgi futbolchi xayajonlanib qoldi.

- Jamoa 2:0 hisobida oldinda edi, keyin hisob tenglashdi. Ekstra taymlar va penaltilar seriyasi. O'yindan oldin bunday reja umuman bo'lmagan bo'lsa kerak...

- Yo'q, hattoki, uyga qaytishga samolyotga bilet ham olib qo'ygandim, chunki osonlik bilan yutamiz, deb o'ylagandik. Hammasi kuyib ketdi. Lekin yana bir marta bizga dars bo'ldi. Aslida raqibga yengil qaramagandik. Faqat 2:0 dan keyin biroz bo'shashdik.

- «Andijon» chorak finalga chiqdi. Qaysi raqibni kutyapsiz?

- Kuchliroq raqib bo'lsa ham yaxshiroq bo'lardi. Chunki bugungidek raqiblarga qarshi «nastroy» qilish qiyinroq.

- 20 sentabr kuni «Nasaf»ga qarshi o'tadigan o'yin oldidan nima degan bo'lardingiz?

- Bir kun dam bo'ladi. Bu umuman boshqacha o'yin bo'ladi. Mahoratli o'yinchilarga ega. Bunday paytda xohlaysizmi-yo'qmi, azart qattiq uyg'onadi. Xudo xohlasa, g'alaba qozonib muxlislarni xursand qilamiz.

O‘zbekiston Kubogi 1/8 final doirasidagi «Andijon» – «Olimpik Mobiuz» uchrashuvidan keyin mehmonlar sport direktori Andrey Miklyaev matbuot anjumanida ishtirok etdi.

Nima deyish mumkin? Menimcha, bugungi o‘yin barchaga, jumladan, muxlislarga ham yoqdi.

Albatta, o‘zingiz tushunasiz, kubok bahslari doimo yuqori shiddat va keskinlik ostida o‘tadi. Biz uchun «Andijon» o‘ziga xos prinsipial raqib edi. Biz ham futbol o‘ynay olishimizni ko‘rsatishni xohladik. Menimcha, bugun buni uddaladik.

Umuman olganda, o‘yin shaxsan menga yoqdi. Hatto 0:2 hisobida ortda borayotganimizda ham o‘yinga qaytishning uddasidan chiqdik. Eng muhimi, chuqur himoyaga yopilib olmadik. Biz bugun g‘alaba qozonishimiz ham, mag‘lub bo‘lishimiz ham mumkin edi — men aynan o‘yinning o‘zi haqida gapiryapman. Penaltilar seriyasi esa... o‘zingiz bilasiz, penalti — lotereya.

Butun jahon chempionatini ham ko‘rdik, u yerda ham shunday holatlar bo‘lgan. Albatta, biroz alamli. Hozir yigitlar xafa, ayrimlari yig‘layapti. Ammo futbol shu — penaltilar seriyasi. «Andijon» jamoasini keyingi bosqichga chiqqanligi bilan tabriklayman va ularga kelgusi o‘yinlarda omad tilayman.

Nega darvozabonni almashtirdik? Mashg‘ulotlarda biz penaltilar seriyasiga ham tayyorgarlik ko‘ramiz. Ba’zida mashg‘ulot paytida penaltilar tepamiz. Ikkinchi darvozabonning ham penaltilar paytida o‘zini yaxshi ko‘rsatish imkoniyati bor, deb hisobladik.

Bizda darvozabonlar murabbiyi bor va aynan u ham shu masalada o‘z fikrini bildirdi. Umuman olganda, qaror shu tarzda qabul qilindi: u darvozada penaltilarni yaxshi taxmin qila oladi, deb o‘yladik. Ammo ko‘rib turganingizdek, bu safar taxminlarimiz o‘zini oqlamadi. U birorta penaltini qaytara olmadi. Bunday holatlar futbolda bo‘lib turadi.

Bilasiz, hozir Yaponiyada Osiyo o‘yinlari bo‘lib o‘tmoqda. Jamoamizdan bir nechta futbolchi terma jamoaga chaqirilgan. To‘rt nafar futbolchimiz hozir terma jamoa tarkibida. Bosh murabbiyimiz ham u yerda.

Shu sababli bugungi matbuot anjumanida jamoa nomidan men ishtirok etyapman. Bundan tashqari, yordamchi murabbiyimizda qizil kartochka bor.

Shu fursatdan foydalanib, Osiyo o‘yinlarida ishtirok etayotgan milliy terma jamoamizga ham omad tilaymiz. Bugun, agar bilsangiz, ular Filippin terma jamoasini 5:1 hisobida mag‘lub etishdi. Kelgusi o‘yinlarda ham ularga omad tilaymiz. Biz esa bu yerda o‘z vazifalarimizni bajarishda davom etamiz.

Yaxshi savol. Pro ligada biz, umuman olganda, jamoa shakllantirish bilan shug‘ullanyapmiz. O‘tgan mavsumdan keyin jamoamizni sakkiz nafar futbolchi tark etdi. Qolaversa, ularning barchasi Superliga jamoalariga o‘tib ketishdi. Masalan, Farg‘ona klubi ikki nafar futbolchimizni oldi. «Qizilqum»ga ham, «Nasaf»ga ham futbolchilarimiz o‘tishdi.

Albatta, futbolchilar yuqori bosqichga ko‘tarilayotgan bo‘lsa, biz ularni rag‘batlantirishimiz va qo‘yib yuborishimiz kerak. Ularning o‘rniga esa boshqa futbolchilar keldi. Albatta, yangi futbolchilarni jamoaga moslashtirish va yaxlit jamoani shakllantirish uchun ma’lum vaqt kerak.

Shu tariqa asta-sekin jamoani shakllantiryapmiz. Biz yosh futbolchilarni tarbiyalash uchun ishlayapmiz. Ular kelajakda Superligada o‘ynay oladigan darajaga yetishishini xohlaymiz. Chunki o‘zingiz tushunasiz, barcha futbolchilar Superligada o‘ynashni istaydi.

Biz ham aynan shu maqsadda ishlayapmiz. Agar bizning futbolchilarimizni Superliga klublari olayotgan bo‘lsa, demak, biz ularni yaxshi tarbiyalaganmiz. Demak, ularga talab bor. Shuning uchun futbolchilarimizning jamoadan ketishi biz uchun bir tomondan yo‘qotish bo‘lsa-da, boshqa tomondan bu ularning o‘sishi uchun yaxshi imkoniyat.

Hatto so‘nggi transfer oynasida ham bir nafar hujumchimiz jamoani tark etdi. Hozir u Samarqandda o‘ynayapti. G‘afur Haydarov. Albatta, uning ketishi biz uchun yo‘qotish. Lekin u Superligaga o‘tdi. Bu uning o‘zi uchun ham yaxshi. Demak, uni Superliga klubi tanladi. Bu esa biz uni to‘g‘ri tarbiyalaganimizni anglatadi.

Endi u yerda o‘ynasin, yanada rivojlansin. Biz esa o‘z ishimizni davom ettiramiz. Yosh futbolchilarni tarbiyalaymiz va boshqa yigitlarni ham yuqori darajaga olib chiqishga harakat qilamiz.

Ha, ularni asosiy tarkib futbolchilari, deb aytish mumkin. Ular asosiy tarkibda maydonga tushib, o‘yinlarda ishtirok etishyapti.

Umuman, biz Shukurdan ham, Panjidan ham mamnunmiz. Bilasizmi, bizdagi futbolchilarning deyarli barchasi bir yoshdagi yigitlar. 2005 va 2006-yillarda tug‘ilganlar. Yosh jihatidan hammasi deyarli teng.

Shukur va Panji esa hozir jamoada yetakchilik qilayotgan futbolchilardan hisoblanadi. 👍

Islom Ahmedov: «Hammasini 90 daqiqa vaqt mobaynida hal qilamiz, deb o'ylagandik»

O'zbekiston Kubogi 1/8 final doirasida «Andijon» o'z uyida pro liga vakili – «Olimpik Mobiuz»ni qabul qildi. Asosiy vaqt 2:2 bilan yakunlandi. Qo'shimcha vaqtlarda ham gol urilmadi. Penaltilar seriyasida mezbonlar 5:4 hisobida g'alaba qozonishdi.

O'yindan keyin «Andijon» bosh murabbiyi Islom Ahmedov matbuot anjumanida qatnashdi.

Juda og'ir kechgan o'yindagi qiyin g'alaba bilan barchani tabriklaymiz. O'yin bo'yicha hech nima o'xshamadi. CHempionatdagi eng yomon o'yinimizni ko'rsatdik, desak bo'laveradi. Eng muhimi, og'ir bo'lsa ham g'alabaga erishdik. O'yinni ko'rib chiqib tahlil qilamiz. Boshida aytgandik, baribir yoshlarda kuchliroq jamoaga qarshi o'ynash uchun, o'zini ko'rsatish borasida motivasiya ko'proq bo'ladi. Buni futbolchilarimizga tushuntirgandik. Baribir yakunda mensimaslik holati kuzatildi va bu o'yinda sezildi. Raqib o'yin tizginini ushlab oldi, bizda esa o'xshamadi. Ha, hujumlar ko'p qildik, vaziyatlarimiz ham bo'ldi, yakunlay olmadik. Umuman olganda, uchrashuv og'ir kechdi.

Birinchi bo'limdan keyin Martin Boake nega almashtirildi? U to'pni o'zida nazorat qilib turgandi va raqib himoyachilarini bo'yi pastligi evaziga Boakedan yana foydalanish mumkin emasmidi?

Ha, foydalanish mumkin edi. Lekin o'rtada to'p nazoratini berib qo'yayotgandik. Shu bois Draganni maydonga tushirib, to'pni ko'proq nazorat qilib, hujumlar tashkil qilishni reja qilgandik. Shu bois Martinni birinchi bo'limdan so'ng olishga majbur bo'ldik.

Qandaydir o'yinchilarda ko'zi yonmaslik holati kuzatildi. «Olimpik Mobiuz» pro ligada o'rtamiyona jamoalardan biri. «Andijon» esa Superligada. Ushbu raqibni asosiy vaqtda yuta olmasligiga nima yetishmadi?

Aytganimdek, birinchi o'rinda futbolchilarni ruhiy tayyorgarligi, o'yinga bo'lgan munosabati. Har qanday raqibni qanaqa ligada o'ynashidan qat'iy nazar hurmat bilan chiqib, professionalligini ko'rsatishi kerak edi. Biroz bo'shashishlik bilan maydonga chiqishdi. Shuni hisobiga ular o'yin tizginini «ushlab» olishdi. Raqibga o'zimiz o'ynasa bo'ladi, degan ishonchni berib qo'ydik. Shu bois ularda hamma narsa o'xshayverdi. Bizda esa gol urish uchun shoshilish kuzatildi va buning oqibatida ko'p xatolarga yo'l qo'ydik.

Ha, bunday rejamiz yo'q edi. Hammasini 90 daqiqa vaqt mobaynida hal qilamiz, deb o'ylagandik. Shunga tayyorgarlik ko'rgandik. To'g'risi, qo'shimcha daqiqalarga ham, penaltilar seriyasiga ham tayyorgarlik ko'rmagandik. Penaltilar seriyasi oldidan o'yinchilarni o'zlari tashabbus bilan chiqishdi. Kimda o'ziga ishonch bo'lsa, tepishlarini aytdik.

Eng asosiysi, tiklanishga e'tibor qaratamiz. Bugun ko'p kuch yo'qotdik. Ya'ni, «Nasaf» bilan uchrashuvga u qadar ko'p kuch yo'qotmagan holda yetib boramiz, deb o'ylagandik. Biz reja qilaveramiz, ammo Allohning rejalari boshqa. Xudoimni aytgani bo'ladi. Ko'proq tiklanishga e'tibor qaratamiz va bu o'yinda yo'l qo'yilgan xatolar ustida ishlaymiz.

Andronikashvili oxirgi uchrashuvlarda jarohat bilan o'ynayotgandi. Jarohati kuchayib ketganini hisobiga o'zimizda tibbiy ko'rikdan o'tdi va unga shifokorlarimiz ma'lum vaqt dam berish kerakligini aytishdi. Gruziyaga borib, u yerda ham tibbiy tekshiruvdan o'tdi va tiklanish jarayonini yurtida o'tkazyapti. Ochig'i, «Nasaf» bilan uchrashuvgacha tayyor bo'lmaydi. FIFA kunlarida safimizga qaytadi.

OCHL 2 | 2026/27 | 1-tur

Osiyo Chempionlar Ligasi 2 2026/27 mavsumi 1-turidan o‘rin olgan “Al Haldiya” – “Nasaf” uchrashuvi oldidan matbuot anjumani bo‘lib o‘tdi.

Unda jamoamiz bosh murabbiyi Ro‘ziqul Berdiyev hamda darvozabonimiz Abduvohid Ne’matov ishtirok etdi.

OKMK bosh murabbiyi Mirjalol Qosimov “Paxtakor”ga qarshi o’yindan so’ng o’z fikrlarini bildirib o’tdi.

— O'yin haqida fikringiz?
— Qiziqarli o'yin guvohi bo'ldik. Natija qoniqarsiz, lekin o'yinimiz yomon emas. Yana eski kasalimiz qo'zg'adi: gol ura olmadik. Bahs boshida oson golni o'tkazib yubordik. Shundan keyin kuch topib oldinga bordik. Gol urishga muvaffaq bo'ldik, lekin qaysi sababga ko'ra ofsaydni aniqlashdi, tushunmadim. Birinchi marta VAR orqadan chiziq chizishini ko'rishim, hayron qoldim. Lekin na iloj, kinoda aytadi-ku: qozi pochcha, chiqargan qonunlariz hamma narsaga to'g'ri kelaveradi. Yangi qoida chiqib biz bexabar qoldikmi, yoki ma'lumotlardan orqadamizmi - bilmadim. Juda uyatli ko'rindi, shaxsan men tushunmadim. "Paxtakor"ni g'alaba bilan tabriklayman. Gol urmasang vaziyat uchun ochko bermaydi. Yigitlarimizning kayfiyati tushib ketdi. Endi keyingi o'yinga hozirlik ko'ramiz.

— Ikkinchi bo'limda etarlicha vaziyatlar yaratildi. Jamoangiz nechanchi o'yindirki 0:2 hisobida ortda borib ham ko'p vaziyatlarga ega bo'lyapti. Ammo hisob tenglashish o'rniga raqib uchinchi golni urdi. Buni qanday izohlaysiz?
— Aytdim-u bir vaziyatda golimizni hisobga olishmadi. Yangi qonun chiqqan bo'lsa kerak. Buning ustiga futbolchimiz uch metrdan to'p kirita olmadi. Tanaffusga 2:1 hisobida chiqib ketganimizda ikkinchi bo'lim boshqacha kechishi mumkin edi. Mashg'ulotlarda yigitlar bilan gaplashyapmiz. Xatolarni tushuntiramiz. Hisob 3:0 bo'lganida ham o'yin tempi tushib kyetmadi. Oxirigacha kurash kechdi.

— Murabbiy sifatida jamoangiz ko'rsatayotgan futboldan qoniqyapsizmi?
— Qo'l ostimdagi futbolchilardan minnatdorman. Natijaga kelsak, yanada yuqorida bo'lishni maqsad qilgandik. Bunga o'zimiz aybdormiz. Avgust oyida hammasi "Nasaf" bilan o'yindan boshlandi. "Nasaf"ga yutqazmasligimiz kerak edi. "Surxon" bilan "Dinamo"ni yutishimiz, Buxoroda yutqazmasligimiz kerak edi. Hamma o'yinlarda vaziyat bo'lyapti. Baribir menda bugungi o'yin bo'yicha savol qolyapti: urgan golimizda ofsayd bormidi-yo'qmidi. Balki kamerani ko'paytirish kerak. Chiziqni sal haqiqatga yaqinroq chizish kerak. Chunki bu ham muxlislar kayfiyatiga ta’sir qiladi. Jamoa bilan ishlash o'zi emas. Futbol bu koptokni ber - o'ynayveradi degani emas. Bu bilan bahona qilmayapman, bor gapni aytyapman. Biz ko'p ochko yo'qotdik, lekin maqsadimiz sovrindorlar qatoriga kirish. Buning uchun oxirigacha kurashamiz.

— OKMK o'rtamiyona jamoa bo'lib qolmay sovrindorlar qatorida yurishi uchun nima qilish kerak deb hisoblaysiz?
— Qisqa aytganda yaratilgan vaziyatlardan foydalanib gol urish kerak. Shunda g'alaba qozonasiz va tepada yurasiz.

— 2024 yil OKMK chempionatda ikkinchi o'rinni olgandi. Natijalar pasayib qolsa, odamlar Mirjalol Qosimov o'sishdan to'xtab qoldi, o'n yil oldingi Qosimov emas, jamoaga yangi qon kerak deyapti.
— Endi hammaning o'z shaxsiy fikri bor. Tilning suyagi yo'q. Hozir hamma mutaxassis. Lekin bu erga kelib ishlab ko'rishsa biladi. Noliydigan joyim yo'q, biz muxlislarga yoqadigan futbol namoyish etyapmiz. Har doim yuqori natija ko'rsatishga harakat qilganman. Men birovning fikriga qarab yashamayman.

Nasaf OCHL 2 2026/27 mavsumi uchun OAV vakillarini akkreditatsiyadan o'tkazishni boshladi

Xabaringiz bor, sevimli jamoamiz — Nasaf Osiyo Chempionlar Ligasi 2 2026/27 mavsumining A guruhida BAAning Al Vahda, Bahraynning Al-Haldiya va Quvaytning Quvayt SK jamoalariga qarshi bahs olib boradi.

Jamoamizning joriy mavsumdagi uy uchrashuvlariga oid rasmiy matbuot tadbirlarida ishtirok etish istagidagi OAV vakillaridan akkreditatsiya uchun arizalar 16-sentyabrga qadar qabul qilinadi.

Akkreditatsiya uchun quyidagi hujjatlar elektron shaklda taqdim etilishi lozim:

OAV tashkilotidan rasmiy xat;

3x4 hajmdagi fotosurat;

Pasport nusxasi.

Barcha hujjatlar medianasaf@gmail.com elektron manziliga yuborilishi kerak.

Kamoliddin Tojiyev: «O‘yin to‘liq nazoratimizda o‘tdi»

«Paxtakor» - «Andijon»(3:0) o‘yindan keyin mezbonlar ustozi Kamoliddin Tojiyev matbuot anjumanida ishtirok etdi.

Assalomu alaykum. O‘yin haqida keladigan bo‘lsak, uchrashuvni to‘liq o‘z qo‘limizda o‘tkazdik — birinchi bo‘limda ham, ikkinchi bo‘limda ham. Vaziyatlar yaratdik va imkoniyatlarimiz gol bilan yakunlandi, gol urdik. Undan oldingi o‘yinlarda vaziyat yaratib, gol ura olmay turgan edik, bu safar esa yaratilgan vaziyatlardan gol urdik va g‘alaba qozondik. Yigitlarga ham har doimgidek rahmat deyman. Bizda fidoyilik oxirigacha bo‘ldi, kurashishdi va g‘alaba qozondik.

— Hisob 3:0, raqib bir futbolchi kam qoldi. Zaxiradan maydonga, adashmasam, bitta yosh o‘yinchi tushdi...

Ular ham yoshlar ligasida juda qiyin o‘yin o‘tkazishdi. O‘zi jami o‘n bitta odamimiz bor. U-21da ham ular kecha 1:2 yutqazib turgan paytda, oxiri 3:2 yutishdi. O‘shanda ham ular juda ko‘p kuch yo‘qotdi. Sardor ikkita gol urganiga, undan oldin ham gol urgandi, o‘shanga Sardorga imkoniyat berdik. Ular ham kecha ko‘p kuch yo‘qotdi. Ko‘plab yigitlar yoshlar milliy jamoasiga ketishgan edi.

— «Neftchi»ga qarshi o‘yin Kamoliddin Tojiyev uchun oxirgi imkoniyat deyilgandi. Lekin siz hali ham jamoani boshqaryapsiz. Umuman olganda, hozirgi holatda ishlash qanchalik qiyin bo‘ldi? O‘sha gaplar to‘g‘rimi edi?

O‘tgan safar ham aytdim, bunaqa gap yo‘q, rahbariyatdan ham, hech qayerdan bunday gap bo‘lgani yo‘q. Bilmayman, kim buni qayerdan chiqardi, unday gap yo‘q edi. Jamoa yutqazmayapti-da. To‘g‘ri, durang o‘ynab qo‘yyapmiz, hali ham chempionlik uchun kurashyapmiz. Bilmayman, qayerdan bu gap chiqdi.

— O‘zingiz uchun ishlash qanday bo‘lyapti? Bu gaplar hozir ta’sir qilmaydimi, bosim bormi?

Hamma narsaga ahamiyat beraverilsa, qiyin bo‘ladi.

— O‘qimaysizmi, mediani?

O‘qiymiz. Lekin biz faqat jamoaga, keyingi o‘yinga tayyorgarlikka e’tibor qaratib, o‘shaning ustida ishlaymiz.

— Muhammadrasul Abdumajidov transferi bo‘yicha. O‘shanda ham asosiy aybdor deb Kamoliddin Tojiyev ko‘rsatildi. Aslida nima bo‘ldi, rostdan klub uni qo‘yib yuborishni istamagandimi?

Birinchidan, klubga rasmiy xat kelgani yo‘q edi. Klub ham buni yozib chiqdi — rasmiy xat kelmadi, faqat agentidan xat keldi. Ikkinchidan, Rasulning o‘zi ham jamoani hozir tashlab ketishni xohlamadi, «Men qolaman», dedi. Uchinchidan, u yanvarda allaqachon shartnoma imzolab bo‘lgan va «Brest»ga ketadi, bir yilga ijaraga.

— Demak, qishda aniq ketadi hozirgi paytda?

Ha, yanvarda aniq ketadi, bir yilga.

— Iroq «Paxtakor» translyatsiyalarni xarid qilgan. Shundan keyin iroqlik futbolchilarda sermahsullik oshyapti. Bu tasodifmi yoki...

Ularga ham aytaman: «Sizlarni Iroqda ham ko‘rsatishyapti, chiqib yaxshi o‘ynashlaring, o‘zingizni ko‘rsatishlaring va jamoaga yordam berishlaring kerak», deb. Bundan oldin Bashar ham gol urardi, Zayd ham gol urgan.

— Kamoliddin aka, sizni va «Paxtakor» rahbariyatining qarorlarini tanqid qilayotganlar bor: Hamraliyev, Xolmatov, Azmiddinov kabi futbolchilarni berib yubordi, eronlik esa jarohat olib qoldi. Nega ularni qo‘yib yuborib, Abdumajidovni qo‘yib yubormadi, deyishyapti...

Bizning transfer oynamiz yopilgandan keyin chiqishdi. Undan oldin rasmiy xat bilan chiqqanida, biz hech qachon ushlab o‘tirmaymiz. Biz har doim qo‘yib yuboramiz. O‘tgan yili ham Muhammadrasulni mavsum o‘rtasida Belgiyaga qo‘yib yuborgandik. Shunchaki, bu safar shunday vaziyatga tushib qoldiki, transfer oynasi yopilib bo‘lgan edi. Undan oldin aytishganda, biz Hamraliyevni qo‘yib yubormasdik, Azmiddinov bor edi, uni bemalol qo‘yib yuborardik. Bunga rasmiy xat kerak, klubga rasman murojaat qilish kerak.

— Vladimir Nazarov milliy jamoaga borib yuradigan darvozabon edi. Menimcha, o‘sha «Neftchi»ga qarshi Superkubokdagi xatosidan keyin ancha o‘ynamay qo‘ydi. Adashmasam, may oyidan beri o‘ynamayapti. Shu haqida nima deysiz?

Unga ham imkoniyat beramiz. U ham mashg‘ulotlarda ishlayapti, xafagarchiligi yo‘q. Ishlayapti, kutyapti. Biz ham uni ko‘ryapmiz va unga imkoniyat beramiz, u ham o‘ynaydi. Hali o‘yinlarimiz ko‘p.

— Klub rahbari Jahongir Ortiqxo‘jayev «Paxtakor»da qoladigan bo‘ldimi yoki ketadimi? Hali rasmiy xabar chiqmadi.

Jahongir Ortiqxo‘jayev hali ham biz bilan klubda, hamma joyda birgamiz. Gapirishyapti ketdi deb, lekin rasman ketganlari yo‘q, hamon klubda.

— «Neftchi» — «Nasaf» o‘yini natijasini bilib turganmidingiz?

Yo‘q, faqat birinchi bo‘limdan keyingi hisobni bildim. Bizning oldimizda o‘z o‘yinimiz turibdi, o‘zimizning o‘yinlarimizni yutsak bo‘ldi.

— «Nasaf»dan shunday g‘alabani kutgandingizmi?

Yo‘q, kutmagandik.

Matbuot anjumani. Islombek Ismoilovning Nasafga qarshi o’yindan so’ng bildirgan fikrlari

Nasaf klubi AFC chempionlar ligasining C guruhidan oʻrin oldi

Melbourne City (Avstraliya)
Beijing Jingtan (Xitoy)
Kaya-Iloilo (Filippin)
Nasaf (O‘zbekiston)

Ayollar klublari o‘rtasidagi Osiyo Chempionlar ligasi guruh bosqichiga qur’a tashlandi.

Qur’a natijasiga ko‘ra, O‘zbekiston chempioni «Nasaf» C guruhidan joy oldi. Qarshiliklar guruh bosqichida Avstraliyaning «Melbourne City», Xitoyning «Beijing Jingtan» hamda Filippinning «Kaya-Iloilo» klublariga qarshi bahs olib boradi.

Ma’lumot uchun, Osiyo Chempionlar ligasi guruh bosqichi uchrashuvlari 1–7-noyabr kunlari bo‘lib o‘tadi. C guruhi bahslariga Qashqadaryo viloyati mezbonlik qiladi.

O‘zbekiston U-23 terma jamoasiga 5 nafar «Nasaf» futbolchisi jalb qilindi!

O‘zbekiston U-23 terma jamoasi 1-sentyabrdan Milliy futbol markazida o‘quv-mashg‘ulot yig‘inlarini boshladi. Osiyo o‘yinlariga tayyorgarlik ko‘rayotgan yoshlarimiz 10-sentyabr kuni safarda Xitoy U-23 terma jamoasiga qarshi nazorat uchrashuvida maydonga tushadi.

Ravshan Haydarov boshchiligidagi yig‘inga jamoamiz a’zolari:

Samandar Muratbayev
Diyorbek Abdunazarov
Dilshod Murtazayev
Sardorbek Bahromov
Quvonchbek Xushvaqtov

jalb etildi. Futbolchilarimizga terma jamoa safida omad tilaymiz!

Osiyo o‘yinlari — 2026

15-sentyabr
O‘zbekiston — Filippin

18-sentyabr
Kuvayt — O‘zbekiston

22-sentyabr
O‘zbekiston — Vyetnam

Jamoamiz chorak finalda!

Navbahor klubi matbuot va media xizmati talqiniga ko'ra, Navbahor - Nasaf (1:0) uchrashuvining eng yaxshi futbolchisi - Ruslanbek Jiyanov ⭐️

Superliga 2026, 19-tur.

Mash'al 0:1 Navbahor

Gol: Jaloliddinov, 20

Bugun Qarshida AFC Ayollar Chempionlar Ligasi 2026/27 mavsumi saralash bosqichining navbatdagi uchrashuvlari bo'lib o'tadi.

C guruhidan joy olgan O'zbekiston chempioni Nasaf BAAning amaldagi chempioni — Banaat klubiga qarshi maydonga tushadi.

Banaat FC — BAA ayollar futbolining tez rivojlanayotgan klublaridan biri. Dubay jamoasi 2023-yilda tashkil etilgan bo'lib, qisqa vaqt ichida mamlakatning yetakchi klublari qatoridan joy oldi. Banaat 2025/26 mavsumida o'z tarixida ilk bor BAA chempionligini qo'lga kiritdi.

Jamoani ayni paytda marokashlik mutaxassis Wafa Nacha boshqarib bormoqda. Marokash terma jamoasining sobiq futbolchisi bo'lgan Nacha yozda Banaat FC bosh murabbiyi lavozimini egalladi va jamoani AFC Ayollar Chempionlar Ligasi saralash bosqichiga tayyorladi.

Banaat Qarshidagi saralash bosqichini Butanning Royal Thimphu College jamoasi bilan 1:1 hisobidagi durang bilan boshladi. Ikkinchi turda esa Laosning Master klubini 9:0 hisobida mag'lub etib, yirik g'alabaga erishdi.

Qisqa tarixiga qaramay, BAA chempioniga aylanishga ulgurgan Banaat FC bugun mezbon Nasafga qarshi muhim bahsda maydonga tushadi. O'zbekiston sharafini himoya qilayotgan Nasaf jamoasiga muhim uchrashuvda omad tilaymiz!

Navbahor - Nasaf o'yinini tomosha qilish uchun 19 540 nafar muxlis tashrif buyurdi.

Bu Superliganing joriy mavsumidagi eng yaxshi natija hisoblanadi.