Neftchi — yangiliklari Matbuot

«Buxoro» jamoasi tarkibiga yaqinda kelib qo’shilgan tajribali futbolchi Quvondiq Ro’ziyev kecha debyut uchrashuvini o’tkazib, o’z hisobiga assist yozdirib qo’ydi. Mahoratli futbolchi klub matbuot xizmatiga intervyu berib, dastlabki taassurotlari bilan o’rtoqlashdi.

– Quvondiq aka, avvalambor «Buxoro» tarkibidagi debyut uchrashuvingiz va qo’lga kiritilgan ishonchli g’alaba bilan tabriklaymiz! Birinchi o’yiningizda chiroyli assistni amalga oshirdingiz. Dastlabki taassurotlaringiz qanday?

– Avvalambor Buxoro ahlini muhim g’alaba bilan tabriklayman. Barcha futbolchilar murabbiylarimiz ko’rsatmalarini astoydil bajarishga harakat qildi va o’ylagan rejalarimiz amalga oshdi. O’yin oxirigacha sabr qildik va ijobiy natijani qo’lga kiritdik. Debyut uchrashuvimda jamoam g’alabasiga hissa qo’shganimdan xursandman.

– Jamoamiz tarkibiga kelib qo’shilganingizga hali ko’p bo’lmadi, moslashish jarayonlari qanday kechmoqda?

– Jamoaga asta-sekin moslashyapman. Bu yerda ham oldin bir jamoada harakat qilgan bir nechta do’stlarim bor. Ko’rinib turibdi, jamoamiz juda ahil va yaxshi kollektiv yig’ilgan, shu sababli moslashish jarayoni oson kechmoqda.

– «Buxoro» jamoasiga transfer oynasining so’nggi kunida kelib qo’shildingiz. Jamoamizga kelish varianti qanday paydo bo’ldi? Qaror qabul qilishda nimalar muhim bo’ldi?

– Jamoaga kelishimga direktorimiz Shavkat Salomovning hissasi katta bo’ldi. Murabbiy meni o’z jamoasida ko’rishni xohlashini tushuntirdi. Shu sababli jamoaning ko’rsatayotgan o’yini va turnir jadvalidagi o’rnidan kelib chiqib, «Buxoro» taklifini o’ylab o’tirmasdan qabul qildim.

– Ayni vaqtda «Buxoro» jamoasi musobaqa jadvalida kuchli uchlikda bormoqda. Jamoaning potensialini qanday baholaysiz?

– Jamoamizning yuqori uchlikda turishi to’satdan bo’lib qolgani yo’q. Buning tagida katta mehnat bor, nafaqat futbolchilar, murabbiylar, butun rahbariyat, hammaning mehnati yotibdi. Shu sababli hozirgi kunda Superligada yuqori o’rinlarda bo’lish men o’ylaymanki, ajoyib natija. Chunki «Navbahor», «OKMK», «Nasaf» kabi kuchli jamoalar bilan qizg’in kurash kechmoqda va bu oxirigacha davom etsa kerak.

– Keyingi turda sobiq jamoangiz «Neftchi» klubiga qarshi maydonga tushamiz. Mazkur bellashuvdan nimalar kutyapsiz?

– Albatta, amaldagi chempionlarga qarshi o’ynash har doim qiziq bo’ladi. Menimcha, o’yin kuni muxlislar stadionni to’ldirishadi. Tabiiyki, biz muxlislar qarshisida har doim g’alaba uchun to’p suramiz. Muxlislar qo’llab-quvvatlashi bizga qo’shimcha kuch bag’ishlaydi. Shu sababli g’alaba qozonish uchun bizda imkoniyat bor deb o’ylayman va buning uchun maydonda bor kuchimizni ishga solamiz.

– Buxorolik muxlislar mavsum davomida sizdan ko’p narsa kutishadi. Boisi jamoamiz tarkibidagi eng tajribali futbolchilardan biri siz…

– Buni juda yaxshi his qilib turibman. Jamoaga yordam berish uchun kelganman. Bu har bir futbolchining vazifasi deb o’ylayman. Jamoa chempionat oxirida kuchli uchlikdan joy olishi uchun bor kuchim bilan harakat qilaman. Muxlislar ishonchi uchun katta rahmat aytib qolaman.

«Bobur arena»da bo‘lib o‘tgan «Andijon» - «Neftchi» (0:3) o‘rtasidagi vodiy derbisidan keyin tashkil qilingan matbuot anjumanida dastlab mehmonlar ustozi Islom Ismoilov qatnashdi.

Birinchi navbatda ajoyib g‘alaba bilan muxlislarimizni tabriklayman. Stadionda ajoyib atmosfera hosil qilishdi. Xuddi uyda o‘ynagandek bo‘ldik. O‘yin og‘ir o‘tishi aniq edi. Sababi, vodiy derbisi va ikkala jamoa ham hujumkor futbol o‘ynaydi. Shunga qaramasdan g‘alaba qozondik. Lobanovskiyning gapi bor: natija qoladi, o‘yin unutiladi. Ba’zi paytlarda sifatsiz yoki yaxshi o‘ynamasdan ham natija muhim hisoblanadi.

O‘yindan oldin futbolchilarimizga bergan ko‘rsatmamizda ko‘proq o‘yin intizomiga e’tibor qaratdik. Bunga sabab bo‘ladigan juda ko‘p omillar bor edi. Uchrashuvni yuqori intensivlikda boshlay olmasdik. Shuning uchun intizom muhimligini tushunib turdik.

Birinchi taymda «Andijon» jamoasi tashabbusga ega bo‘lgan bo‘lishi mumkin. Biz ularga o‘ynash uchun imkoniyat berdik. Bu oldindan ishlab chiqilgan rejaga asosan edi. Ikkinchi taymda ozgina tempni ko‘tardik va o‘z o‘yinimizni o‘ynashni boshladik. Raqibni xatolar qilishga majbur qildik.

Himoyadan pas bilan chiqib ketishga harakat qildik. Maydon sifati bunga yo‘l qo‘ymasdi va ko‘proq uzun paslarga o‘tdik. Qisqa paslarimizni raqib jarima maydoni atrofida qilishga harakat qildik. Havoda to‘p uchun kurashlarda ko‘proq ikkinchi to‘plarni yutqazib qo‘ydik. Birinchi taymda bu narsa yaqqol ko‘zga tashlandi.

Tanaffusdan keyin o‘zimizni pressing uslubimizga qaytishga qaror qildik. Shu bilan raqibni ko‘p xato qilishga majbur qildik. Umuman olganda, «Andijon» jamoasi ham yaxshi o‘yin ko‘rsatdi. Yaxshi murabbiy ishlayapti. O‘ylaymanki, bu murabbiy bilan «Andijon» jamoasi hali ko‘plab yutuqlarga erishadi.

Usmonali Ismonaliyevning qizil kartochka olishi o‘yin natijasiga ta’sir qildi, deb o‘ylaysizmi?

Bu futbol, har narsa bo‘lishi mumkin edi. Balki raqib 11 futbolchi bilan o‘ynaganda ham o‘z golimizni urishimiz mumkin edi. O‘sha holatgacha bo‘lgan vaziyatni oladigan bo‘lsak, ikkinchi taymni hujumkorlik bilan boshladik va raqibni aynan shu holatda xato qilishga majbur qildik. O‘sha vaziyatga yaqin turgandim. Raqib ataylab qo‘pol o‘ynamagandi, ammo bu qoida va u hamma uchun bir xil. Qonun-qoida bo‘yicha bu 100 foiz qizil kartochka edi. Balki bu ham ta’sir qilgan bo‘lishi mumkin. Lekin biz yigitlarga ishondik va ishlab chiqilgan rejamiz ham bor edi. Baribir birinchi taymga nisbatan ikkinchi taymda o‘yinimizni kuchaytirmoqchi edik.

Bungacha asosan himoyachi sifatida o‘ynagan Muhsin Ubaydullayev bugun yarim himoyada o‘ynadi. Bu taktikangizmidi?

Ha, bu jarohatlar bilan bog‘liq. Jarohatlar ko‘payib ketdi. Yovan Jokich, Abror Ismoilov, Anvar G‘ofurov, bugun mana Ratinyo jarohat oldi. Bunaqa holatda jamoa keyingi o‘yinlarga qanday tayyorgarlik ko‘radi? Asosiy yetakchi futbolchilarimiz bitta-bitta safdan chiqishyapti. Bizda boshqa imkoniyat yo‘q edi. Ikrom Aliboyevni nima uchun zaxirada qoldirgandik? Chunki unda sariq kartochkalar soni uchta edi. «Buxoro» bilan uchrashuvni hisobga olgan holda uni zaxirada ushlab turgandik. Afsuski, u ham bugun to‘rtinchi sariq kartochkasini oldi va yana bir o‘yinchimiz safdan chiqdi. Muhsin bu pozitsiyada o‘ynagan. Bunga o‘tgan uchrashuvda tayyorgarlik ko‘rishni boshlagandik. «Qizilqum»ga qarshi oxirgi 20 daqiqalikda aynan «Andijon» uchun tayyorgarlik sifatida o‘zgarishlarni qilganmiz va o‘sha holatda Muhsin o‘zini oqlagan.

Yosh futbolchi Abdug‘aniyevning o‘yini haqida fikringiz?

Insonni quvontiradi. Buning ustiga birinchi o‘rinda ketayotgan «Neftchi»dek jamoada bunday futbolchining o‘ynashi o‘zi uchun katta yutuq. Murabbiy sifatida biz ham katta tavakkalchilikka qo‘l uryapmiz. Bizda boshqa imkon ham yo‘q. Hozirga qadar berilgan ishonchni to‘liq oqlayapti. Ishlashdan to‘xtamasa, u ham Husanov darajasidagi yuqori saviyadagi himoyachi bo‘ladi. 18 yoshida Superligada ishonchli o‘ynayapti. Ungacha 3-4 ta uchrashuv o‘tkazgan bo‘lsa, birorta xato qilmagan.

Yozgi seleksiyada «Andijon» «Neftchi» futbolchilari — Izzatillo Po‘latov va Asilbek Jumayevga qiziqqan ekan. Ularning mahoratini yanada oshirish maqsadida «Andijon»ga bersa bo‘lmasmidi?

Po‘latovni bermoqchi bo‘ldik, keyinchalik «Andijon» buni xohlamadi. Asilbek Jumayevga kelsak, bizda Abror Ismoilov jarohat olgandan keyin iloji yo‘q bu pozitsiyaga o‘yinchi ushlab turishimiz kerak edi.

O‘zingiz aytganingizdek, bir qator o‘yinchilar jarohat olib safdan chiqyapti. OCHL Elit musobaqasida bunday yo‘qotishlar bilan qanday ishtirok etmoqchisizlar?

Hayronman. Bu bo‘yicha murabbiylar shtabi bilan yana maslahat qilamiz. Hozir bir nima deyish qiyin. Har bir uchrashuv og‘ir o‘tyapti. Bunday yo‘qotishlarga uchrayversak, iloji yo‘q, yoshlarga ham ko‘proq imkoniyat beramiz. Lekin vaziyatdan chiqib ketishga harakat qilyapmiz. Yozgi tanaffusdan keyin o‘yinlar yanada qiyin o‘tyapti. Qayerdadir ochko, qayerdadir futbolchilarni yo‘qotyapmiz. Umid qilamanki, bu vaziyatdan chiqib ketamiz. Nasib qilsa, OCHL Elit musobaqasigacha barcha o‘yinchilar to‘liq safga qaytishadi.